Song of Solomon 3

Romani Baltic (Библия - Пэ Балтитко Романи чиб (Романэс) 2019)

← Chapter 2 Jump to: Chapter 4 →

1Пэ миро чхуибэ́н мэ родыём раты́ кодолэ́с, кэ саво́ миро ди притырдэла: мэ родыём лэс, нэ мэ на латхём (ластём) лэс.

2Мэ уштава фэды́р и обпрастава фо́ро, вули́цы (га́сы) и штэ́ты, кай мануша́ кэдэнапэ; мэ ява́ва тэ родав лэс, кэ саво́ миро ди притырдэла; мэ родыём лэс, нэ мэ на латхём (ластём) лэс.

3Ракхибнаскирэ (стражы), савэ́ псирэ́на пир фо́ро, латхнэ́ ман – мэ пхуцёмпэ: “Ци дыкхнэ́ тумэ́ кодолэ́с, кэ саво́ миро ди тырдэлапэ.”

4На́бут мэ гиём криг лэ́ндыр, ке́ли мэ латхём (ластём) кодолэ́с, кэ саво́ мэ тырдавапэ: мэ рикирдём лэс и мэ на мэкавас лэс, анги́л, сыр мэ лыджа́ва лэс дрэ мирэ́-да́киро кхэр, и дрэ ла́кирэ кхэри́тка коморы (харомы), кон бияндя́ ман.

5Засовлахава тумэн, Ерусалимо́скирэ чхая́лэ, газэленца и фэлдытконэ миргэнца (ланенца), соб (кай) тумэ́ тэ на джангавэн, тэ на ґаздэ́н миро ило́ анги́л, сыр явэ́ла лачхо́ лэ́скэ.”

6“Кон адава́ исын, саво́ уштэ́ла чхучэ́ прахэндыр, сы́рбы баро́ тхув ґаздэ́лапэ, саво́ исын тхувлякирдо миро́са и гудлэ́ смоласа, и кажнонэ́ лачхэ́-сунгакирэ драбэнца тылгарьендыр (купцэндыр).

7Дыкхэ́н! Акэ, исын Соломоно́скирэ-крали́тко чхуибэ́н: бидарипнаскирэ шовдэша́ мурша́ исын пашы́л лэ́стэ, ёнэ исын най зоралэды́р дро Израилё.

8Лэ́ндэ сарэ́ндэ исын курта́ла, ёнэ исын спецы тэ марэ́нпэ; кажнонэ́ манушэ́стэ исын курта́ла пашы́л лэ́скири ґэро́й, соб (кай) тэ на дарэ́н раты́.

9Кра́ли Соломо́но кэрдя́ пэ́скэ троно, со счхувэлапэ.

10Ёв кэрдя́ рупувэ́ стылбицы дро троно, лэ́скири пхаля тэ чхувэ́л куня́ (локотники) исын сувнака́стыр, лэ́скиро штэ́то тэ бэшэ́л исын пурпуростыр; Ерусалимо́скирэ чхая́ выкхудэ андра́л дава́ троно пэ́скирэ илэ́са.

11Джа́н тэ дыкхэ́н, Сионо́скирэ чхая́лэ, акэ, исын кра́ли Соломо́но, дрэ крали́тко стадык (вя́нка), сави́ лэ́скири дай чхудя́ пэ шэро́, дро дывэ́с, ке́ли ёв лыя́ совла́х, дро дывэ́с, ке́ли лэ́скиро ило́ радындяпэ.

← Chapter 2 Jump to: Chapter 4 →