Titus 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Pavlístyr, Devléskire pisharistyr i Isusóskire Xristosóskire Apostolostyr. Me sómas bičhadó te rozlydžav manušéngiro patiaibén, savén Devél vykedyjá, i te janav len ke čačipén, sob (kaj) jone te dživén darása angíl Devléste;

2davá čačipén déla nadiéia pe viéčno džiibén, pal savó Devél dyjá lav aménge angíl, syr svéto sys sozdynó, a Devél nijékhvar na xohavela,

3a, kiéli javdiá Léskiro časo, Jov sykadiá Léskiro lav dro phendló lav, savó sys dopatiandlo mánge pir Devléskiro uphenybén, amaré Zrakhibnariskiro Devléskiro, –

4Titoske, miré čačuné čhavéske pir patiaibén, savó sys jekh khetané mánca, te javél bahtalypén láska i ramánjo Devléstyr – Dadéstyr i Rástyr-Devléstyr, Isusóstyr Xristosostyr amaré Zrakhibnaristyr.

5Me jačkirdjom tut pe Krito vaš dová, sob (kaj) tu duredýr te dokeres butý, saví tu na kerdián ke kónco (ke jagor) i te čhuvés phuredýr pšalén dro kažno fóro, syr me túke priphendjom:

6sob (kaj) kadasavó manúš te javél bidošakiro, jekhe-romniakiro rom, sob (kaj) te javén léste čhavé, savé patiána Devléske, savé isyn narozmekne, i savé kandéna.

7Pal-dová so phurydyré pšaléske trej te javél bidošakireske, syr Devléskire-kheritkoné barydyréske, sob (kaj) jov te na ginel pes drieván god'varesa, te na javél xolynakiro, matymari, phut'kirdo, rozmaribnari, te na javél jov ĥálko ke barvalypén;

8a te prilel manušén ilésa, savénde nane péskiro kher i te javél drógo léske lačhipén, te džinél te rikirél pes dre vastá, te javél jov čačunó, savó obrikirela pes,

9savó rikirelpe patiaibnytkone lavéske, syr les sykliakirdé, sob (kaj) jov moginelas te sykliakirél javire manušén čačuné sykliakiribnaske, i te sykavél kadalé manušén, savé isyn proti čačunó sykliakiribén.

10Pal-dová so isyn but manušá Judendyr, savé rakiréna čhučé lavá i xohavena javirén,

11trej, sob (kaj) tumé te zaphanden muj lénge, savé zmarena čačuné droméstyr but sem'i (irjá), a vaš péskiro biladžaipnytko tyrdypén ke lové jone sykliakiréna odová, so na trej.

12Jekh léndyr léngiro proróko phendiá: “Kritiani isyn ŭsády (sak) xohaniúki, fuj, búsa (dika) murdalá i kirne-masengire manušá, savé xanas, syr na dre péste.”

13Kadavá dophenybén isyn čačunó; pir davá bangiakir šylales len, sob (kaj) léngiro patiaibén te javél čačunó,

14te na šunén Judéngire paramysí (skazki) i manušéngire priphenybená, savé durjona čačipnastyr.

15Vaš žužé manušénge – saró isyn žužó, ne vaš manušénge, savé isyn nažužé pir grého, i savé na patiána Devléske, vaš lénge nisó nane žužó, pal-dová so léngiri godý i ladž isyn nažužé.

16Jone rakiréna, so jone džinéna Devlés, ne péskire rendénca jone sykavéna, so jone otphenenape Léstyr, jone isyn džungalé i na kandéna, jone nane lačhé ni ke savó lačhé réndo.

Jump to: Chapter 2 →