Song of Solomon 6

Romani Sinte 2024 (O Debleskro Lab 2024 (Sinte-Manouche))

← Chapter 5 Jump to: Chapter 7 →

1Kay djas kanna tiro pirno koy, tou shoukester mashkral i djouvyende? Havo drom nashas tiro pirno, te nay rodas les touha?

2Miro pirno djas tele an peskri baar, kote, kay i soungepaskre bourra tardo hi, te vell lo barhtelo koy, oun te lell lo peske lilya khetne.

3Miro pirno hi miro, oun me hom leskri. Yob hatsell peskri barht mank i lilya.

4Shoukar hal tou, miri pirni, har ko rayeskro foro Tirza, oun kamlo har ko foro Yerusalem. Te dikau tout, ačell mange o rakepen krik.

5Ma dik yaake ap mande! Tire yaka krenn man dineles! Tire balla hi har i kale bouzya, kay stenn tele i berga Gilead.

6Tire danda hi parno har bakre, kay venn vin kotar, kay le thodo van. Tire tsele danda hi shoukar tardo, oun i tsele pralstoune danda oun telstoune danda hi koy.

7Lolo har i phabi hi tire čamya pal tiro diklo.

8Shob-deesh romya hi o baro rayes, oun orhta-deesh vavar djouvya, oun yaake boud ča, te nay djinell kek, kitse yon hi.

9Yek kokres hi miri tauba, miri goudli. Lakri dat hi kek vavar čay. Lake hi li i lačeder čay. I vavar ča dikan lat oun penan: Har barhteli hi li! O baro rayeskre romya oun vavar djouvya dikan lat oun sharan lakro shoukapen.

10Dikenn kolat, kay stell pre har o nevo dives, shoukar har o čon hi li, oun djoudjo har o kham! Koon dikell lat, koleske ačell o rakepen krik.

11An i roukengro baar djom tele, te dikap, har i rouka zenelo venn, oun har i drakengre rouka neve patria lenn, oun har i phabyengre rouka tikne phabya hidjrenn.

12Hoy djal mantsa? Miro dji nashell pal toute, har te djoms an o rayeskro vourdin.

← Chapter 5 Jump to: Chapter 7 →