Hebrews 4

Romani Sinte 2024 (O Debleskro Lab 2024 (Sinte-Manouche))

← Chapter 3 Jump to: Chapter 5 →

1Dran kova denn mishto garda, te dell kek t'mendar peskro patsepen pre! An o phouro tsiro penas o Devel peskre menshenge, te dell lo len i them, kay yon hako tsiro khere hi. Kava lab, hoy o Devel lenge penas, ačell menge ninna. An o phouro tsiro shounan le les, oun patsan les gar. Yaake van le gar an o Debleskro them.

3Mer, kay patsah, hoy o Devel penas, mer vah an o Debleskro them. I vavarendar penell lo: An miri rholi dom man sovel, oun penom: Yon venn gar dren an miro them, kay vans le hako tsiro pash mande khere. Kava them hi koy yaake rah, har o Devel o bolepen oun i phoub kras. Lauter his kerdo, har yob o bolepen oun i phoub an shob divessa kras.

4Pral o eftato dives vas penlo: Har kras o Devel lauter an o bolepen oun ap i phoub, boudras lo bouder či ap o eftato dives. Lauter his kerdo.

5Kol menshendar an o phouro tsiro penas lo: Yon venn gar an miro them dren, kay vans le hako tsiro pash mande khere.

6Yaake dikah: Hi save menshe, kolla van gar dren an leskro them, oun vavar, kay nay venn koy dren. Kolla, kay shounan o Debleskro lab an o phouro tsiro, patsan les gar, oun van gar dren.

7Doleske rodas o Devel i vavar dives vin, kay yob pale ap i menshende rakrella. Ko dives hi kanna. Boud bersha pal o tsiro, kay mare phoure an o moulo them djan, čivas lo o Davideske kol laba an o dji: T'mer te shounenn kava dives o Debleskro rakepen, palle shounenn ap leste! Krenn t'mare djia gar har barra!

8Glan o David djivas o Yosua. Kova anas mare phouren an o them Israel. Te vals o them Israel ko them, pral koleste o Devel rakras, rakrals lo boud bersha pal ko tsiro bouder gar pral i vavar dives.

9Yaake dikah: Hi gomme i tsiro, kay nay venn i menshe pash o Debleste, kay yon hako tsiro khere nay venna.

10Kote hounte krenn i menshe bouder kek boudi, yaake har o Devel bouder kek boudi kras, har lauter ap i phoub kerdo vas.

11Doleske čivas mer maro tselo dji koy pre, te vas an leskro them dren, kay ham hako tsiro pash leste khere. Das yak, te perell kek mendar o Debleskro dromestar tele, har kol menshe an o phouro tsiro, kay shounan gar ap o Debleste!

12O Debleskro lab hi djido oun zorelo, oun činell zorleder har i rharo, hoy činell ap douy rigya. Yaake har činell i rharo dour dren an o mass, ninna an i kokale, yaake činell o Debleskro lab dour dren an o mensheskro dji, oun sikrell leste, hoy hi lačo oun čilačo an leskro djipen.

13O Devel dikella lauter. Či an mende hi khatedo glan leskre yaka. Lauter hi pre čakedo glan leste. Oun leske hounte penas mer halauter, hoy kram.

14Men hi i baro rashay. Kova hi o Yezous, o Debleskro čavo. Yob djas pash o Debleste an o bolepen, te mangell lo les menge. Doleske moukas mer gar tele, te rikras zoreles ap maro patsepen.

15Yob, maro baro rashay, hayvell men mishto, oun djinella, te hi men kek zoor pral o čilačepen. Les kamas o beng ninna o Debleskro dromestar tele te anell, yaake har kamell lo men o Debleskro dromestar tele te anell. Yek koova his an o Yezouseskro djipen vavarčandes har pash mende: Kek čilačepen his an leste.

16Dran kova vas mer glan maro lačo Debleste. Koles hi i baro dji menge, te dell lo men peskri zoor ap ko tsiro, kay hounte las mer leskri zoor.

← Chapter 3 Jump to: Chapter 5 →