Ruth 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Dre dolé dyvesá, kiéli xulaindle sendárja, jaciá bokh pe phuv. I gijá jekh manúš Judejákire Viflieimostyr, péskire romniása i péskire duje čhavénca te dživél pe Moavitoskire féldy.

2Lav odolé-Manušéskiro sys Jelimielieho, lav léskire romniakiro sys Noemin', a lav léskire dujengire čhavéngiro sys Mahlono i Xilieono; jone sys Jefrafiani Judejákire Vifliejemostyr. I javné jone pe Moavitoskire féldy, i jačnépe odój.

3I myjá Jelimieho, Noeminjakiro rom, i jaciápe joj duje peskirenca čhavénca.

4Jone lyné péske džuvlién Moavitiankendyr, jekhakiro lav sys e Orfa, a javirjakiro lav sys Ruf' (Rutá), i dživdé odój pašýl deš berš.

5Ne korigedýr (poslie) i duj lákire čhavé, Mahlono i Xilieono, myné, i jaciápe doiá džuvlý bi péskire duje-čhavéngiro i bi péskire-romeskiro.

6I uštyjá joj péskire bor'jenca, i gijá pale Moavitóskire feldendyr, pal-dová so joj šundiá pe Moavitóskire féldy so Devél porisija ke Péskire manušá i dyjá lénge maró.

7I vygijá joj dolé štetóstyr, pe savó dživdiá, i duj borja lákire lása. Kiéli jone giné pir drom, risjovi pe Judejakiri phuv,

8to Noemin' phendiá dujenge péskire bor'jenge: “Džán, risjon kažno dre péskire-dákiro kher; mek te kerél Raj Devél tuménca tangipén, syr tumé obginepe mulenca i mánca!

9Mek te del tuménge Raj Devél, sob tumé te lathén džiibén kažno dre péskire-romeskiro kher!” I čamudia len. Ne jone ĥazdyné gódla i rondlé

10i phendlé: “Nad, ame túsa risjovasa ke tyré manušá.”

11Noemin' phendiá: “Risjon, miré čhajale; pal so tuménge te džán mánca? Naúšto butýr isyn mánde čhavé dre miré masá, savé te javén by tuménge romenca?

12Risjon, miré čhajale, džán, pal-dová so me som phuri, sob (kaj) te javav paloróm. Mek, kóli b me i phendjom: ‘Isyn mánge butýr nadiéia”, i usajékh, kóli by me daja-pac' rat te javav romesa i korigedýr (pozže) te bijanav čhavén, –

13tedy ci saštý tuménge te užakiren, paka jone vybarjona? Ci saštý tuménge te tyrden i te na vydžán paloróm? Nad, miré čhajale, me drieván piridživava pal tuménde, pal-dová so Ráskire-Devléskiro vast lathiá man.”

14Jone ĥazdyné gódla i nevéstyr lyné te rovén. I Orfa roziaciape péskire sasiasa, a Ruta jaciápe lása.

15Noemin' phendiá Rutake: “Ĥáda, tyrí bori risijá ke péskire manušá i ke péskire develá; risjov i tu palál pal tyré borjate.”

16Ne Ruta phendiá: “Na začhuv man te jačkirav tut i te risjovav tútyr; ne karik tu džása, odorík i me džáva, i kaj tu javésa te dživés, odój i me javáva te dživáv; tyré manušá javéna miré manušénca, i tyró Devél – miré Devlésa;

17i kaj tu merésa, odój i me meráva i javáva garady; mek dová i dová te kerél mánge Raj Devél, i iščo (inké) butýr keréla; jekh meribén man roziačkirela túsa.”

18Noemin', dykhí, so joj drieván skedyjape te džal lása, pirijaciá te urakirel la.

19I giné jone dujdžiné, paka javné dro Vifliejémo. Kiéli jone javné dro Vifliejémo, saró fóro zarakirdia pal lénde, i rakirdé: “Ake, Noemin'?”

20Joj phendiá lénge: “Na kharén man Noeminjasa, a kharén man Marasa, pal-dová so Sarezorjakire bičhadiá mánge baró kirkipen;

21me vygijom adathýr barvalypnasa, a riskirdiá man Raj Devél čhučé vasténca. Sóske te kharén man Noeminjasa, kiéli Raj Devél začhudia man te stradynav, i Sarezorjákiro bičhadiá mánge bída?”

22I risijá Noemin', i lása lákiri bori Ruta Moavitianka, saví javdiá Moavitóskire feldendyr, i javné jone dro Vifliejémo pe kónco (jagóro) dro giveskiro ukedyiben.

Jump to: Chapter 2 →