1 Corinthians 5

Sasak

← Chapter 4 Jump to: Chapter 6 →

1Tiang setetune sampun nerimaq laporan bahwe léq antare side araq perbuatan-perbuatan cabul saq langsot gati: Araq léq antare side saq bezinah kance inaq téréqne, padahal dengan-dengan saq ndéq kenal Allah ndéq gawéq hal maraq nike.

2Timaq maraq nike, masih doang side sombong. Sebalikne side harus sedih, dait sugulang dengan saq gawéq hal nike léman tengaq-tengaq side.

3Secare lahiriah tiang jaoq léman side pade, laguq secare batin tiang araq léq tengaq-tengaq side pade. Jari tiang mélé ngelaksaneang maraqne tiang araq léq antare side, “Siq peséngan Junjungan Saq Mulie Deside Isa Almasih, tiang nyatayang bahwe dengan saq sampun gawéq perbuatan saq kotor nike, harus tehukum!” Lamun side pade bekumpul anggep bahwe tiang araq léq antare side léq dalem roh, dait siq kuase Junjungante Saq Mulie Deside Isa Almasih,

5side pade harus nyerahang dengan nike ojok Belis adéq awak dengan nike binase dait siq care nike rohne teselametang léq jelo kerauhan Junjungan Saq Mulie Deside Isa.

6Side pade ndéq patut merase sombong. Sang side pade sampun nenaoq, “Ragi ruti saq sekediq miaq selapuq adonan jari mbal!”

7Keranaq nike, tetéh juluq ragi ruti saq masih araq, nike ragi dose, adéq side pade jari maraq adonan saq baru, bersi léman ragi dose saq laéq, dait tiang nenaoq bahwe side pade mule maraq nike. Séngaq, perayaan Paskahte sampun siep, lantaran Almasih saq jari anak dombe Paskahte, sampun tesembeléh.

8Jari, silaq ite rayeang hal nike kadu ruti saq ndéq beragi, ruti saq jari lambang kemurnian dait selapuq saq teterimaq siq Allah. Ndaq ite rayeang hal nike kadu ruti saq teragiq siq ragi ruti saq laéq, nike ragi dose dait kejahatan.

9Léq dalem surat tiang saq piranan, tiang badaq side adéq ndaq begaul kance dengan saq gawéq cabul.

10Maksut tiang ndéqne dengan saq gawéq cabul, atao serakah, atao penipu atao penyembah berhale saq tetu-tetu ndéq kenal Allah. Ndéqne ie pade saq tiang maksut; séngaq lamun side pade ndéq mélé rapet kance ie pade, make side pade harus sugul léman dunie niki.

11Maksut tiang, bahwe side pade ndaq begaul kance dengan saq ngaku diriqne semeton seiman, laguq dengan nike perbuatanne cabul, atao serakah, atao nyembah berhale, atao girang pitnah dengan, atao tukang bowos, atao pemalingan. Kance dengan saq maraq nike, ndaq gati side tokol atao bekelor bareng-bareng kance ie!

12Mule jari ngadilin ie pade saq ndéq termasuk dalem jemaah ndéqne urusan tiang. Tekan side mésaq cume gen ngadilin dengan saq araq léq dalem jemaah? Dengan-dengan saq ndéq termasuk dalem jemaah gen teadilin siq Allah mésaq. Léq Kitab Suci tetulis, “Sediq dengan jahat léman side pade.”

← Chapter 4 Jump to: Chapter 6 →