Ezekiel 41

Romani Sinte 2024 (O Debleskro Lab 2024 (Sinte-Manouche))

← Chapter 40 Jump to: Chapter 42 →

1Oun ko morsh anas man an koy bari isema o Debleskro kherestar dren. Oun yob dikas pal, har baro i massurya hi, hoy čačes oun serves pash o voudar hi. Yon his triin metarya pesso.

2Oun o voudar his panč metarya bourhlo. Oun i massurya čačes oun serves o voudarestar his hakeni 2,5 (douy-te-paash) metarya bourhlo. Oun yob ginas tele, har baro koy tseli bari isema hi. Koya his 20 (biish) metarya lengsto oun 10 (deesh) metarya bourhlo.

3Palle djas ko morsh an koy palstouni isema. Oun yob dikas pal, har pesso koy massouri pash o voudar hi: Ap haki rig his li yek metari pesso. Oun o voudar his triin metarya bourhlo. Oun i massurya ap kol douy rigya o voudarestar his hakeni 3,5 metarya lengsto.

4Oun yob ginas tele, har baro koy tseli palstouni isema dren hi: Koya his 10 metarya baro oun deesh metarya bourhlo, yaake bourhlo har koy bari isema ninna hi. Oun yob penas ap mande: Kaya hi o Debleskri kouč isema.

5Oun yob dikas pal, har baro i massouri o Debleskro kherestar hi: Koya his triin metarya pesso. Troul o kheer trouyel his i rigyakro kheer, kay tikne iseme dren hi. Haki isema his douy metarya bourhlo.

6Oun kol tikne iseme his yaake tardo, te his triyanda iseme tella, oun triyanda mashkralstounes oun triyanda pralstounes. Oun yon his yaake troul o Debleskro kheer trouyel tardo, te venn le rikedo an peste, oun hounte venn gar an o khereskri massouri dren.

7Oun kol tikne isema, hoy pral i vavarende his, his bourhleder har kolla tel lende. Kolla, hoy telstounes his, his i tikneder. Oun kolla, kay pralstounes his, his i bourhleder. Oun i treppa djas foun o telstouno an o mashkralstouno oun foun kote an o pralstouno.

8Palle dikom tele oun dikom, kay his i hadedi platsa troul o Debleskro kheer. Kay platsa his triin metarya pesso. Koy pre his ko rigyakro kheer tardo.

9Leskri massouri vin his 2,5 (douy-te-paash) metarya pesso. Troul o rigyakro kheer his kay platsa 2,5 (douy-te-paash) metarya bourhlo. Oun an o rigyakro kheer his douy voudya, hoy djan ap kay platsa, yek voudar ap i servi rig, oun yek voudar ap i čači rig. Troul kay platsa his i kotar phoub, hoy či pre tardo hi. Koy phoub his deesh metarya bourhlo.

12Vergel koy kotar phoub oun pal o Debleskro kheer his i vavar kheer tardo ap koy rig, kay o kham tele djal. Kava kheer his 35 (triyanda-te-panč) metarya lengsto oun 45 (star-deesh-te-panč) metarya bourhlo. Leskri massouri his ap hake star rigya 2,5 (douy-te-paash) metarya pesso.

13Oun o morsh dikas tele, har lengsto o Debleskro kheer hi: Kova his 50 (paash-sheel) metarya lengsto. Oun koy platsa pal o Debleskro kheer bis pash ko kheer, hoy ap koy rig hi, kay o kham tele djal, oun kava kheer oun leskre massurya his ninna 50 (paash-sheel) metarya.

14Oun o bourhlepen o glanstouni rigyatar foun o Debleskro kheer oun koy platsa ap koy rig, kay o kham pre djal, his khetne ninna 50 (paash-sheel) metarya.

15Oun o morsh dikas pal, har lengsto ko kheer hi, hoy ap koy rig tardo hi, kay o kham tele djal. Khetne peskre massurya ap kol douy rigya his kava kheer 50 metarya lengsto. Oun kol massurya an koy bari isema an o Debleskro kheer oun an i glanstouni halla,

16his dren i kashteha čakedo foun i phoub bis pre pash i tikne vorhya. Oun troul i vorhya djan triin shoukar sane kashta trouyel.

17An i kashteni massouri pral o baro voudar oun an i tsele kashtene massurya an o Debleskro kheer his shoukar koova dren činlo, koles his yek barepen.

18Koy his bolepangre oun palmtikre rouka: yek palmtikro rouk mashkral douy bolepangre. Hako bolepaskres his yaka oun i mouy ap douy rigya:

19Ap yek rig dikas o mouy i menshestar ap i palmtikro rouk. Ap i vavar rig dikas o mouy i terno levestar ap i palmtikro rouk. Oun savo činepen his an i tsele kashtene massurya trouyel dren činlo an o Debleskro kheer:

20Foun i phoub bis pre pral i voudya his save bolepangre oun palmtikre rouka an i kashtene massurya dren činlo.

21An i bari isema his pesse kashta čačes oun serves pash o voudar tardo, kolen his star rigya, hoy his emligo bares, yaake har ko voudar glan i kouč isema.

22Koy his čomone tardo, hoy vin dikas har i kashteno altaro. Kova his 1,50 (yek-te-paash) metari baro, oun yek metari lengsto oun yek metari bourhlo. Oun leskre ekke, leskro piro oun leskre rigya his dran kasht kerdo. Oun ko morsh penas ap mande: Kava hi koy rhapaskri, hoy glan o baro Debleste tardo hi!

23Oun glan i bari isema oun glan i kouč isema his glan hakeneste douy voudya, yek pal o vavar. Oun an hako voudar his douy kotya yek langs i vavar. Kolla nay rissrenn pen.

25Oun ninna an kol voudya glan i bari isema his bolepangre oun palmtikre rouka dren činlo, yaake har an i kashtene massurya. Vin glan o voudar glan i glanstouni halla his i dacha dran kasht.

26Oun an i massurya an i glanstouni halla his ap kol douy rigya tikne vorhya dren. Oun palmtikre rouka his an i kashtene massurya dren činlo, yaake har ninna an o rigyakro kheer oun an i kashteni dacha.

← Chapter 40 Jump to: Chapter 42 →