Song of Solomon 2

Romani Sinte 2024 (O Debleskro Lab 2024 (Sinte-Manouche))

← Chapter 1 Jump to: Chapter 3 →

1I tikni blouma hom me, har hi le tardo ap o telstouno them Sharon, i lilya an i tala.

2Ava, har i lilya – i lilya mank i soubyengre bourra, yaake hi miri pirni mank i čende.

3Har i phabyengro rouk mank i divye rouka an o veesh, yaake hi miro pirno mank i terne morshende. Barhteles hom beshdo an leskro shatto, oun leskre phabya hi goudlo mange.

4Yob anas man an o molyengro kheer, oun čakras man peskro kamlepah.

5Krenn man pale zoreles drakentsa, denn man nevi zoor phabyentsa! Miro kamlepen touke krell man nasselo.

6Leskro servo vast hi tel miro shero čiddo, oun leskro čačo vast taprell man trouyel.

7T'mer ča dran o foro Yerusalem, i vesheskre bouzya oun i tserfe shounenn, har mangau t'men: Moukenn men kokres yaake rah har khetne ham, bis te stah pre.

8Miro pirno dell gole pal mande! Dik, oke vell lo, oun stell pral i bare oun tikne berge.

9Miro pirno hi har i terni vesheskri bouzni har i terno tserfo. Kate hi lo! Pal maro kheer! Oun dikell an i vorhni, mank i kashta dren.

10Miro pirno dell pal mande gole: Ste pre, miri pirni, miri shoukester, oun ab!

11Dik, o vend hi bouder gar, oun o brishin djas peske.

12I bloume djan pre an o them, O tsiro o gipaske hi koy, oun i čirkle moukenn pen te shounell an maro them.

13I fayge venn baro ap o rouk, oun i drakengre rouka soungenna yaake goudlo. Ste pre, miri pirni, miri shoukester, oun ab mantsa!

14Miri tauba, ma khate tout glan mande, har i čirklo khatrell pes mank i bare barra, an o khatepen ap i berge! Mouk man tout te dikell, mouk man tout te shounell! Goudlo hi tiro rakepen, oun kamles dikeh tou vin.

15Taprenn menge i divye djoukle, kol tikne divye djoukle, hoy krenn o molyengro them paash! Mare drakengre rouka hidjrenn knospe.

16Miro pirno hi miro, oun me hom leskri. Yob hatsell peskri barht mank i lilya.

17O dives te vell shila, oun o kham djal tele, ab pash mande, miro pirno! Ab sik har i vesheskri bouzni, har i terno tserfo ap i barrengre berge!

← Chapter 1 Jump to: Chapter 3 →