1 Corinthians 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1Isyn mavlýn (malva), so maškír tuménde isyn biladžaipén i dasavo biladžaipén, savó až na sys džindló maškír Najudénde, so jekh manúš rikiréla léskire-dadéskire romniá pal romniáte.

2I tumé iščo (inké) phutjona, zamiést dová, sob (kaj) te rovén pal davá, i sob (kaj) te džal krig tuméndyr odová manúš, kon kerdiá dasavo réndo (diélo).

3Mek me na som tuménca, ne me sýrby duminava pal tuménde i pridumindjom xas' (kára) odoléske, kon kerdiá dasavo réndo,

4vaš Ráskire-Devléskiro lav, kiéli tumé skedénape khetané dre khangirí i sýrby pir miro dúho (fáno) i Ráskire-Devléskire zorjása amaré Isusóskire Xristososkirjasa,

5te otdén adasavé manušés nalačheske te menčynel les léskiri loč (plot'), saví isyn dro grého, sob (kaj) te zrakhen léskiro dúho (fáno) dro Ráskire-Devléskiro dyvés, amaré Isusóskiro Xristosóskiro.

6Davá isyn našukar, so tumé šarenape. Ci tumena džinéna, so tykné roščynatyr šutljola saró xumer (ciasto)?

7Paldavá vyžužakiren phurané-grehoskiri roščyna, sob (kaj) tumé te javén nevoné xumeresa, pal-dová so tumé ž san žužó xumer, bi roščynakiro, pal-dová so amaró Xristóso, Patraditko Bakroró, sys muliakirdo syr svénto dyibén pal aménde.

8Paldavá javása te svenkinas svénko na phurané roščynasa, savé sys pherdý grehosa i pies'cjonymasa, a bi roščynakire marésa, savó isyn pherdó žužypnasa (čystotasa) i čačipnása.

9Me čhindjom tuménge dro miro lyl, sob (kaj) tuménde te na javél nisó khetané manušénca, savé dživéna džuvliénca bi sevlakiro.

10Ne na napatiaibnaskirenca, savé isyn svetóstyr, i, savé dživéna džuvliénca bi sevlakiro, ci skvamnymar'jenca ci prahar'jenca, ci idole-mangipnaskirenca, pal-dová so tuménge treindiá te džán dalé svetóstyr.

11Ne kakaná me čhindjom tuménge te na kerén nisó khetané odolé manušésa, savó kharélape pšalesa, a kokoró duredýr dživéla džuvliénca bi sevlakiro, ci jačélape skvamnymarisa, ci idole-mangipnaskiresa, ci košybnarisa, ci matymarisa, ci praharisa; kadasavesa i te na bešén te xan khetané.

12So ž mánge te sendinav (te sendiakirav) odolén, savé nane khangirjátyr? Ci na trej tuménge te sendinén, savé isyn khangirjátyr?

13Ne odolén, savé isyn na khangirjátyr, Devél sendiakiréla! Paldavá tradén krig tumaré khangirjákire skedyibnástyr došale manušés.

← Chapter 4 Jump to: Chapter 6 →