Titus 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1A tu rákir dová, so trej vaš čačunó sykliakiribén;

2sob (kaj) phuré muršá te javén rakhune, sob (kaj) jone te džinén, syr trej pes te lydžán, te javén god'varé i zoralé dro patiaibén, dre patýv ke javír manušá, dro vyrikiriben;

3sob (kaj) phuré džuvliá adiáke-pac' te ladžan pes patyvales, syr trej sventonenge, te na zlydžan pljotki, i te na p'jen but mol, a te sykliakirén lačhipnaske javire manušén;

4sob (kaj) jone moginénas te sykliakirén terné džuvlién te sykavén patýv péskire romenge, i te sykavén patýv péskire čhavénge;

5sob (kaj) jone te javén svénta, žužé, te rikirén lačhés kherítko xulaiben; te javén lačhé, te kandén péskire romen, sob (kaj) te na javél košno Devléskiro lav.

6Terné manušén sykliákir adiáke-pac', sob (kaj) jone te obrikiren pes:

7sykáv pes kokoró pir saré lačhé réndy, sob (kaj) javír manušá te dykhén i adiáke-pac' te kerén lačhipén, sykliákir žužypnaske dro iló, patyvalypnaske;

8rákir čačuné lavá, sob (kaj) adalé manušénge, savé isyn vérgi tumaré, te javél lénge ladžavo, i jone te na moginen te phenén nisavó čoripén pal aménde:

9sob (kaj) pishárja te kandén péskire xulan dro saró, te kerén pir iló i te na obrakiren len palál;

10te na čoren nisó péskire xulandyr, a te sykavén lačhó patiaibén i te javén patiaibnytka dro saró, mek jone te kerén adiáke, sob (kaj) saré te kutiakiren amaré Zrakhibnariskire-Devléskiro sykliakiribén.

11Pal-dová so javdiá Devléskiro bahtalypén, savó zrakhéla saré manušén;

12savó sykliakiréla amen, sob (kaj) ame te na kerás magiripén i te durjovas svetóskire tyrdypnastyr, te dživás dre davá viéko pir čačipén i darása angíl Devléste,

13i te užakiras lačhí nadiéia, kiéli javéla baró Devél slavása i amaró Zrakhibnari, Isúso Xristóso,

14Savó otdyjá Pes pal aménde, sob (kaj) Jov te zrakhél amen saré načačune rendéndyr, te kerél amen žužé manušénca, sob (kaj) ame te javas jekh Léskire manušénca, savé drieván tyrdenape te kerén lačhipén.

15Sykliákir davá i sykáv manušénge léngiri bang saré pravosa, sob (kaj) nikón te na dykhél vučipnástyr pe túte.

← Chapter 1 Jump to: Chapter 3 →