1 Peter 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Tedy mekén kažno xolý, frentyma, dujemuitkima, zevlynypén i kažna xohané lavá,

2a javén tumé sýrby bijaty, savé féni so bijándyne, i tumé tyrdenpe ke lavitko thud (Devléskiro lav), sob (kaj) te čaliakirenpe lésa i te barjon ke zrakhibén,

3pal-dová so tumé udžindlé, so Devél isyn lačhó.

4Javén pašyledýr ke Jov, Savó isyn sýrby džidó bar, Saves manušá na prilyné, a Saves Devél vykedyjá syr Drogones Léske,

5i kokoré tumé, savé san sýrby džidé bará, kerén péstyr duhovno kher te mangélpe Devléske, sob (kaj) tumé te javén svénta rašaja, sob (kaj) te janén svénto dyibén, savéske javéla rado Devél pir Isusóste Xristosóste.

6Paldavá isyn phendló dro Svénto Čhinybén: “Ĥáda, me čhuváva venglytko bar pe Sióno, Savó Me vykedyjom i Jov isyn drógo Mánge: odová manúš, savó javéla te patial dre Léste, na javéla te ladžal:

7i adiáke Jov isyn drógo vaš tuménge, kon patiála, a vaš odolénge, kon na patiála, Jov isyn bar, savó butiarné na prilyné, ne savó jaciá šeralé baresa, pal savó manušá obštavenape i peréna;

8pal savó manušá obštavenape, pal-dová so jone na kandéna Devléskiro lav, pal-dová so adiáke lénge sys zadumindlo.

9Ne tumé san vykedyné bijanypnastyr, kralitka rašaja, svénta manušá Devléskire mištypnástyr, sob (kaj) te vyphenen lačhipén pal Léste, Savó khardiá tumen kalypnástyr dro divno Léskiro dud (svéto);

10tumen, savé na sys Léskire manušá, a kakaná tumé jačné Léskire manušénca, ĥaredyr tumen na tangindle (na žalindle), akaná isyn Devléskiro tangipén ke tumé.

11Dróga miré! Me drieván mangáva tumen, syr manušén, savé naĥara javné pe daja phuv i savé lodena pir davá svéto: durjon tumaré ločakire kamibnastyr, savó isyn proti tumaró di;

12i dživén pir čačipén maškír Najudénde, sob (kaj) odolé, kon rakiréla čoripén pe tuménde, so tumé san fuj, te dykhén tumaré lačhé réndy i te slavinén Devlés, kiéli Jov javéla.

13Kandén kažnoné ran manušéndyr vaš Ráske-Devléske: ci kralís syr naj upratunedyr zorjake,

14ci balunitkones (pravitieljos), savés králi bičhadiá te čhuvél kára pe odolé manušénde, savé keréna fuipén, i te šarén odolén, savé keréna lačhipén.

15Pal-dová so pe davá isyn Devléskiri vólia, sob (kaj) te kerás lačhipén i pir davá te javén štyl uštá dylyné manušéngire, kiéli jone javénas te rakirén grehítka lavá.

16Dživén syr vol'na manušá; ne te na javél daja vólia vaš dová, sob (kaj) te priučhakiren grého, a dživén syr Devléskire pishárja.

17Den patýv sarénge, sykavén patýv pšalénge i phenén pir patiaibén dre Devléste, darén Devléstyr i kutiakiren kralís.

18Dynarjále, kandén i darén péskire xulandyr, na so jekhe lačhen i kovlé-ilytkonen, ne adiáke-pac' i kodolén, savé biilytkes (šylales) otlydžanape ke tumé.

19Pal-dová so davá isyn lačhó Devléske, kóli vari-kon pir péskiri patýv vaš Devléske piridživela mén'ki, pharipén na pir čačipén.

20Pal-dová so, pal so te šaras tumen ke sláva, kóli tumé menčynenape, kiéli tumen marena pal tumaré gréhi? A kiéli tumé keréna lačhipén i stradynena pal davá, tedy tuménge javéla bahtiakiribén Devléstyr.

21Pal-dová so tumé sánas khardé vaš davá, pal-dová so i Xristóso adiáke-pac' stradyndia pal tuménde, Jov jačkirdiá sykaibén (primiéro) aménge, syr trej te kerás, sob (kaj) ame te džas pir Léskiri špéra (sliado):

22“Jov na kerdiá nisavó grého, i na sys nisavó xohaibén dre Léskire lavá”,

23pe Léste rakirdé fuipén, ne Jov ni pe konéste na phendiá fuj lav, i kiéli Jov stradynelas, Jov na strahakirdia vari-konés, a Jov saró dopatiakirdia Kodoléske, Kon isyn Čačunó Sendári;

24Hristóso Kokoró Péskire Masenca ĥazdyjá amaré gréhi pe trušúl, sob (kaj) ame te javas mulé vaš grého i te dživás pir čačipén: Léskire fránsy (rany) vysastiakirde tumen.

25Pal-dová so tumé sánas xasibnýtka bakré, savé blendynenas, ne kakaná tumé risiné ke tumaró Čhupnári (Pastyrjo) i ke Khangirjákiro Dykhibnaskiro (Bliustitieljo), Savó rakhéla tumaró di.

← Chapter 1 Jump to: Chapter 3 →