1 Peter 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Adiáke-pac' i džuvliále, kandén péskire romen, so kóli vari-kon léndyr na patiála Devléskire lavéske, tedy tumé péskire džiibnasa sýrby pirikerena len, so jone bi laveskiro javéna te patián Devléske,

2i kiéli romá javéna te dykhén tumaró devlýtko džiibén, i dová, so tumé déna patýv lénge i darén Devléstyr;

3mek te javél tumaró šukaripén na dro balengiro zakhuviben i na dro suvnakái, so isyn pe tuménde i na dro barvaló uribén;

4a mek te javél tumaró šukaripén dro tumaró iló, savó isyn nadyc'lo (nabicialo), péskire štyloné i kovlé-iléskire šukaribnása, savó na kirnjola i isyn drieván šukár angíl Devléste.

5Pal-dová so adiáke-pac' vari-kiéli i svénta džuvliá, savénde sys nadiéia pe Devléste, šukár prikedenas pes, ne angledýr saréstyr jone kandenas péskire romen;

6adiáke-pac' i Sara kandelas Avraamos i khardiá les péskire xulása, a tumé ž san lákire čhaja, kóli tumé keréna lačhipén, tedy tumé na darén nisave trašaibnastyr.

7Adiáke-pac' i tumé, muršale, dživén i ĥaljon péskire romnien, pal-dová so džuvliende isyn tyknedýr zor i otlydžanpe adiáke ke jone, syr ke bizorjákire, kutiakirén (uvažynen) len, pal-dová so jone léna paš dro viéčno džiibén Devléstyr, syr i tumé. Kerén adiáke, tedy ni saví vánta (sciana) na javéla pe drom tuménde te mangénpe Devléske.

8Javén dre jekh godý jekh jekhésa, poden vastá jekh jekhéske dro pharipén, tanginén (žalinen) jekh jekhés, syr pšála, malynenpe (družynen) i javén kovlé-ilýtka,

9na otdén pale fuipnasa pal fuipén, ci fuj rakiribnasa pal dová, so rakiréna fuipén pe tuménde: a pe javír mangénpe Devléske, pal-dová so tumé sánas khardé, sob (kaj) te doresen Devléskiro bahtiakiribén.

10Paldová so: “Konéske isyn drógo džiibén i te dykhél lačhé dyvesá, odová manúš mek te obrikirel péskiri čib fujé lavéndyr i péskire uštá xohané lavéndyr,

11mek jov te rakhél pes te kerél fuipén, a mek jov te kerél lačhipén; mek jov te rodél ramánjo (miro) i te pričhuvel zor te lathel les;

12pal-dová so Devél dykhéla čačuné manušén i šunéla léngiro mangipén Léske; ne Devél isyn proti odolénde, kon keréla fuipén.”

13I kon dukhavela tumen, kóli tumaró iló xačola te kerén lačhipén?

14Ne kóli tumé zlydžana pharipén pal čačipén, tedy tumé san bahtalé, na darén, mek nisó te na trašakirel tumen;

15a rikirén dro iló Xristosós syr Sventyma i den patýv Léske, syr Ráske-Devléske dre tumaré ile, usády / sak (vsiegda) javén skedyné te zaterdjon lavésa, kiéli vari-kon javéla te phučel tuméndyr pal tumarí nadiéia, ne kerén davá kovlé ilésa i darása;

16te javél tuménde lačhí patýv, sob (kaj) odolé manušá, savé rakiréna proti tuménde, te javén ladžakirdé, kiéli jone našukar otlydžanape ke tumé pal tumaró lačhó džiibén dre Xristosóste.

17Pal-dová so, kóli pe davá isyn Devléskiri vólia, fedýr te lydžas pharipén pal lačhipén, syr pal dová, kiéli ame kerása fuipén;

18pal-dová so i Xristóso, sob (kaj) te janel amen ke Devél, jékhvar myjá pal amaré gréhi, čačunó pal načačunende, Léskire Masá sys otdyné pe meribén, a Léskiro Dúho (Fáno) sys riskirdo ke džiibén;

19kadalé Duhósa Xristóso gijá i phendiá lav odolé duhenge, savé sys dro štaribén;

20savé vari-kiéli na kandyné Devlés, i savén Devél vyrikiribnasa užakirdia saró davá časo, paka Nojo kerélas kovčego (mohtó), dro savó zaginé nábut manušá, ohtodžine (bidujéngiro deš), savé zrakhnepe paniéstyr:

21davá paní isyn sýrby kopija doléske, kiéli ame bolasape i so zrakhéla amen. Davá nane melalé-ločákiro obmoriben, a tumé déna lav lačhé patyvása Devléske pir Isusóskire-Xristosóskiro otdžidyipen,

22Savó ĥazdyjápe dro Bolybnáskiro Rajo i isyn pir čačó vast Devléstyr, i Léske dynarinena saré Jangóly, Léste isyn saré pravy i saré zorja.

← Chapter 2 Jump to: Chapter 4 →