Joshua 12

Romani Sinte 2024 (O Debleskro Lab 2024 (Sinte-Manouche))

← Chapter 11 Jump to: Chapter 13 →

1Oun kalla hi kol bare raya, pral kolende i Israelitarya i zorleder van, oun lengre themma dren lan. Douy his i raya pral o them ap koy rig o panyestar Yordan, kay o kham pre djala, mank o pani Arnon oun koy berga, hoy kharell Hermon, ninna pral koy tseli tala ap koy rig o panyestar Yordan, kay o kham pre djal.

2Yek kol bare rayendar his o Sihon. Yob his o ray pral i Amorarya, oun djivas an o foro Heshbon. Leskro them his čiddo mank o foro Aroer, hoy pash ko pani Arnon čiddo hi, foun mashkral an i tala bis pash o pani, hoy kharell Yabbok. Ap o vavar rig o panyestar Yabbok hi o them Ammon. An o them o rayestar Sihon his ninna o paash them Gilead.

3O Sihon his ninna o ray pral o them, hoy ap koy rig o panyestar Yordan čiddo hi, kay o kham pre djal, foun o pani Génésareth bis pash o Londo Baro Pani, kay o drom pash o foro Bet-Yeshimot djal oun doureder kote, kay o kham pralstounes tardo hi, bis tele pash koy berga, hoy kharell Pisga.

4Ko vavar baro ray his o Og, ko ray pral o them Bashan. Yob djivas an o foro Astarot oun an o foro Edrei, oun his yek, kay kol bare menshendar pral ačan, kay venn rise kharedo.

5Yob his o ray pral i berga Hermon oun pral o foro Salka, oun pral o tselo them Bashan bis kote, kay i themma Geshour oun Maaka čiddo hi. Oun an o them o baro rayestar Og his ninna o paash them Gilead bis pash o them, kay o Sihon o baro ray his, kova, kay djivas an o foro Heshbon.

6Kalla his kol douy bare raya, kolentsa i Israelitarya pen kouran oun i zorleder van. Lengro pralstouno his o Mose, koles o baro Debleskro vast his. Oun yob das ko them i menshende dran i khera Ruben oun Gad oun kolen dran o paash kheer Manasse.

7Har o Yosua o pralstouno pral i Israelitarya his, kouran le pen kol bare rayentsa oun lengre lourdentsa an ko them, hoy ap kay rig o panyestar Yordan čiddo hi, kay o kham tele djal. Oun i Israelitarya van i zorleder, oun lan kolengro them dren. Kava them hi čiddo mank o foro Baal-Gad an i tala Libanon oun i berga Halak, hoy pre djal pash i berge Seir. Oun kava them, hoy yon dren lan, das o Yosua i menshende dran i vavar khera, kay van o Israeleskre čavendar, haki familya peskro kotar,

8an o pralstouno them, oun an o telstouno them, an koy tala, kay o pani Yordan nashell, oun an o them, hoy langs o panyeste pre djal, ninna an o divyo them, oun an o moulo them Negev. I menshe, kay kote djivan, his i Hetarya, i Amorarya, i Kanaanitarya, i Perisarya, i Hivarya oun i Yebousarya.

9I bare raya, kolengre themma i Israelitarya penge dren lan, djivan an kal forya: Yericho oun Ai, hoy pash o foro Betel čiddo hi,

10Yerusalem, Hebron,

11Yarmout, Lakish,

12Eglon, Geser,

13Debir, Geder,

15Libna, Adullam,

16Makkeda, Betel,

17Tapoua, Hefer,

18Afek, Sharon,

19Madon, Hazor,

20Shimron-Meron, Akshaf.

21Oun Taanak, Megiddo,

22Kedesh, Yokneam pash i berga Karmel,

23Dor pash o baro pani, Goyim an Gilgal,

24oun Tirza. Oun kol tsele bare raya his khetne 31 (triyanda-te-yek).

← Chapter 11 Jump to: Chapter 13 →