bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Sinte 2024 (O Debleskro Lab 2024 (Sinte-Manouche))
/
2 Samuel 11
2 Samuel 11
Romani Sinte 2024 (O Debleskro Lab 2024 (Sinte-Manouche))
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 12 →
1
Oun ko bersh djas trouyel. Oun an ko tsiro, kay kol bare raya an o kourepen djan, bičras o David o Yoabes oun leskre lourden leha an o kourepen. Ninna i tsele Israelengre lourde djan lentsa. Oun yon kouran pen i Ammonentsa, kran lengro them paash oun čivan pen troul o foro Rabba. O David ačas an Yerusalem.
2
His yek dives, har i rati vas, stas o David dran peskro čiben pre, oun djas pral ap peskro kheer. Koy dikas yob pral tele, oun dikas i djouvyat, kay thovell pes. Oun koy djouvel his shoukar.
3
Oun o David bičras yekes koy, oun moukas pal kol djouvyate poučell. Koy vas leske penlo: “Koya hi i Batsheba, kolakro dad o Eliam hi. Lakro rom hi o Uriya. Kova hi i Hetari.”
4
Oun o David bičras morshen koy, oun moukas lat te lell. Oun har yoy pash leste vas, sovas yob pash late. Oun palle djas li pale an peskro kheer. [Glan kova, kay yoy pash leste vas, kras li kova, hoy kol djouvyenge an Israel glan činlo his, te krenn le pal pengri djouvyengro koova.]
5
Koy djouvel vas an vavar koova, oun bičras yekes pash o Davideste, oun moukas leske te penell: “Me hom an vavar koova.”
6
Oun o David bičras yekes pash o Yoab oun moukas leske te penell: “Biče o Uriya, ko Hetari, pash mande!” Oun o Yoab bičras o Uriya pash o Davideste.
7
Oun o Uriya vas pash o Davideste. Koy poučas o David lestar: “Har djal o Yoabeske, oun har djal kol lourdenge an o kourepen?”
8
Oun o David penas ap o Uriya: “Dja tele an tiro kheer, oun thob tire herya!” Oun o baro ray das les čomone peha, hoy leske pal hidjedo vas, har o Uriya dran o baro rayeskro kheer djas.
9
O Uriya djas gar tele an peskro kheer. Yob čivas pes tele pash o voudar glan o baro rayeskro kheer, kote, kay kol tsele lourde leskro rayestar čiddo hi.
10
Oun o Davideske vas penlo: “O Uriya djas gar tele an peskro kheer.” Koy poučas o David lestar: “Hoske djal tou gar tele an tiro kheer? Tout hi i dour drom pal toute.”
11
Penas lo: “O Debleskro morhton, ninna i lourde dran Israel oun Youda hi an plarhtene khera. Oun o Yoab, miro pralstouno, oun tire lourde sovenn ap i phoub. Oun me djap an miro kheer, te rhap oun piyap, oun te vap pash miri romyate čiddo. Yaake čačo har kova hi, kay tou djiveh: Savo koova krau me gar.”
12
Penas o David ap leste: “Ač kay dives kay! Taysar moukau tout te djal.” Yaake ačas o Uriya ap ko dives an o foro Yerusalem, oun ninna ko vavar dives.
13
Oun o David moukas les pash leste te vell. Oun o Uriya rhas oun piyas pash o Davideste. Oun o David kras les mato. Oun i rati djas o Uriya vin, te čivell lo pes tele ap peskro čiben pash kol lourdende leskro rayestar. Oun djas gar tele an peskro kheer.
14
O vavar dives taysarlake činas o David i liil ap o Yoabeste. Oun o Uriya anas les leske.
15
O David činas an ko liil: “Anenn o Uriyes glan, kote, kay o kourepen bareder hi. Oun palle tserdenn t'men lestar pale, te vell yob moulo dino!”
16
Oun o Yoab čivas peskre lourden troul o foro. Oun o Uriya, koles čivas lo koy, kay i Ammonaryen peskre feteder lourde tardo his.
17
Oun kol lourde dran ko foro van vin oun kouran pen o Yoabeha oun o Davideskre lourdentsa. Oun mank kolende his save, kay meran. Ninna o Uriya, ko Hetari, meras.
18
Koy bičras o Yoab yekes pash o Davideste, oun moukas leske lauter te penell, hoy an ko kourepen djas.
19
Oun penas ap ko morsheste: “Te penal tou o baro rayeske lauter, hoy an o kourepen djas,
20
oun dikeh, kay o baro ray rhoyedo vella, oun toutar poučella: Hoske van t'mer yaake neesh pash o foro an o kourepen? Djinenn t'mer gar, kay hi le ap i massouri tardo oun denn tele karye?
21
Bistran t'mer koy djouvel, kay vitsras i baro bar i massouri tele ap o Abimelek, koleskro dad o Yeroub-Baal his? Oun o Abimelek meras glan o foro Tebez. Hoske van t'mer yaake neesh pash o foro? Yaake hounte peness tou: Ninna tiro lourdo Uriya, ko Hetari, hi moulo. ”
22
Ko morsh djas koy, oun ginas o Davideske lauter dren, hoy o Yoab leske penas.
23
Ko morsh penas ap o Davideste: “Kol lourde his zorleder har mer. Yon djan vin oun peran ap o them pral mende. Mer djam ninna ap lende oun tradan len pale bis pash ko baro voudar glan o foro.
24
Oun kol lourde ap i massouri dan karye ap mende, oun maran boud tire lourdendar, baro ray. Ninna tiro lourdo, o Uriya, ko Hetari, hi moulo.”
25
O David penas ap ko bičepaskro: “Pen o Yoabeske: Kova hounte khaytell tout gar. O rharo rhal kanna kales oun i vavar kopo koles. Koure tout gomme zorleder ko foreha, oun kre les paash! Yaake peness tou ap leste, te lell yob pale zoor.”
26
Oun i Batsheba shounas, kay lakro rom Uriya moulo hi. Oun yoy rovas pral peskro romeste.
27
Har his kol divessa trouyel, kay li rovas, bičras o David yekes pash late, oun moukas lat an peskro kheer te anell. Oun yoy vas leskri romni, oun anas leske i čavo ap i phoub. Glan o baro Debleskre yaka his kova gar mishto, hoy o David kras.
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 12 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24