Nahum 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to:

1Bida pe ratvalo fóro! Jov isyn pherdó xohaibnasa i čoribnasa, dro savó na pirijačena te čoren.

2Šunelape zoralés, syr marela čhupny, i čhinela kan, syr róty prastána (griukinena), syr uklisté graja grymitynena, syr maribnýtka vurdená poduhtena!

3Uklistengire xaladé sýges vurniana ziaindle kurtalenca, maribnýtka bustiá otmarnape ziaindle kurtalenca; but isyn zamardé, but but isyn mulé trúpy, so naštý te pogines: – jone obštavenape pir trúpy.

4Davá pal biladžakuné-džuvliakire but gréhi, saví isyn xulany pe čovahano džinybén; saví zdelas nácyi pal péskiro biladžaipén, i kherítka ródy i pal lákiro čovahano džinybén.

5“Ake, Me som proti túte”, – rakiréla jangoléngire-bolybnáskiro Raj Devél: “Me ĥazdáva tyrí podia pe tyró muj, Me sykaváva nacyienge tyró nangipén, i kralipnenge tyrí ladž.

6I Me javáva te čhurdav te prijačel ke tu džungaly mel, Me keráva tut adiáke, so tu jačesa bedytko, i Me čhuváva tut pe saben sarénge.

7I javéla adiáke, so kažno (sváko) manúš, kon javéla te dykhél tut, javéla te našél tútyr, i te rakirél: ‘Ninievíia isyn pašty čhučí! Kon ža javéla te tanginél jasvénca la? Kaj te lathav manušén te podrikiren dúho dre túte, Ninievíje?”

8Ci tu fedýr san No-Amonostyr, savó sys maškír réki (leniá) pašýl Nilo, pašýl savó thadenas paniá, saveskiro valo isys syr mórjo (derjáv), i mórjo (derjáv) sys syr vánta trusciál davá fóro?

9Efiopija i Jegípto sys da bimierakiro foróskiro zoralypén, Kopty i Liviicy sys léskire pomogipnaskire.

10Ne les lydžiné krig, i jov gijá dro pliéno, léskire bijatén adiáke-pac' rozmarde pe koterá pe trušulytka ĥasy (vulícy). Jone, Asiriicy, čhurdyné žriébijo pal léskire manušénde, savé sys dre patýv i saré léskire baré raja sys phandle zandir'jenca.

11Tu adiáke-pac' javésa maty, garadjosa, tu adiáke-pac' javésa te rodes garadyiben vergostyr.

12Saré foróskire rikiribena isyn sýrby inžyritka kaštá (drevy) spialone inžyrosa: kóli trinskiresa len, tedy jone peréna dro muj odoleskiro, kon kaméla te xal len.

13Dykhén! Maškir tyré xaladénde isyn muršá syr džuvliá: pórta pe tyré phuvjá psirady buĥles angíl vergénde: jag pohala štaby pe tyrí pórta.

14Pher paní vaš občhuviben foróskiro! Zorjakir tyré foróskire rikiribena! Džá pal ĥleja (glina), i štakir rastvoro, podker bov te obhačkiren bará!

15Odój jag pohala tut, a kurtála čingirela tut; joj xasiakiréla (xála) tut sýrby skočko. Na dykhí pe dová, so te jačen tumé butedýr-adákicy but, syr listengire kirme; te jačen tumé butedýr-adákicy but, syr phakitka skočki (saranča)!

16Túte jaciá butedýr tylgar'jen syr čergeniá pe bolybén ne dalé syr phakitka skočki (saranča): rozvurnianape i vurniana krig.

17Tyré thagárja isyn syr phakitka skočki, tyré xaladéngire barydyrá isyn syr grastore (kuzniečyki), savé keréna gniázdy (kúfy) dre vantakire ščeli, a syr kham ĥazdélape, to jone vurniana péske krig, i na džindló štéto, kaj sys jone.

18Tyré čhupnárja (pastyri) isyn suté, králjo Asirijákiro, a tyré lačhé-rodoskire raja (upratune) otkhinjona štylés. Tyré manušá rosčhurdyne te dživén pe bérgi, i nijékh na skedéla len.

19Tyró fránso (rana) naštý te sastiakires, tyré-masengire fuiá (jazvy) isyn xor. Saré, kon šunéla daja zvies' pal túte, javéna te marén dre vastá radymátyr; pal-dová so nane nijékh manúš, konés tyró fuipén te obdžal rigasa.

← Chapter 2 Jump to: