Proverbs 16

Santali Bible (সান্তালী বাইবেল)

← Chapter 15 Jump to: Chapter 17 →

1Manwa do mon monteye ponthayeda, menkhan mocate ona sodorokʼ reakʼ ektiạri do Probhu Isor ṭhen khonge hijukʼ kana.

2Hoṛakʼ do acʼakʼ joto horge acʼ nońjorre saphagetaea, menkhan jiu tulạ bikʼḍạuicʼ do Probhu Isorge.

3Amakʼ kạmiko do Probhu Isorge soprotaeme; onate amakʼ ponthako ṭarhaokʼtama.

4Probhu Isor do jotowakʼe benao akada ona reakʼ nij jos lạgitʼ; Ar bedhoromicʼ hõ ghoṭna din lạgitʼ.

5Bạḍại monan hoṛ do Probhu Isore hirkhạwako kana; khạṭige baḍaepe onko do sạjạiko ńama.

6Pạtiạr ar sạriyakʼtetʼ hotete bedhorom do pharakokʼa; Probhu Isor botorae hoṛ do bạṛicʼ khone sahaṛokʼa.

7Manwa jion ńelte tinre Probhu Isor doe kusikʼa unre uni do acʼren bạiriko hõ sulukteye girobas ocokoa.

8Behokakʼte ḍher arjao khon hokte thoṛa arjaoakʼge bhagea.

9Manwa do acʼakʼ hor tearjoṅ reakʼe ponthayeda, menkhan uniyakʼ taṛam do Probhu Isorgeye sojheyetʼtaea.

10Rajakʼ luṭi reakʼ katha do jiu eserteakʼ katha kana; bicạrre uniyakʼ katha do bae kạiya.

11Sạri tulạ ar ḍạnḍi do Probhu Isor khonakʼge; ar thạilạkʼ reakʼ sạri baṭkharako do uniyakʼ mẽtʼre bhagegea.

12Raj lạgitʼ behokakʼ kạmi do hirkhạwakʼ kana, ente hok reakʼ kạmi hotete siṅghạson do ṭarhao tahena.

13Dhoromkoakʼ luṭige raj doko rạskạ ocoyetʼkoa; ar sạri katha roroṛ hoṛge raj doko kusiaea.

14Rajakʼ raṅgao do moronren goḍet leka, menkhan ạkilan hoṛ do raṅgaoe thir ocoya.

15Rajakʼ mẽtʼãhã kharsalen khan jiwi bańcaokʼa; uniyakʼ daya do sãwãe reakʼ dakʼ rimil lekage.

16Sona khon ạkil hameṭ joṅ do bhagea! Ar rupạ khon buj bachao joṅ hõ bhagea!

17Bạṛicʼ khon sahaṛ tahenge dhoromkoakʼ hor do; Okoe hoṛ acʼakʼ jion reakʼ hor secʼe moneyakʼ uni do acʼakʼ jiwiye rukhiyạitaea.

18Bạḍại do bạṛicʼakʼe ạguiya ar phulạukʼ mon do maraokʼge.

19Bạḍạiko sãote luṭakʼ jinis hạṭiń joṅ khon mạ̃hir monte santao ocokʼko sãote tahenge bhagea.

20Okoe hoṛ Isorakʼ kathae luturakʼkan uni do bhạlại hoyokʼtaea, ar okoe Probhu Isor cetanreye ṭehãḍokʼkan uni doe bhạgangea.

21Okoeyakʼ ontorre ạkil menakʼ uni do budane ńumogokʼa, ar heṛem kathate jãhãeye cetʼae khan uni do ạkil ḍherokʼtaea.

22Ạkil do jion reakʼ jharna kana okoeyakʼ buj menakʼtae; ar orlo hoṛ do acʼakʼ lelhatetʼtegeye sạjạiyokʼkana.

23Ạkilan hoṛkoakʼ ontor do uniyakʼ mocae ạyuretʼtaea, ar onate uniyakʼ cecetʼakʼte eṭakʼkoakʼ ạkil do ḍherokʼkana.

24Heṛem kathako do dumur chata leka; ontor lạgitʼ do heṛemgea ar hoṛmo mońjgeye dohoya.

25Mitʼṭecʼ hor menakʼa okaṭakʼ do manwakoakʼ mẽtʼre ṭhik bujhạukʼkan, menkhan ona reakʼ mucạtʼre do moron menakʼa.

26Reṅgecʼ do manwa artetʼgeye khaṭao ocoyea; ar uniyakʼ reṅgecʼ iạteye onka ocoyea.

27Nicạṛ hoṛ do bạṛicʼ kạmi lạgitʼ phundiko aṭaoa; onkoakʼ kathako do jhạusạukʼ kan seṅgel leka.

28Phẽpṛakʼkan hoṛ do jhogṛae janam ocoya, ar okoe nindạu kathae roṛ uni do gate talare phaṭole dhoraoa.

29Santaokan hoṛakʼ jion ńelte eṭakʼko do laloc hecʼakoa ar bạṛicʼ horteko calakʼa.

30Ripitʼetʼkan hoṛ do bạṛicʼakʼkoe moneyakʼa; ar luṭiye lạṭum hapekakʼ hoṛ do bạṛicʼakʼe rikạyeda.

31Pạnḍu upʼ do ṭhonok reakʼ mukuṭ kana; ona do dhorom jionrege ńamokʼa.

32Okoe usạrate bae raṅgao hodokʼ uni do lạṛhại bir khon hõe bhagegea; okoe nagrahae hatetʼkan ona khon okoe apnare sambṛaokʼkan unigeye bhagea.

33Hoṛko doko gulibãṭeda, menkhan ona reakʼ nitokʼ do Probhu Isorgeye ṭhikeda.

← Chapter 15 Jump to: Chapter 17 →

Recommended Reading

Commentary Proverbs Commentaries → Devotional Proverbs Devotional Guide → Get This Bible Santali Bible (সান্তালী বাইবেল) Study Bible →