2 Timothy 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Pavlístyr, Isusóskire Xristosóskire Apostolostyr, savés Devél vykedyjá pir Péskiri vólia te rosphenel pal phendló džiibén dro jekhipén Isusósa Xristosósa.

2Himaske, miré drogoné čhavéske: mek te javél bahtalypén, tangipén, ramánjo Devléstyr Dadéstyr i amarestyr Rástyr-Devléstyr, Isusóstyr Xristosostyr.

3Me parikirava Devléske, Savéske me dynarinava (služynava) adiáke, syr davá kerdé i miré-dadengíre dadá saré žužé patyvása, paldavá me ripirava pal túte dro miro mangipén Devléske ratý i dyvesé,

4drieván kami te dykháv tut i me ripirava tyré jasva, sob (kaj) mánge te javél daléstyr bari rádyma;

5me ripirava pal tyró čačunó patiaibén; adiáke patiandyja tyré-dakiri daj Loida i tyrí daj Jevnika, me džinóm, so dasavo patiaibén isyn adiáke-pac' i dre túte.

6Pir daja pričyna me phenáva túke te ripires i te rikires dre péste Devléskiro taláno, savó túke dyjá Devél, kiéli me čhudjom upré vastá pe túte.

7Pal-dová so Devél dyjá aménge dúho (fáno) te na daras, a sob (kaj) te zoraljovas, i patýv ke javír manušá, i godý.

8I paldavá na ladža te dophenes pal amaré Raste-Devléste, ni mándyr, so me som dro štaribén pal Léste, ne jav khetané mánca dre mén'ki pal bahtalý zan, pal-dová so Devél dyjá zor pe davá,

9Jov, Savó zrakhciá i khardiá amen ke svénto džiibén na pir amaré réndy, a pir Péskiri duma i bahtalypén, savó sys dynó aménge pir Isusóste Xristosóste angíl, syr svéto jaciá,

10Savó sykadiá pes kakaná aménge pir davá bahtalypén, syr javdiá pe phuv amaró Zrakhibnari, Isúso Xristóso, Savó xasiakirdiá meribén i otčhakirdiá dud (svéto) i dyjá viéčno džiibén pir bahtalý zan (zvies');

11vaš saví Devél čhudiá man te javav Apostolosa i sykliakiribnaskiresa te rosphenav bahtalý zan vaš Najudénge.

12Pal davá me i menčynavape kakaná adiáke; ne me na ladžava daléstyr, pal-dová so me džinóm dre Konéste me upatiandyjom i me zoralés (tvardes) džinóm, so Jov moginéla te zrakhél dová, so jov mánge dopatiandyja angíl dová Dyvés, kiéli Jov javéla.

13Rikir syr primiéro (sykaibén) čačuné lavá, savénge me sykliakirdjom tut, vykedyibnasa i patiaibnása dro jekhipén Isusósa Xristosósa.

14Rakh dová kučipén, savó dopatiandyja túke Svénto Dúho (Fáno), Savó dživéla dre aménde.

15Tu džinésa, so saré manušá Asijatyr mekné man, i khetané lénca Figielo i Jermagieno.

16Mek Raj Devél te tanginél Anisiforoskiro kher, pal-dová so jov but móly prilelas man, i na ladžalas, so me som dro štaribén;

17a kiéli jov sys ke Rimo, odój drieván rodyja man i lathiá man;

18mek Raj Devél te tanginél les dro Péskiro Dyvés, syr Jov javéla; tu fedýr džinésa, ci but jov dynarindiá mánge dro Jefieso.

Jump to: Chapter 2 →