Joshua 1

Romani Sinte 2024 (O Debleskro Lab 2024 (Sinte-Manouche))

Jump to: Chapter 2 →

1Oun har meras o Mose, koles o baro Debleskro čačo vast his, rakras o baro Devel ap o Moseskro boudepaskro, o Yosua, koleskro dad o Noun his, oun penas:

2“O Mose, koles miro čačo vast his, hi moulo. Kanna dja tou oun i tsele Israelitarya pral o pani Yordan an ko them, hoy me len dau!

3Hako kotar phoub, kay t'mer t'mare heryentsa pre stakrenn, dom me t'mende, yaake har kova ap o Moseste penom.

4Ko tselo them mank kava moulo tato them oun i berge Libanon, oun mank o baro lengsto pani Eufrat oun o baro pani, hoy kote hi, kay o kham tele djala, kova vell t'maro them. Ninna o them, kay i Hetarya djivenna, vell t'maro.

5Kek nay vell zorleder har tou, yaake rah har tou djiveh. Yaake har me o Moseha homs, yaake vau me touha. Me moukau tout gar, oun me djau gar toutar.

6Ab zoreles oun ma traash! Tou dess kal menshen pengro them, kay me man sovel dom glan lengre phourende, te dap len kova!

7Tou, ab zoreles oun ma traash, oun rike tout ap mire tsele laba, hoy penas touke o Mose, koles miro čačo vast his. Ma dja kolendar tele, gar ap i čači rig oun vitar gar ap i servi rig, te vell halauter mishto, kay tou ninna djah.

8Pen touke kol laba glan, hoy an ko liil činlo hi! Ap o dives, har an i rat, mouk len touke an tiro shero trouyel te djal, te rikress oun kress halauter, hoy an ko liil činlo hi. Palle djal touke halauter mishto, oun kova, hoy kreh, vell mishto.

9Penau touke pale: Ab zoreles! Oun ma traash gar! Ma dare či! Oun ma traash kekestar! O baro Devel hi tiro Devel oun hi touha, kay tou ninna djah.”

10Kote penas o Yosua ap i pralstunende pral i Israelitarya:

11“Djan mashkral i plarhtene khera oun penenn i menshenge: Lenn rhapen oun pipen pash t'mende o dromeske! An triin divessa djan t'mer pral o pani Yordan an ko them dren, hoy dell t'men o baro Devel, kay t'maro Devel hi, te vell ko them t'maro!”

12Oun o Yosua penas ap kol menshende, kay dran o kheer Ruben oun dran o kheer Gad his, oun ap i paash kolendar, kay dran o kheer Manasse his:

13“Ma bistrenn ko lab, hoy penas t'menge o Mose, koles o baro Debleskro čačo vast his. Yob penas: O baro Devel, kay t'maro Devel hi, yob kras, te van khere oun das t'men kava them.

14T'mare romya oun t'mare čave oun t'mare firhe ačenn an kava them, hoy o Mose t'men das, ap kay rig o panyestar Yordan. T'mer morsha, halauter kay han čače kourepangre, lenn t'mare rhare t'mentsa, oun djan glan t'mare phralende ap i vavar rig! Yon hi t'mare phrala. Doleske hounte venn lenge ap i rig yaake rah, bis te dell o baro Devel lende ninna o them, kay yon khere venn, yaake har t'men. Palle djan t'mer pale pale an t'maro them, hoy das t'men o baro Debleskro boudepaskro, o Mose: ko them, hoy ap kay rig o panyestar Yordan hi, kay o kham pre djala.”

16Oun yon penan ap o Yosua: “Lauter, hoy tou penal te kras, kova krah mer! Oun kay tou men bičreh, kote djah mer!

17Yaake har mer ap o Mose shounam, yaake shounah mer ap toute. Mou vell o baro Devel, kay tiro Devel hi, yaake touha, har lo o Moseha his!

18Oun hakeno, kay gar ap toute shounell, oun vitar gar ap kol tsele laba, hoy tou menge peneh, te kras mer, kova vell moulo dino! Tou, ab zoreles oun ma traash!”

Jump to: Chapter 2 →