1 Corinthians 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Tedy mek manušá te ĥaljon amen syr Xristosóskire dynar'jén i kheritkoné barydyrén pir Devléskire čorahane čačipená.

2Jekh so trej vaš kheritkoné barydyréske, sob (kaj) jov te javél patiaibnýtko pir saró.

3A vaš mánge davá isyn nabaró réndo, syr tumé déna čol (timín) mánge, ci manušýtko séndo déla. Ne me adiáke-pac' na davá čol péske.

4Pal-dová so ni savó čoripén nane pal mánde; ne davá na dophenéla, so me na som bangó: davá Raj Devél, Savó déla čol mánge.

5Tedy na sendiakiren angíl dová, syr Raj Devél javéla, Savó dudvaliakirela (obsvencynela) i kalé (cjomna) čorahanybena i otkerela pe jakhá adiáke-pac' ĥaradé mysli dro manušýtko iló; i tedy sváko (kažno) manúš doreséla (dolela) šaribén Devléstyr.

6Ĥáda, davá saró, otlydžalape ke me i ke Apoloso vaš tumaró mištypén, sob (kaj) tumé te sykljon améndyr te na duminen vučydyr kodolestyr, so isyn čhindló, i te na phutjon jekh angíl jekhéste.

7Paldavá, kon ža vykedéla tut javirendyr? I so isyn túte, so na sys dynó túke? Tedy sóske tu šaresape, sýrby tu na dorescian (na dolyjan) davá syr taláno?

8Tumé uže čalyne, tumé akaná jačné barvalé, tumé uže jačné kral'jenca bi amaró; i me kamám, sob (kaj) tumé čačunés te kralinen, i aménge adiáke-pac' te kralinav tuménca.

9Paldavá me duminava, so Devél čhudiá amen te javas Apostolenca pe sámo kónco (jagóro) palatunendyr, savén Jov vykedyjá te meras, syr i Xristóso myjá. Paldavá ame jaciám sýrby ladžakirdó sykaibén (primiéro) pe svetóskire jakhá i Jangolenge, adiáke-pac' i manušénge.

10Ame sam dylyné pal Xristosóste, a tumé san god'varé dro jekhipén Xristosósa; ame sam bizorjákire, a tumé san zoralé; tumen slavinena, a ame sam dre ladž.

11Ke davá-pac' mardó (štúnda) me iščo (inké) sam bokhalé i aménde isyn smega (truš) i ame sam dre patave i domardé, i ame psirasa syr bikherítka,

12ne ame kerása butý pharés péskire vasténca. Amen košena, a ame bahtiakirasa; amen tradéna, a ame pirilydžasa;

13amen košena, a ame otphenasa lačhé lavénca, ame sam syr dalé-svetoskiro gnejo (mesta), ame jaciám syr bláta dalé phuvjákiri ke/žýko kakaná.

14Me na čhináva davá, sob (kaj) te ladžakirav tumen, a sob (kaj) te dav godý tuménge, syr miré drogoné pšalénge.

15Paldavá, kóli tuménde isyn deš tysjoncy sykliar'jen (nastavniken) pir patiaibén dre Xristosóste, ne usajékh tuménde isyn jekh dad; pal-dová so me jacjom sýrby dad vaš tuménge pir bahtaló lav, so me jandjom.

16Paldavá me mangáva tumen, te kerén adiáke, syr me keráva.

17Pal-dová me bičhadjom ke tumé Timofiejos (Ximas), miré drogoné i patiaibnytkone sýrby čhavés pir patiaibén dre Raste-Devléste, savó dolydžala ke tumarí godý miro džiibén dro jekhipén Xristosósa, adiáke syr me i sykliakirava dre khangirja.

18I pal-dová so me kakaná na džáva ke tumé, to vari-savé tuméndyr phutine.

19Ne me syg javáva ke tumé, kóli Raj Devél déla, i me udžinava vaš péske na dová, so adalé phut'kirdé manušá rakiréna, a Duhoskiri zor, saví isyn lénde.

20Pal-dová so Devléskiro Kralipén rikirélape na lavénca, a Duhóskire zorjása.

21So ž tedy tumé kaména? Ci mánge te javav ke tumé destesa ci laskasa i tihone Duhósa?

← Chapter 3 Jump to: Chapter 5 →