1 Kings 1 — Romani Sinte 2024 (O Debleskro Lab 2024 (Sinte-Manouche))

1Oun o baro ray David vas i phouro morsh. Les his i lengsto djipen. Oun leske nay vas gar tato, ninna te čivan le plaashke pral leste.

2Leskre boudepangre rakran leha oun penan: “Mouk men touke, maro rayeske, i terni čay te rodell, kay djinell kek morshestar. Koya te vell pash toute, te vell li touke koy, oun te čivell li pes pash toute, te vell touke tato.”

3Oun yon rodan i shoukar terni čay an o tselo them Israel, oun hatsan i Abishag dran o gab Shounem, oun anan lat o baro rayeske.

4Oun kay terni čay his boud shoukar. Yoy his o baro rayeske koy oun his leskri boudepaskretsa. O baro ray David sovas gar lah.

5Oun o Adoniya, koleskri day o Davideskri romni, i Haggit his, kova kras pes baro oun penas: “Me, me kamau baro ray te vell!” Oun yob las peske vourdya oun graya, oun i paash-sheel morsha, te nashenn le glan leste.

6An leskro tselo djipen čingras leskro dad kek kopo leha oun poučas lestar: “Hoske kreh tou kava?” O Adoniya his i shoukar morsh, oun vas boldo pal o Absalom.

7Oun o Adoniya rakras kol douy morshentsa, o Yoab, koleskri day i Serouya his, oun o rashayeha, o Abyatar. Kolla douy rikran ap o Adoniya.

8O rashay Zadok his gar leha, vitar gar o Benaya, koleskro dad o Yoyada his, vitar gar o Debleskro rakepaskro, o Natan, vitar gar o Shimi, oun o Rei, oun o Davideskre zorele kourepangre.

9Oun o Adoniya kras i baro rhapen pash o bar, hoy kharell Sohelet pash o pani Rogel. Oun anas bakren oun groumyen oun thoulle terne groumyen o Debleske, [te venn leske kol feteder kotya mass rhačedo, oun te rhan le ko vavar mass.] Oun peskre phralenge, o baro rayeskre vavar čavenge, moukas lo te penell, te venn le pash o rhapen. Ninna i tsele vavar morshenge dran Youda, kay boudran an o baro rayeskro kheer, moukas lo te vell.

10Kokres o Debleskro rakepaskres, o Natan, oun o Benaya oun o Davideskre zorele kourepangren oun leskro phrales, o Salomo, moukas lo gar te kharell.

11Kote penas o Natan ap i Batsheba, o Salomeskri date: “Shounal tou gar, kay o Adoniya, koleskri day i Haggit hi, maro baro ray vas, oun o David, maro ray, djinell kolestar či?

12Kanna, shoun, hoy touke penau, te nay rikress tou tiro djipen oun o djipen tiro čavestar Salomo.

13Dja pash o baro rayeste, o David, oun pen ap leste: Tou, miro baro ray, dal tout sovel, oun penal mange: Tiro čavo o Salomo vell pal mande o baro ray, yob oun kek vavar. Hoske vas palle o Adoniya o baro ray?”

14O Natan penas doureder ap i Batsheba: “De yak, te hal tou gomme glan o baro rayeste o David tardo oun rakreh leha, vau me ninna pashel oun rakrau leha doureder.”

15Oun i Batsheba djas dren pash o baro rayeste an leskri isema. O baro ray David his i phouro morsh, oun i Abishag dran o gab Shounem his leske koy.

16Oun i Batsheba čivas pes glan o baro rayeste ap i phoub. Kote poučas o baro ray: “Hoy kameh tou?”

17Oun yoy penas ap leste: “Miro ray, tou dal tout sovel pash o baro Debleste, kay tiro Devel hi, oun penal mange, tiri boudepaskretsa: Tiro čavo Salomo vell pal mande o baro ray, yob oun kek vavar.

18Kanna dik, har djas: O Adoniya vas o baro ray. Oun tou, miro baro ray, djineh kolestar či.

