Nahum 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Muliakiribnaskiro džála pe túte, Ninievije! Rakh foróskire zorjakirde vánty! Dykhén ciamkes paló drom, zorjakiren tumaré flangi! Skedén butedýr tumarí zor!

2Pal-davá so Raj Devél čhuvéla dro zor nevéstyr baripén Jakovóskiro, syr baripén Izrailjoskiro, pal-dová so vérgi jačkirdé čhučé štéty lénde, i jone xasiakirdé dre ruíny léngire vinagradýtka randiá.

3Ščyty Léskire zoralé-muršengire isyn lolé, Léskire bidaripnaskire muršá (xaladé) isyn dro jarko loló uribén, a maribnýtka vurdená javéna ziaindle sastyrenca dro dová dyvés, kiéli saré skedénape pe maribén, i čhurdybnytka bustiá (kop'i) kuninenape.

4Maribnýtka vurdená vurniana godlása pir gásy [foruný/plóšča-r.s.], jone špulena jekh jekhés i kharenape jekh angíl javiréste pe buĥle dromá: jone ziainena i otmarnape jagása, jone prastána sýges syr bliskavica.

5Léngiro barydyró kharéla ke pe léskire vykedyné muršén, jone obštavenape, gii pir drom; jone prastána sýges pe foróskire vánty, i jone jačné skedyné te otmarenpe.

6Pórta pe réki (leniá) otphandelape, i bari felatin/kolov (dvorco) rosphadjola.

7I isyn kadasavó uphenybén: čúža xaladé rosčhuvena králica i lydžána la dro pliéno. Lákire-štubakire pisharicy javéna te tuginen zoralés pal láte golumbicengire zanor'jenca, marindoj (pekavi) pes dro kolýn.

8Ninievija sys syr venderín (prudo) paniésa samone pervoné dyveséndyr, ne akaná, manušá našéna foróstyr. “Terdjon, terdjon!” – vari-savé godlena, ne nijékh (nikón) na risjola pale.

9‘Čoren rup! Čoren suvnakái! Nane miéra mištypnaske i barvalypnaske dro kažno vučy pirí!

10Látyr jaciá čhučó štéto i xasiakirdo štéto; iló biladjola i čangá izdrana; zoralý dukh isyn dro kažno pašvaro, i muiá sarénde kalyne.

11Kaj isyn akaná xašča (logovo) ščerengiro, i terné-ščerengiro čaraibnytko štéto; pir savó psirdé ščer, ščerica, i ščeroro, i nikón na trašavelas len?

12Ščer (liévo) kuscia pe koterá, kicý trej mas vaš léskire ščerorende, i, tasadia vaš péskire ščericate. Jov pherdiakirdiá ĥiebará (pieščery) masesa dre dandá, i léskire xaščy (logovy) džidé masesa.

13“Ake, Me džáva proti túte, Ninievije!”, – rakiréla jangoléngire-bolybnáskiro Raj Devél. “Me xačkirava tyré maribnýtka vurdená dro thuv, i kurtála počingirela tyré terné ščeren; Me čhuváva kónco (jagóro) pe tyró doresybén pe phuv, i butýr na javéla šundly zan tyré-bičhaibnaskirendyr.”

← Chapter 1 Jump to: Chapter 3 →