1 Peter 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to:

1Me, kokoró som godephuró i pastyrjo (čhupnári), mangáva tumaré khangirjákire godephuren i pastyrien, pal-dová so me som jakhítko, syr Xristóso pirilydžija pharipén, adiáke-pac' mánde isyn paš dre sláva, saví javéla sykady:

2rakhén Devléskire manušén, savé isyn maškír tuménde, kerén davá na pir trébima, a syr trej Devléske i na pal dová, so tumé sorby san bokhalé ke lové, a pal-dová so tumé kaména davá iléstyr;

3i na xulainen pe odolé manušénde, savén Devél dopatiandyja tuménge, a sykavén pes lačhé rigátyr.

4I kiéli javéla Sámo Baredýr Pastyrjo (Čhupnári), Xristóso, tedy tumé doreséna slavakiri koróna, saví javéla te ziainel viéčnes.

5Adiáke-pac', terné manušále, kandén péskire godephuren, javén kovlé-ilýtka jekh ke jekh, na šarén pes jekh angíl javiréste, pal-dová so Devél isyn proti odolénde, kon ginéla pes vučedýr javirendyr, a odolénge, kon na šarela pes, Jov déla vast.

6Kandén i bandjon tel zoraló Devléskiro vast, sob (kaj) Jov te ĥazdel vučés tumen dro Péskiro časo;

7čhuvén upré saré péskire pharé dúmy pe Léste, pal-dová so Jov dykhéla pal tuménde.

8Javén triezva (nýrna), rakhénpe. Tumaro vérgo, nálačho, psiréla syr ščer (liévo), savó rykinela i rodéla, konés te xal.

9Terdjon proti léste zoralé patiaibnása, džinén, so adiáke-pac' piristradyndle tumaré pšála, savé dživéna pir svéto.

10Ne Devél, Savó bahtiakiréla, i Savó khardiá tumen dre viečna Péskiri sláva, kóli tuménge i prijavelape nabaró časo te stradynel, Jov Kokoró keréla tumen zoraledýr i déla zor, sob (kaj) tumé te na kuninenpe dro péskiro patiaibén;

11mek te javél Léske sláva i zor pe saré viéki. Amín'.

12Me čhindjom davá nabaró lyl tuménge pir Siluanoste, savó isyn čačunó tumaró pšal, syr me duminava, sob (kaj) te podrikirav tumen, ripiri te dophenav, so davá isyn čačunó Devléskiro bahtiakiribén, dro savó tumé zoralés san terdé.

13Piridela “paklono” tuménge khangirí, so isyn dro Vavilóno, Saví vykedyjá Devél, adiáke-pac', syr tumen. Adiáke-pac' piridela “paklono” miro čhavó Marko.

14Piridén “paklono” i čamuden jekh jekhés Xristosóskire laskasa. Mek te javél ramánjo (miro) tuménge sarénge, savé isyn Xristosóskire. Amín'.

← Chapter 4 Jump to: