2 Samuel 8

Romani Sinte 2024 (O Debleskro Lab 2024 (Sinte-Manouche))

← Chapter 7 Jump to: Chapter 9 →

1Pal yek tsiro kouras pes o David pale i Filistarentsa oun vas zorleder har yon, oun las o Israel dran lengre vasta vin, yaake te his kol Filistaryen bouder gar penepaske pral lende.

2Yob das ninna kol Moabarya oun penas, te čivenn le pen ap i phoub. Oun douy i trinendar kras lo moulo, oun yek i trinendar moukas lo djido. Yaake vas o Davides penepaske pral kol Moabende. Oun yon hounte dan les roup oun sonakay.

3O David kouras pes ninna o baro rayeha pral o them Soba. Leskro lab his Hadad-Eser, koleskro dad his o Rehob. Har o Hadad-Eser koy djas, te lell lo o them pash ko pani Eufrat pale dren, vas o David peskre lourdentsa, oun das les oun leskre lourden.

4Oun pandas 1.700 (yek-sero-efta-sheel) klissepangre, oun 20.000 (biish-zerya) lourden, oun kras i tsele grayen bango. Kokres sheel lendar moukas lo pral.

5Koy van kol Syrarya dran o them Damaskus pash o Hadad-Eser, ko baro ray pral o them Soba, te venn le leske ap i rig. Oun o David maras lendar 22.000 (biish-te-douy-zerya) morshen.

6Oun yob čivas moskre dren an lengro them. Oun o Davides vas penepaske pral i Syrarya, oun yon hounte dan les roup oun sonakay. Yaake his o baro Devel o Davideske ap i rig, kay lo ninna djas.

7Kol lourden o baro rayestar Hadad-Eser his sonakangre shilte. Kolen anas o David an o foro Yerusalem.

8Oun boud lolo saster las lo dran i forya Teba oun Berotay. Kol forya his an o them, kay his o Hadad-Eser o baro ray.

9Ko ray pral o foro Hamat – leskro lab his Toy, – his an o kourepen o rayeha Hadad-Eser. Har o Toy kanna shounas, kay maras o David koleskre tsele lourden, bičras lo peskro čaves, o Yoram, pash o baro rayeste David, oun parkras pes pash leste oun moukas les te penell, te vell les boud barht, oun anas peha roupene koola oun sonakangre koola oun save dran lolo saster.

11Kova lauter das o baro ray David o baro Debleste, oun čivas kova an leskro kheer, ninna ko roup oun sonakay, hoy yob kol menshendar las, pral kolende yob o zorleder vas oun kanna o ray hi.

12Kolla his i menshe an i themma Edom, Moab, Ammon, Filistia, Amalek. Ninna kova čivas lo an o Debleskro kheer, hoy las lo o rayestar pral o foro Soba, o Hadad-Eser, koleskro dad o Rehob hi.

13Yaake vas o Davideskro lab baro. Har vas yob dran o kourepen, kay das lo kol Syraryen, djas lo pale vin oun kouras pes i Edomentsa an i Londi Tala. Oun yob maras an koy tala 18.000 (deesh-te-orhta-zerya) lourden.

14Oun yob čivas moskre dren an hako foro an o them Edom. Oun o Davides his penepaske pral o tselo them Edom. O baro Devel his ap o Davideskri rig, kay yob ninna djas.

15Yaake his o David baro ray pral o tselo them Israel, oun kras, te lell hakeno peskro čačepen.

16O Yoab, koleskri day i Serouya hi, his o pralstouno pral i tsele lourdende, oun o Yosafat, koleskro dad o Ahiloud his, his o baro rayeskro rakepaskro.

17O Zadok, koleskro dad o Ahitoub hi, oun o Ahimelek, koleskro dad o Abyatar hi, his rashaya. O Seraya his kova, kay činas i lila.

18O Benaya, koleskro dad o Yoyada hi, his o pralstouno pral kol Kretarya oun Pletarya, kay his troul o baro rayeste tardo, te denn le ap leste yak. Ninna o Davideskre čave his rashaya.

← Chapter 7 Jump to: Chapter 9 →