Nahum 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Angilphenybén proti Ninievija. Lylvarí pal Naumoskiro dykhibén, savó sys Jelkosostyr.

2O Raj-Devél isyn zevlynypnaskiro Devél, i Jov otdéla pale sendosa. Raj Devél otdéla pale sendosa, i Jov isyn drieván darano dre xolý. Raj Devél otdéla pale sendosa Léskire namalenge, i Jov na potanginela Leskirire vergén [prigaravela Léskiri bari xolyn pe Léskire vergénde-ju.o.].

3Raj Devél nasyges xoliasóla (ĥará / dlúges užakiréla) i Léste isyn baró zoralypén. I Jov na kovliakirela iló angíl bibahtalende: syr o Raj Devél psiréla, tedy ĥazdénape riskiribnaskiri balvál i štormo, i óbloki syr práho vurniana tel Léskire ĥerá.

4Jov štyliakirela mórjo (derjáv) i šut'kirela les, i Jov pirišut'kirela saré réki (leniá): Vasáno i Karmilo zašutjona i luludí (cvéto) pe Liváno našavela mastín (cviato).

5Bérgi izdrana angíl Léste, i bérgicy biladjona; phuv kuninelape angíl Léskiro javiben [muj-r.s.]; svéto, i saró, so dživéla pe svéto.

6Kon déla ráda te terdjol štylés, kiéli Raj Devél zoralés xoliasóla? Kon déla ráda te vyrikirel mižehipen Léskire xoliátyr? Léskiro xoliakiribén vyčhuvelape syr jag, i skaly (bérgi) pharadjona pe koterá angíl Léste.

7O Raj Devél isyn lačhó, i sýrby kher te garadjol, syr isyn pharó manušéske: Jov džinéla kodolén, savé dopatiana Léske.

8Ne baré-tasadypnaskire panienca, savé isyn syr potopo, Jov janéla xasibén ke kónco (ke jagóro) dalé štetoske Ninievijake, i kalypén učhakiréla Léskire vergén.

9So tumé priduminena proti Raste-Devléste? Jov xasiakiréla tumen sarésa, pharipén na javéla javír mólo.

10Na dykhí pe dová, so tumé spentyndlepe khetané syr phusadytka xrústy, i spinepe syr matymarja, tumé javéna te xačon syr phuseskiri cieciva (šuko phus).

11Tútyr vygijá odová manúš, savó priduminela bibáht (xolý) proti Raste-Devléste, jov javéla sovietniko (junkáro), savó déla godý te kerél fuipén.

12Adiáke rakiréla Raj-Deviel Judejake: “Na dykhí pe dová, so jone, Asirijákire xaladé, isyn bidaripnaskire i isyn but len, saroiekh, len čingirena pe koterá, i jone xasjona. Syr Me pritasavavas tut, to butýr Me na javáva te keráv davá túke.

13Akaná Me phagirava ĥámo tyré meniatyr, so jone čhudé pe túte, i Me pharavava (roskušava) tyré sastyrá pe pašá.”

14O Raj Devél dyjá priphenybén pal túte, Asuro: “Butýr na javéla ródo tyré lavésa; Me xasiakiráva vyčhindlé muiá kheréstyr, kaj isyn tyré devloré, i tyré vyčhudé muiá. Me ĥanavava túke maĥila (kula), pal-dová so tu san bedo?’

15Ake, dykhén kodoleskire piré (stópy) pe bérga, savó phenéla bahtalý zvies' (zan), savó rakiréla zoralés pal ramánjo (miro)! “O Judeije! Ker svenkitka skaminda, vypherdiakiren péskire sovlahá, pal-dová so butýr nijékh fuj manúš na prodžála pir túte: jov isyn sarésa xasiakirdo.”

Jump to: Chapter 2 →