Song of Solomon 8

Romani Sinte 2024 (O Debleskro Lab 2024 (Sinte-Manouche))

← Chapter 7 Jump to:

1Kamoms te vals mange har i phraal, i čavo miri datar! Hatsoms tout kaymone vin, nay čoumroms tout, oun kek nay vals rhoyedo ap mande.

2Me loms tout pash o vast, oun anoms tout khere pash mande, an miri dakri isema, kay boldo vom. Me doms tout miri feteder mool, oun miri phabyengri mool.

3Leskro servo vast hi tel miro shero čiddo, oun leskro čačo vast taprell man trouyel.

4T'mer ča dran o foro Yerusalem, me mangau t'men o djiyestar: Moukenn men kokres, yaake rah har khetne ham, bis te stah pre.

5Koon hi koya, kay vell pre dran o moulo tato them, moussi an moussi peskri pirneha? Tel o phabyengro rouk djangrom tout, kote, kay tiri day touha vavarčandes vas, oun tou boldo val.

6Čin miro lab ap tiro dji! Mouk man har i goustri ap tiro vast te vell! Te kamenn pen douy, hi lengro kamlepen zoreles har o merepen, oun rikrell len pandles har o moulengro them. Len hi i dji yek o vavareske, hoy rhačell zoreles har i yag o baro Deblestar.

7Ninna boud panya nay krenn o kamlepen gar vin, oun i zorele panya nay hidjrenn o kamlepen gar krik. Te kamals yek o kamlepen te ginell, oun dals peskro tselo bravlepen koleske, sans i menshe les vin.

8Men hi i tikni pheen, koy hi yaake terno, te nay romedinerell li gar, Hoy te kras mari phenyah ap ko dives, kay vell yek te romedinerell lo lat?

9Te hi li har i massouri, krah lat shoukar kouč roupeha. Te hi li har i voudar, pandah ko voudar zorele činle kashtentsa.

10Me hom i massouri, oun mire čoučya hi har turme. Doleske dikell lo ap mande har ap yekate, kay anell leske barht.

11O Salomes hi i kotar phoub ap i berga Baal-Hermon, Kote hi drakengre rouka tardo. Koy kotar them das lo kol harhende an i vasta. Hakeno lendar hounte playsrals i drakenge, hoy bikrals lo, i zero kotya roup.

12Salomo, tout nay vell kol zero kotya roup, oun douy-sheel nay venn i harhen! Man hi miro kotar them mire drakentsa!

13Tou, kay hal beshdo an i baar, de man gole pash toute! Mire mala hi koy oun kamenn tout te shounell.

14Naash, miro pirno! Ab sik har i vesheskri bouzni oun har i terno tserfo ap i berge, kay i bourra tardo hi, hoy soungenna lačo.

← Chapter 7 Jump to: