Psalms 94

Romani Baltic (Библия - Пэ Балтитко Романи чиб (Романэс) 2019)

← Chapter 93 Jump to: Chapter 95 →

1О, Раё Дэ́вла, Саво́ чхувэ́ла ка́ра, Дэвлалэ, Саво́ чхувэ́ла ка́ра (хась), сыкадёв Кокоро́.

2Газдэ Пэс, Ту, Сэнда́ри, пир сари́ пхув, сэндякир чачунэ́с пхутькирдэн.

3О, Раё Дэ́вла, кицы́ явэ́на фуй мануша́, кицы́ явэ́на фуй мануша́ тэ радынэ́нпэ?

4Ёнэ выпхэнэнапэ, ёнэ ракирэ́на бариканэс, сарэ́, кон кэрэ́ла чорипэ́н, пхутёна пэ́са.

5Ёнэ роспхаравэна Тырэ́ манушэ́н пэ котэра́ (куски), о Раё Дэ́вла, ёнэ притасавэ́на Тыро́ миштыпэ́н;

6ёнэ замарэна пивлен (удовэн) и чужонэ́ манушэ́н и мулякирэна пиротэн (сиротэн).

7И ёнэ ракирэ́на: “Рай Дэвэ́л на дыкхэла дава́, ци Израилёскиро Дэвэ́л на рискирэ́ла годы́ пэ дава́.

8Ѓалён тумэ́, хрустэнгирэ (бигодякирэ), машки́р манушэ́ндэ; тумэ́ сан дылынэ́, ке́ли тумэ́ явэ́на годэ́?

9Ци на дошунэла Одова́, Кон чхудя́ кан? Ци на додыкхэла Одова́, кон кэрдя́ якх?

10Ци на явэ́ла тэ сэндякирял Одова́, Кон сыклякирэ́ла на́цыи? Кодова́, Саво́ дэ́ла годы́ манушэ́нгэ?

11Рай Дэвэ́л джинэ́ла манушэ́нгирэ ду́мы, со ёнэ исын хартытка (суетна).

12Бахтало́ исын ману́ш, савэ́скэ Ту дэ́са годы́, о Раё Дэ́вла, савэ́с Ту сыклякирэса Тырэ́ Законоскэ,

13соб (кай) Ту тэ дэс лэ́скэ тэ откхинёл пхарэ́ дывэсэ́ндыр, пака ґанби́н (яма) явэ́ла тэ ґанавэлпэ ваш фуе́ манушэ́нгэ.

14Пал-дова́ со Рай Дэвэ́л на ячкирэ́ла Пэ́скирэ манушэ́н, и Ёв на мэкэ́ла одолэ́н, савэ́ исын сы́рбы лэ́скиро мэкно́ миштыпэ́н;

15нэ Лэ́скиро сэ́ндо явэ́ла нэвэ́стыр чачуно́, а одолэ́, конэ́стэ исын чачуно́ ило́, явэ́на тэ джа́н пал дава́ дурэды́р.

16Кон явэ́ла тэ затэрдёл пал ма́ндэ анги́л одолэ́ндэ, савэ́ кэрэ́на чорипэ́н? Кон явэ́ла тэ рикирэ́л мири́ риг проти одолэ́ндэ, савэ́ кэрэ́на бэда рэ́нды (злыднитка де́лы)?

17Ко́ли на дэ́лас васт ма́нгэ Рай Дэвэ́л, тэды миро ди ґара́ явэ́лас одо́й, кай исын мэрибнытко штылыпэн.

18Сыр мэ пхэна́ва: “Мири́ ґэро́й кунинэлапэ, тэды Тыри́ лачхэ́-илы́ткима, о Раё Дэ́вла, подрикирэ́ла ман,

19Ке́ли мирэ́ ду́мы пхэрдякирэна миро шэро́, буты́р и буты́р, тэды Ту подрикирэса и обрадынэса миро ду́хо (фа́но).

20Ту на явэ́са кхэтанэ́ чорэ́ ранца, савэ́ придуминэна фуипэ́н заме́ст одова́, со исын дро Зако́но.

21Ёнэ скэдэ́напэ кхэтанэ́ тэ мулякирэ́н чачипнаскирэ манушэ́с, ёнэ бангякирэна бибангэ манушэ́с, соб (кай) тэ прочхувэн лэ́скиро рат.

22Нэ Рай Дэвэ́л явэ́ла тэ затэрдёл пал ма́ндэ тэ бронинэл ман; и миро Дэвэ́л исын сыр бэ́рга ма́нгэ тэ ґарадёвав.

23Ёв рискирэ́ла пэ лэ́ндэ лэ́нгиро чорипэ́н, и Ёв хасякирэ́ла лэн лэ́нгирэ фуипнаса, Рай Дэвэ́л, амаро́ Дэвэ́л, чхурдэ́ла лэн тэ хасён.

← Chapter 93 Jump to: Chapter 95 →