Ruth 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1I phendiá láke Noemin', lákiri sasuj: “Mri čhaja, ci te na porodes túke péske štéto, sob túke te javél šukár?”

2Ĥáda, Voozo, koneskire dynaricenca tu sánas, isyn amarí seménca; ĥáda, jov dre daja rat vieinela pe šúrna ĥersto (jačmienjo);

3vymorpe, podmakhpe, uri pe péste goža tyré ídi i džá pe šúrna, ne na sykadjov léske, paka jov na mekéla te xal i te p'jel;

4kiéli jov pasjola te sovél, udžin štéto, kaj jov pasjola; tedy tu javésa i otčhakiresa pašýl léskire ĥerá, i pasjosa; jov phenéla túke, so túke te kerés.”

5Ruta phendiá láke: “Keráva saró, so tu phendián mánge.”

6I gijá pe šúrna (gumno), i kerdiá saró adiáke, syr priphendiá láke sasuj lákiri.

7Voozo xaja i vypija čalés i rozviesielindia péskiro iló, i gijá i pasijá te sovél pašýl skirda. I joj štylin'kes javdiá, otčhakirdiá péske pašýl léskire ĥerá i pasijá.

8Dre paš rat jov trinskirdiape, ĥazdyjápe, i, ĥáda, pašýl léskire ĥerá sys pašty džuvlý.

9I phendiá láke Voozo: “Kon tu san?” Joj phendiá: “Me som Ruta, dynárica tyrí, ĥázde jakh tyrí pe dynaricate tyrjate, pal-dová so tu san seménca.”

10Voozo phendiá: “Bahtiakirdy tu san Rástyr-Devléstyr, mirí čhaj! Davá palatunó tyró lačhó réndo kerdián tu, pe but fedýr anglatunestyr, so tu na gíian te rodes terné manušén, ni čororen ni barvalen;

11i adiáke, mirí čhaj, na dar, me keráva túke, saró, so tu phendián; pal-dová so saré miré manušéngire vudará džinéna, so tu san lačhí džuvlý;

12mek i čačipén, so me som seménca, ne isyn seménca pašyledýr mándyr;

13rat'kir daja rat; a tasiá, kóli jov priléla tut, tedy šukár, mek te prilel; a kóli jov na zakaméla te prilel tut, tedy me prilava; te javél džidó Raj Devél! Sov ke zlóko (ránko).

14I sys suty joj pašé léskire ĥerá ke zlóko, i uštyjá angledýr, syr mogindlé jone te uĥaljon jekh jekhés. I phendiá Voozo: “Mek te na džinén, so džuvlý sys javi pe šúrna (gumno).”

15I phendiá láke: “Pode upratuny ídia, saví pe túte, porikir la.” Joj rikirdia, i jov otmierindia láke šov miery ĥersto (jačmienjo), i čhudiá pe láte, i gijá dro fóro.

16A Ruta javdiá ke péskiri sasuj. Odoia phendiá láke: “So, mirí čhaj?” Joj piriphendia saró láke, so kerdiá láke odová manúš.

17I phendiá láke: “Dalé šov miery ĥersto (jačmienjo) jov dyjá mánge i phendiá mánge: ‘Na džá ke péskiri sasuj čhučé vasténca.’”

18Odoia phendiá: “Užakir mirí čhaj, paka tu udžinesa, sósa vydžála davá réndo; pal-dová so odová manúš na jačélape dro ramánjo (miro), na keri adadyvés réndy.”

← Chapter 2 Jump to: Chapter 4 →