19Oun o Adoniya maras morsh groumyen oun thoulle terne groumyen oun boud bakren o Debleske, oun moukas tire tsele čavenge te penell, te venn le pash o rhapen, ninna o Abyatar, ko rashay, oun o Yoab, o pralstouno pral i lourdende. Kokres tiro čaves, o Salomo, moukas lo gar te vell.

20Kanna dikenn i tsele Israelitarya ap toute, miro baro ray, te peness lenge, koon pal toute o baro ray vell.

21Te kreh tou kova gar, oun ko tsiro vell, kay hal bouder gar djido, palle hom me oun miro čavo, o Salomo, an lengre yaka phoukepangre.”

22An ko tsiro, kay yoy rakras o baro rayeha, vas o Debleskro rakepaskro, o Natan, an o kheer dren.

23Oun yon penan o baro rayeske: “Kate hi o Debleskro rakepaskro, o Natan.” Oun har vas yob dren glan o baro rayeste, peras lo ap peskre čanga glan o baro rayeste oun ačas ap peskro mouy glan leste čiddo ap i phoub.

24Oun yob penas: “Miro baro ray, penal tou O Adoniya te vell pal mande o baro ray?

25Yob djas kava dives koy, oun maras o Debleske morsh groumyen oun thoulle terne groumyen oun boud bakre, oun moukas tire tsele čavenge te penell, te venn le pash o rhapen. Ninna i pralstoune lourden, oun o rashayes Abyatar moukas lo te vell. Oun kanna rhan oun piyenn le glan leste, oun denn gole: I rah djipen o baro rayeske Adoniya!

26Man, miro ray, moukas lo gar te kharell, vitar gar o Zadok, ko rashayes, oun o Benaya, koleskro dad o Yoyada his. Oun tiro čaves, o Salomo, moukas lo vitar gar te kharell.

27Vas kova toutar, miro baro rayestar, yaake penlo? Kamal tou gar, te djinenn kol pralstoune an tiro them, koon pal toute o baro ray vell?”

28O baro ray David rakras pale oun penas: “Denn i Batsheba gole!” Oun yoy vas dren glan o baro rayeste. Oun har yoy glan leste tardo his,

29das pes o baro ray sovel oun penas: “Me dau man sovel pash o djido Debleste, kay las man vin dran kova lauter, hoy miro djipen phares kras:

30Me krau kava dives, har me man glan toute sovel dom pash o baro Debleste, kay o Israeleskro Devel hi, har penom: O Salomo, tiro čavo, vell pal mande o baro ray. ”

31Kate peras li glan leste ap peskro mouy ap i phoub oun penas: “I lengsto djipen miro rayeske, o baro rayeske o David!”

32Oun o baro ray David penas: “Denn mange gole o rashayes o Zadok, oun o Debleskro rakepaskres o Natan oun o Benaya, koleskro dad o Yoyada his!” Oun yon van glan leste.

33Oun o baro ray penas ap lende: “Lenn t'mentsa i pralstunen pral miro kheer, oun penenn miro čaveske, o Salomo, te beshell lo pes ap miri bourika, oun djan leha tele pash o pani Gihon!

34Oun kote makenn le les dren o lačo djeteha, o rashay o Zadok, oun o Debleskro rakepaskro, o Natan, te vell lo baro ray pral Israel. Oun t'mer phourdenn an i phourdepangre oun denn pashel gole: I rah djipen o baro rayeske, o Salomo!

35Oun djan pal leste oun venn leha pale kay, oun yob te beshell ap miri beshepaskri. Kek vavar har yob te vell o baro ray pal mande. Me čivau les pral i themma Israel oun Youda.”

36Kote penas o Benaya, koleskro dad o Yoyada his, o baro rayeske: “Yaake krah mer kova! Yaake kamell kova o baro Devel, kay ninna o Devel miro baro rayestar hi.

37Har o baro Devel miro baro rayeha his, yaake te vell yob o Salomeha. Mou vell o čavo gomme bareder har leskro dad!”

38Oun o rashay Zadok, oun o Debleskro rakepaskro o Natan, oun o Benaya, koleskro dad o Yoyada his, oun i Kretarya oun i Pletarya djan tele oun moukan o Salomes te klissell ap i bourika o baro rayestar David, oun yon anan les pash o pani Gihon.

39Oun o rashay Zadok las o djet dran o Debleskro plarhteno kheer, oun makas o Salomes koleha dren. Oun yon phourdan an i phourdepangre, oun i tsele menshe dan gole: “I rah djipen o baro rayeske, o Salomo!”

40Oun i tsele menshe djan pale pre pal o Salomeste, oun yon kran i shoukar bashepen, oun dan yaake gole i barhtyatar, te trissas i phoub.

41Oun o Adoniya shounas kova oun halauter, kay pash leste his, har o rhapen trouyel his. Oun har o Yoab shounas, har phourdan le an i phourdepangre, penas lo: “Hoy hi koy bari divyi gole an o foro?”

42Har yob gomme rakras, vas o Yonatan, koleskro dad o rashay Abyatar hi. Oun o Adoniya penas ap leste: “Ab kate pash mande! Tou hal i morsh o labestar oun aneh menge lače laba.”

43O Yonatan penas ap o Adoniya: “Na-a, shoun, maro ray, o baro ray David, kras, te vell o Salomo o nevo baro ray,

44oun bičras leha o rashay, o Zadok oun o Debleskro rakepaskro, o Natan, oun o Benaya, koleskro dad o Yoyada hi, oun i Kretarya oun i Pletarya. Oun yon moukan les te klissell ap i bourika o baro rayestar.

45Oun o rashay Zadok, oun o Debleskro rakepaskro Natan makan les lačo djeteha dren, te vell yob o baro ray. Kova kran le pash o pani Gihon. Kotar djan le pale pre bashepah oun gipah. Yaake vas o foro pherde menshe, kay denn gole i barhtyatar. Doleske shounan t'mer kate koy bari gole.

46Oun o Salomo beshas pes ap o rayeskri beshepaskri. Kanna hi yob o baro ray.

47Oun dik, kol pralstoune an o kheer maro baro rayestar David van pash leste, oun rakran lače laba pral leste vin oun penan: Tiro Devel, mou krell lo tiro čaves Salomo gomme bareder har tout! Mou vell o them tel leste gomme zorleder har tel toute. Oun o baro ray David penas peskro shereha ava ap peskro čiben.

48Ninna penas lo: Sharenn o baro Debles, kay o Israeleskro Devel hi! Kava dives čivas lo yekes mire čavendar ap miro rayeskri beshepaskri, oun moukas man kova gomme te dikell! ”

49Kate vas i bari traash pral halauterende, kay pash o Adoniya beshdo his. Oun halauter stan pre, oun hakeno djas peskro drom.

50Oun pral o Adoniya vas i bari traash o Salomestar. Oun yob stas pre, oun djas pash o Debleskri rhačepaskri oun čivas peskre vasta troul lakre shinga.

51Oun o Salomeske vas penlo: “Dik, o Adoniya las bari traash toutar. Yob djas pash o Debleskri rhačepaskri oun čivas peskre vasta ap lakre shinga, oun penas: O baro ray Salomo mou dell pes sovel kava dives, te marell lo man gar o rhareha, man, kay leskro boudepaskro hom. ”

52O Salomo penas: “Te rikrell lo ap mande, krau leske či; hatsau čilačepen ap leste, hounte merell lo.”

53Oun o baro ray Salomo bičras yekes pash o Debleskri rhačepaskri, kay o Adoniya tardo his, oun moukas les kotar pash peste te anell. Oun har yob vas, vitsras lo pes glan o baro rayeste Salomo ap i phoub tele. Oun o baro ray Salomo penas ap leste: “Dja kanna khere!”