Ruth 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Noeminjate sys seménca pir lákire romeste, manúš drieván slavútno, Jelimieliehoskire kheritkoné rodóstyr (pliemjostyr), lav léske sys Voozo.

2I phendiá Ruta Moavitianka Noeminjake: “Džáva me pe félda i javáva te podkedav kolosy pir dolé sliady, konéste lathava láska.” Joj phendiá láke: “Džá, mirí čhaj.”

3Joj gijá, i javdiá, i podkedyja pe félda kólosy palál ukedybnar'jende. I vygijá, so doiá feldakiro paš sys Voozoskiri, savó sys Jelimieliehoskire kheritkoné rodóstyr (pliemjostyr).

4I, ĥáda, Voozo (Boaz) javdiá Vifliejemostyr i phendiá ukedybnar'jenge: “Te javél Raj Devél tuménca!” Jone phenlde léske: “Mek te bahtiakirél tut Raj Devél!”

5I phendiá Voozo péskire dynaríske, savó dykhciá pal ukedybnar'jende (žniecenge): “Konéskiri isyn a daja terný džuvlý?”

6O dynári, savó dykhciá pal ukedybnar'jende, otphendiá i phendiá: “Adaja terný džuvlý – Moavitianka, saví javdiá Noeminjasa Moavitskone feldendyr;

7joj phendiá: ‘Me javáva te podkedav i te skedav maškír ĥarby (snopy) palál pal ukedybnar'jende, i javdiá, i isyn adáj samone zlokostyr (ranicatyr) ke davá časo (cýro); kutý joj isyn kheré.’”

8I phendiá Voozo Rutake: “Pošun, mirí čhaj, na psir te podkedes pe javír félda i na piridža adathýr, ne jav adáj miré dynaricenca;

9mek dre tyré jakhá te javél doiá félda, kaj jone ukedena, i psir pal lénde; ĥáda, me priphendjom miré dynar'jénge te čilaven (na čepinen) tut; kiéli zakamesa te p'jes, džá ke khoré (sosudy) i pi, katýr léna miré dynárja.”

10Joj pyjá pe péskiro muj i poklonindiape ke phuv, i phendiá léske: “Sósa lathjom me dre tyré jakhá tangipén, so tu prilesa man, na dykhí, so me javire rigátyr som?”

11Voozo otphendiá i phendiá láke: “Mánge phendló saró, so tu kerdián vaš péskire sasiake pir tyré-romeskiro meribén, so tu jačkirdian tyré dadés, i tyrja da, i tyrí rig, kaj tu bijandyjan, i javdián ke manušá, savén tu na džindian atasiá i tríto dyvés;

12mek te del Raj Devél pal davá réndo tyró, i mek te javél túke pherdý mazúri (nagrada) Rástyr-Devléstyr, Izrailjoskire Devléstyr, ke Savó tu javdián, sob te štyljos tel Léskire phaká!”

13Joj phendiá: “Me javáva dre tangipén angíl tyré jakhá, miro xulájo! Tu štyliakirdian man, i rakirdian pir iló tyré dynaricakiro, maškír dová, syr me na som mol ni jekha tyrja dynárica.”

14I phendiá láke Voozo: “Kiéli javéla časo (cýro) te xas; jav darik i xa maró, i bolav (makin) tyró kotér dro šut (uksuso).” I bestiá joj pašýl ukedybnar'jende. Jov podyja láke maró; joj xaja, podhaia, i jaciápe.

15I uštyjá joi, sob (kaj) te podkedel. Voozo dyjá priphenybén péskire dynar'jénge, i phendiá: “Mek te podkedel joj i maškirál ĥarby (snopy), i na dukhaven (na zbidynen) la;

16mek i snopendyr te otčhurden láke i jačkiren, mek joj te podkedel, i na košen la.”

17Adiáke podkedyja joj pe félda ke bel'vél', i vymolotindia, so skedyjá, i vygijá pašýl jefa ĥersto (jačmienjo).

18Lyi davá, joj gijá pe fóro, i sasuj lákiri dykhciá, so joj skedyjá. I vylyja Ruta péskire brekatyr i dyjá láke dová, so jačkirdiá, podhai kokori.

19I phendiá láke lákiri sasuj: “Kaj tu skedyjan adadyvés, i kaj kerdián butý? Mek te javél bahtiakirdó odová, kon prilyjá tut!” Ruta phendiá péskire sasiake, konéste joj kerdiá butý, i phendiá: “Manušéskire odoleskiro, konéste me adadyvés kerdjom butý, lav isyn Voozo.”

20I phendiá Noemin' péskire borjake: “Te javél bahtiakirdó jov Rástyr-Devléstyr pal dová, so na obgija péskire tangipnasa ni džiden, ni mulen!” I phendiá láke Noemin': “Adavá manúš isyn pašatuno ke ame; jov isyn amaré semencendyr.”

21Moavitianka Ruta phendiá: “Jov adiáke i phendiá mánge: ‘Jav miré dynaricenca, paka končynena jone miro ukedyiben.’”

22I phendiá Noemin' péskire borjake, Rutake: “Šukár, mirí čhaj, so tu javésa te psirés léskire dynaricenca, i na javéna te obkharen tut pe javír félda.”

23Adiáke joj sys Voozoskire dynaricenca i podkedelas kólosy, paka na progijá ĥerstoskiro (jačmienjoskiro) ukedyiben i parné-giveskiro (pšienicakiro) ukedyiben, i dživdiá ke péskiri sasuj.

← Chapter 1 Jump to: Chapter 3 →