Psalms 89

Romani Sinte 2024 (O Debleskro Lab 2024 (Sinte-Manouche))

← Chapter 88 Jump to: Chapter 90 →

1Givede laba, hoy o Etan dran i familya Esra pre-činas.

2Hako tsiro kamau te givell pral o lačepen, hoy o baro Devel men dell. Lauterenge kamau te penell, har yob pash peskre menshende rikrell.

3Kova hi hoy me penau: Hako tsireske ačell leskro lačepen, yaake rah har dell o bolepen, rikrell yob peskro lab.

4Yob penas: “Miri sovel dom man koleste, koles me mange vin rodom: Me dom miro lab miro boudepaskro, o Davideste:

5I menshe, kay toutar venna, hako tsireske yon ačenna. Dran tiro kheer i bare raya venna, oun hako tsiro i raya ačenna.”

6Baro Devel, o bolepen sharell, hoy tou an tiri zoor lauter kral, I bolepangre sharenn, har hako tsiro pash tire menshende rikral.

7Koon an o bolepen hi yaake har tou, maro baro Devel? Havo Devel nay vell yaake har maro baro Devel?

8Kote, kay i bolepangre khetne venn, o Deblestar yon darenn. Kolla lauter, kay hi troul leste, hi dareno tardo glan o baro Debleste.

9Tou baro Devel oun ray pral o bolepen oun i phoub, koon hi yaake zorelo har tou? Koon rikrell yaake pash peskre menshende har tou?

10Tou hal o ray pral o baro divyo pani. Yob te hadell pes, kreh tou, te djal lo tele.

11O baro panyeskro sap Rahab dal tou moulo, oun kolen, kay touke čilačepen kaman, tradal tou krik.

12O bolepen, tiro hi lo, oun i phoub, tiri hi li, oun tou kral lauter, hoy dren hi.

13Ko them, kay o kham gar tardo hi, tou kral les. Ninna ko them, kay o kham pral tardo hi, tou kral les. Koy berga Tabor oun i berga Hermon sharenn tout i barhtyatar.

14Tout hi i zoreli moussi, tiro vast hi zorelo, oun pre hadedo tiro čačo vast, te sikress tiri zoor pral i menshende.

15O čačepen pral i menshende rakreh, oun čačepaskre laba lenge peneh. Doleske ačeh tou o baro ray. An lauter, hoy kreh, dikah tiro lačepen, oun har pash mende rikreh.

16Baro Devel, har barhtelo hi kol menshe, kay sharenn tout i gilyentsa, kay djivenn an tiro lačepen!

17O tselo dives hi le barhtelo pral toute. O čačepen, hoy tou len deh, krell len baro.

18Tou kokres hal lengro raylepen oun lengri zoor, oun dran tiro lačepen nay hadah mare sherya.

19Baro Devel, tou dal men koles, kay ap mende garda della. Tou, o Devel pral o Israel, rodal les vin, te vell lo maro baro ray.

20Glan i rah tsiro rakral tou ap yekeste tire menshendar an i visiona oun penal: “Me dom miro vast i čačo morsheste, te vell lo ap t'mari rig. Me rodom les vin dran mire menshende, te vell lo baro ray.

21Me hatsom o Davides, miro boudepaskro. Me makom les miro djeteha, te vell lo baro ray.

22Miro vast rikrell les, oun miri moussi krell les zoreles.

23Kek, kay ap leste djal, vell o zorleder pral leste, oun kek čilačo nay hadell pes pral leste.

24Me kamau kolen khetne te stakrell, kay ap leste djan, oun kolen, kay leske čilačepen kamenn, dau me an i phoub.

25Hako tsiro rikrau pash leste, oun hom leske lačo. Me krau les bareder har kolla, kay troul leste hi.

26Me dau les penepaske pral ko tselo them mank o baro pani oun o lengsto pani Eufrat.

27Yob penell ap mande: Tou hal miro dad, miro Devel, kova, kay rikrell peskre vasta pral mande oun vell ap miri rig.

28Oun me krau, te vell lo miro phoureder čavo, oun o pralstouno pral i bare rayende ap kay phoub.

29Hako tsiro ačell miro lačepen ap leste, oun miro lab, hoy leske sovel dom, rikrau me.

30Hako tsiro vell yek leskre čavendar, kay pal leste venna, o baro ray pral o them, yaake rah har o bolepen koy hi.

31Leskre čave, te moukenn le miro drom, oun djan gar pal miro čačepen,

32oun krenn gar, hoy lendar kamau, oun rikrenn pen gar ap mire laba,

33palle dau len dava lengri doshake, oun douka lengro čilačepaske.

34Miro lačepen lau lendar gar krik, oun miro lab, hoy len dom, phagau me gar.

35Koy sovel, hoy lenge dom, phagau gar. Oun kol laba, hoy dran miro mouy djan, krau me gar vavarčandes.

36Yek kopo dom me man sovel, oun rhorhau o Davides gar: Yaake har čačo hi, kay hom o Devel, yaake hi čačo,

37te venn o Davidestar bare raya an hake tsirya, yaake rah har o kham koy hi,

38oun o čon ap o bolepen tardo hi, oun dikell, hoy ap kay phoub djala.”

39Kanna, baro Devel, čival tou les pale, koles tou vin rodal, te vas lo baro ray, Tou moukal les te perell, oun hal rhoyedo ap leste.

40Tou phagal tiri sovel, hoy tiro boudepaskres dal. Leskri rayeskri stadi vitsral ap i phoub, an i čik.

41Leskro foro kral tou paash, oun kol bare zorele khera dal an kotya paash.

42Lauter, kay ap o drom djan oun les dikan, čoran les vin. Kolla, kay langs leste djivenn, san pal leste.

43Kolla, kay ap leste djan, moukal, te hadenn le pen. Oun kral kolen barhtelo, kay leske čilačepen kamenn.

44An o kourepen his leskro rharo bouder gar zorelo. Oun tou moukal o Davides gar o zorleder te vell.

45Tou lal lestar o raylepen, oun leskri rayli beshepaskri stakral an i phoub.

46Glan o tsiro moukal tou les phouro te vell, oun anal ladj ap leste.

47Baro Devel, har rah kameh tout gomme te khatrell? Har rah moukeh tiri rholi te rhačrell har i yag?

48Tou djineh, har tikno miro djipen hi. Ma biste, har sik i mensho bouder gar kay hi! Tou kokres kral les yaake.

49Kek mensho hi koy, kay hounte merell gar. Kek nay lell peskro djipen vin dran o merepen.

50Baro Devel, glan i rah tsiro dal tou men tiro lab, te čivess tiro lačepen ap mende. Hoske rikreh tou gar koy sovel, hoy dal o Davideste?

51Ma biste koy ladj, hoy hi ap mande, tiro boudepaskro! Dik, har hidjrau ko tselo praasepen kolendar, kay tout gar prindjrenna.

52Baro Devel, kolla, kay tout gar kamenna, praasenn man, o baro rayes, koles tou touke vin rodal.

53Sharedo vell o baro Devel hako tsireske. Amen. Ava! Amen.

← Chapter 88 Jump to: Chapter 90 →