1 Corinthians 13

Romani Baltic Latin (Biblija - Pe Baltitko Romani čib (Romanes) 2019)

← Chapter 12 Jump to: Chapter 14 →

1Kóli me rakiráva manušytkoné, ci Jangolytkone čibenca (čib'jenca), ne mánde nane pšalýtko patýv ke javír manušá, tedy miro rakiribén isyn sýrby xarkóma (mied'), so kuduniakirela (zvieninela), ci kimvalo, so déla zan.

2I kóli mánde isyn taláno te angilphenav, i me džinóm saré čorahanybena i mánde sys džinybén i dasavo patiaibén, so me moginav te pirikharáv (piričhuváv) bérgi, a mánde nane pšalýtko patýv, tedy me som nikón.

3I kóli me rozdava saró miro mištypén i otdáva miré masá pe jag, a mánde nane pšalýtko patýv – nane mánge ni savó lačhipén daléstyr.

4Pšalýtko patýv but vyrikiréla i isyn lačhó; pšalýtko patýv na déla jakhalo; pšalýtko patýv na zadelape i na phutjola;

5Pšalýtko patýv na xalape, na rodéla l'góta péske, na xoliasóla, na duminéla fuipén;

6pšalýtko patýv na radynélape načačipastyr, a radynélape pal čačipén;

7saró pirilydžala, patiála sareske, užakiréla lačhipén dro saró, zaterdjola pal saró.

8Pšalýtko patýv isyn viéčno, mek angilphenybén te končynelpe, mek čibá (čibjá) te javén štyl (ciha), mek džinybén te prodžal.

9Pal-dová so ame nábut džinása i nábut angilphenasa:

10a kiéli dová, so isyn bidošakiro javéla, tedy kodová, so isyn nábut, pirijačéla te javél.

11Kiéli me sómas bijáto, me rakirdjom syr bijáto, me dumindjom péske syr bijáto, me ĥaljovavas syr bijáto; kiéli me jacjom baré manušésa, me butýr na som bijáto ni dro so.

12Pal-dová so ame kakaná dykhasa sýrby pir nálačho gindalo, a tedy ame javása te dykhas muj ke muj; kakaná me džinóm nábut, tedy me javáva te džináv adákicy, pe kicý Raj Devél džinéla man.

13Kakaná jačénape trin čačipená: patiaibén, lačhó užakiribén, pšalýtko patýv (láska); i pšalýtko patýv isyn naj baredýr saréstyr.

← Chapter 12 Jump to: Chapter 14 →