Hebrews 1

Romani Sinte 2024 (O Debleskro Lab 2024 (Sinte-Manouche))

Jump to: Chapter 2 →

1An o phouro tsiro rakras o Devel boud kope yaake te yaake ap peskre rakepangre, oun bičras len pash mare phourende, te penenn le lenge leskre laba.

2Kanna, an kava tsiro, bičras lo peskro čaves pash mende, te rakras yob ap mende. Koleste das o Devel lauter an leskre vasta, te vell yob o ray pral lauter. Koleha kras lo o bolepen oun i phoub.

3O Debleskro čavo hi raylo oun baro har o Devel. Oun kova, hoy hi o Debles an o dji, hi ninna o čaves an o dji. Dran leskro zorelo lab rikrell lo lauter khetne, hoy yob kras. O Debleskro čavo las mari doosh oun maro čilačepen mendar, oun yob beshas pes ap i čači rig o baro Deblestar an o bolepen.

4Yob vas boud bareder oun zorleder har i bolepangre. Oun o Devel das les i lab, hoy hi boud bareder oun rayleder har lengre laba.

5An o Debleskro lab hi činlo, kay penell o Devel ap peskro čaveste: Tou hal miro čavo. Kava dives vom tiro dad. Save laba penas lo ap kekeste peskre bolepangre. Vitar gar penas lo ap kekeste lendar: Me vau tiro dad. Oun tou veh miro čavo.

6O Debleskro čaves hi peskro dadeskro vast. Lestar penas o Devel, har yob les ap i phoub bičras: I tsele Debleskre bolepangre hounte vitsrenn pen glan leste tele, te sharenn le les.

7Pral peskre bolepangre penas lo: Yon hi mire boudepangre, sik har i dourho, hoy phourdell pral i phoub, oun zorelo har i yag.

8Ap peskro čaveste penas lo: Tou, o Devel, ačeh o baro ray kanna oun hako tsiro. Tou hal čačo oun lačo ap tire menshende.

9O čačepen kamal tou, oun o čilačepen dikeh glan i yaka nay gar. Doleske rodas tout tiro Devel vin, te vess tou bareder oun barhtleder har kolla, kay pash toute hi.

10Pale penas lo ap leste: Tou hal o baro ray, oun kral i phoub glan i rah tsiro. Oun tire vasta kran o bolepen.

11O bolepen oun i phoub ačenn gar. Tou ačeh hako tsiro. O bolepen oun i phoub venn phouro, oun djan paash har i ripen.

12Tou čiveh len khetne, har yek i phouri plaashka khetne čivella, oun i nevi plaashka ap peste čivella. Tou ačeh yaake, har tou hal, oun mereh gar.

13Ap kekeste peskre bolepangre penas lo kova, hoy yob ap peskro čaveste penas: Besh tout ap miri čači rig! Oun me krau, te vess tou o ray pral kolende, kay rhan pen ap toute.

14I tsele bolepangre hi leskre boudepangre. Kolen bičras o Devel ap i rig kolendar, kay djan ap o Debleskro drom, te lenn le o Debleskro djipen, hoy gar pre-herella.

Jump to: Chapter 2 →