Song of Solomon 8

Romani Baltic (Библия - Пэ Балтитко Романи чиб (Романэс) 2019)

← Chapter 7 Jump to:

1О, соб (кай) ту тэ явэс мирэ́ пшалэса, конэ́скэ мири́ дай тэ дэл колы́н тэ пьел! Ко́ли мэ латхавас тут пэ вули́ца (пэ га́са), то мэ чамудавас тут, и нико́н на дыкхэ́лас пэ ма́ндэ вучипна́са.

2Мэ лыджавас тут, и мэ янавас тут дро кхэр мирэ́-да́киро. Ту сыклякирэсас ман, а мэ панякиравас тут соко́са (хумэ́са) гранатытконэ пхабэндыр.

3Лэ́скиро зэ́рво (ле́во) васт исын тэл миро шэро́, а чачо́ (право) васт облэла ман.

4Мэ засовлахава тумэн, чхая́лэ Ерусалимо́скирэ, на джангавэн и на пхарьякирэн ило́ пирамня́кэ (камлякэ), пака ёй джангадёла кокори.

5Кон дава́ джа́ла упрэ́ чхучэ́ пхувья́тыр, и кон дава́ пририкирэлапэ пал пэ́скирэ пирамнэстэ? Мэ джангадыём тут тэл пхабэлин. Одо́й тыри́ дай бияндя́ тут. Одо́й тыри́ родно дай бияндя́ тут.

6Причху́в ман пэ тыро́ ило́ сыр чэргэнори́, сыр ангрусты пэ тыро́ васт, пал-дова́ со пирамнипэ́н (камлыпэн) исын зорало́ сыр мэрибэ́н: пирамнипэ́н зэвлынэла сыр маґила (кула); ла́кирэ марибны́тка бустя́ (стре́лы) исын сыр ягитка бустя́, сыр яг, сави́ на мурдёла.

7Барэ́ паня́ нашты́ тэ мурдякирэл пирамнипэ́н, и рэ́ки (лэня́) на зачхувэна лэс. Ко́ли тэ дэл о ману́ш саро́ пэ́скиро барвалыпэ́н пал пирамнипэ́н, то дава́ прилэнас бы ёв бангэ́ илэ́са.

8Амэ́ндэ исын пхэн, и ла́тэ нанэ колынорэ; со амэ́нгэ тэ кэра́с амарэ́ пхэняса, сыр явэ́на тэ сватынэн ла?

9Ко́ли ёй тэ явэ́л вантаса (сцянаса), то амэ кэрасас коморы (харомы) рупувэ́; ко́ли тэ явэ́л ёй вударэса, то амэ обсываса лэс кедрытконэ пхаленца.

10Мэ сом ва́нта, и мирэ́ цюця исын сы́рбы вучардя (башни); пал-дава́ мэ ява́ва дрэ лэ́скирэ якха́ сыр дасави́, кон латхя́ рама́нё (миро).

11Соломоностэ сыс винаграды́тко у́нта (садо) дро Ваал-Гамоно: ёй отдыя́ дая́ у́нта ракхибнарьенгэ; кажно исын банго́ тэ янэл пал далэ́ барьякирдэ́ (пло́ды) бар рупувэ́ ловэ́.

12Нэ мири́ винаграды́тко у́нта исын пашы́л ма́ндэ. Ту́кэ, о Соломо́нэ, мэк тэ явэ́л бар (тысёнцо), а дуй шэла́ одолэ́нгэ, савэ́ ракхэна барьякирдэ́ (пло́ды).

13Ту, кон дживэ́ла дрэ у́нта! Тырэ́ мала́ кандэ́на тыри́ зан (глос), мэк и ман тэ шунав тыри́ зан.

14Наш, пирамнэ ми́ро; яв сыр мирга (серна) ци яв сыр тэрно́ шынгуно́ (оленё) пэ бэ́рги бальзамитка!

← Chapter 7 Jump to: