Psalms 119 — Santali Bible (সান্তালী বাইবেল)

1Bhạgangeako onko do, okoe sạbitko colonetʼkan ar Probhu Isorakʼ hukum lekako calakʼkan.

2Bhạgangeako onko do, okoe uniyakʼ kathako ańjometʼkan ar goṭa ontorte uniyakʼ sana lekako calakʼkan.

3Onko do jãhãnakʼ bako behoka; onko do Probhu Isorakʼ horregeko taṛama.

4Am do ạn ạrikom ṭhik dohoakada jemon joton salakʼ onale manao.

5Ohae! Amakʼ ạn leka calakʼ lạgitʼ ińakʼ monre diṛho akae jemoniń tahen.

6Enḍekhan amakʼ sanam hukumkoń manao iạte iń do bạń lajao ocokʼa.

7Amakʼ dhoromte perecʼ ạn ạri reakʼ sikhạunate khạṭi ontorte amiń sarhaomea.

8Iń do amakʼ ạn lekageń calakʼa; ar bạń bạgi giḍimea.

9Juạn do cekate acʼakʼ jion khạṭiye doho daṛeketaea? Uni do eken amakʼ kathako leka senakʼ iạtegeye daṛeakʼa.

10Ińakʼ goṭa ontorte iń do am baḍaeme lạgitʼ iń ahkaokʼ kana; amakʼ hukum bahre do alom dãṛã ocoyińạ.

11Amakʼ katha do ińakʼ ontorreń dohoakada, jemon am upạrte aloń kại.

12E Probhu Isor, am dom bhạgangea. Amakʼ ạnko cetʼạńme baṛe.

13Amakʼ moca khon okako ạn oḍokokʼkan ona do ińakʼ mocageye sodortama.

14Manwa damanakʼ dhone ńam lekhan cetʼlekae rạskạkʼ, onkage amakʼ katha manaote iń doń rạskạkʼ kana.

15Iń do amakʼ ạn ạriko reaṅiń ganḍonokʼ kana, ar amakʼ hor reakʼkoń moneyakʼ kana.

16Amakʼ ạnrege rạskạ doń ńameda; ar amakʼ katha do bạń hiṛiń daṛeakʼ kana.

17Amren nui golam baṛe bhạlạiyeme jemon jiwetʼiń tahen ar amakʼ katha lekań sen daṛeakʼ.

18Ińakʼ mẽtʼ baṛe jhicʼkạtińme jemon amakʼ cecetʼakʼ talare hahaṛawakʼko reaṅ jemoniń ńel daṛeakʼ.

19Iń do dhạrtire girobas akan mitʼṭen porjạt hoṛ kạnạń; amakʼ hukum do iń khon alom danaṅ dohokakʼa.

20Amakʼ ạn ạriko baḍae lạgitʼ jao okte ińakʼ jiwi do talga tạwạgokʼ akantińạ.

21Am do bạḍại hoṛkom dhomkaoetʼkoa; onko do sarapan hoṛ kanako, onko do amakʼ hukum khonko chingạu akana.

22Opoman ar landa dhutʼ do iń khon sạṅgińkakʼme, ente iń do amakʼ katha lekań senokʼkana.

23Disạm cakʼlaoko do duṛupʼkate iń birudreko roṛetʼkanre hõ enhõ amren golam do amakʼ ạnregeye ganḍonokʼ kana.

24Amakʼ kathage ińakʼ rạskạ do; onako do solhae imạń kana.

25Iń do dhuṛireń guṛdạu akana; ar amakʼ katha leka nãwã daṛe baṛe danạńme.

26Ińakʼ jion reakʼ sanamakʼ doń baḍae ocoakatʼmea, ar am do ińem roṛ ruạṛ akadińạ; amakʼ ạnre sikhạuna emạńme;

27Amakʼ ạn ạri reakʼ hukumko bhujhạu reakʼ daṛe baṛe imạńme; enḍekhan iń do amakʼ hahaṛa kạmiko reaṅiń ganḍon daṛeakʼa.

28Dukte ińakʼ jiwi do loraokʼkan tińạ; amakʼ katha lekage daṛe danạńme.

29Iń khon eṛeakʼ baṛe sạṅgiń ocoyme; ar dayakate amakʼ cecetʼakʼ danạńme.

30Iń do pạtiạr reakʼ horiń bachao akawana; amakʼ ạn ạriko iń samaṅreń dohoakada.

31E Probhu Isor, amakʼ katha doń sapʼkajak akada; am do alom lajao ocoyińạ.

32Amakʼ hukumko reakʼ horteń ńir calakʼa, ente am do ińakʼ ontorem jhicʼakatʼ tińạ.

33E Probhu Isor, amakʼ ạnko reaṅ cetʼạńme; Jion reakʼ mucạtʼ hạbicʼ iń do ona lekań senokʼa.

34Iń bujhạu lạgitʼ daṛe emạńme, jemon amakʼ hukum lekań senokʼ ar ińakʼ sanam ontorte onań palon daṛeakʼ.

35Amakʼ hukum reakʼ horre ạyurińme, ente iń do onategeń rạskạkʼa.

36Behok lab secʼ ińakʼ ontor alo ạcurokʼma, bickom amakʼ katha secʼgeń ạcurokʼ.

37Eṛeakʼ jinis secʼ khon ińakʼ mẽtʼ do ạcur ruạṛtiń me; ar amakʼ horte calakʼ lạgitʼ nãwã daṛe baṛe danạńme.

38Amren nui golam ṭhen okaṭakʼem gokʼakatʼ ona baṛe purạume, jemon amiń botoram.

39Ińakʼ opoman sạṅgińkakʼme one oka reaṅiń botorokʼkan; amakʼ ạn ạri do sạrige bhagegea

40Amakʼ ạn ạriko doń uihạretʼkana; am dom dhoromgete nãwã daṛe baṛe danạńme.

41E Probhu Isor amakʼ asambheṛ dulạṛ udukʼạńme; amakʼ gokʼakʼ lekage bańcaoińme.

42Enḍekhan okoeko landa dhutʼạńkan onkoń roṛ ruạṛ daṛeakoa, ente iń do amakʼ kathareń bhorsakʼ kana.

43Amakʼ sạriyakʼ reakʼ katha ińakʼ moca khon alogem rejeńa, ente amakʼ ạn ạriko cetanrege iń doń as akana.

44Iń do jao ghuṛi amakʼ hukumiń senakʼkana, ar jaejug hạbicʼgeń manao idiya.

45Iń do begor tạkicʼtege jioniń khemaoa, ente amakʼ ạn ạrikoń uihạreda.

46Am okakom menetʼkan ona do ińren raj samaṅreń roṛa; iń do bạń lajaokʼa.

47Amakʼ sanam hukumkoń pańjaere iń doń rạskạkʼ kana, ente onakoń dulạṛeda.

48Amakʼ sanam hukumko cetanre ińakʼ khạndri ahkaokʼ mon do menakʼa, ente onako doń dulạṛeda; ar amakʼ ạnkoń ganḍonjoṅ kana.

49Amren golam ṭhen okaṭakʼem gokʼakatʼ ona baṛe disạime; ona hotetege am do ińem as akadińạ.

50Amakʼ katha okaṭakʼ nãwã daṛeye danạń, kosṭokʼ oktere onage ińakʼ jiwi raṛecʼ do hoyokʼtińạ.

51Bạḍạiko do ińko landa dhutʼạń kana, menkhan amakʼ hukum khon thoṛa hõ iń do bạń ocokʼakana.

52E Probhu Isor, ḍher din lahare emakʼ amakʼ ạn ạriko reakʼ kathań disạite iń do apnarte jiwi raṛecʼiń ńameda.

53Bạṛicʼ hoṛkoakʼ bạṛicʼtetʼ ńelte ạḍitetʼ iń raṅgaokʼ kana, onko do amakʼ hukumko bạgi akada.

54Iń do tinạkʼ din noa dhạrtiren hoṛiń hoyakan unạkʼ din amakʼ ạnkoge ińakʼ sereń do hoyokʼa.

55E Probhu Isor, iń do amakʼ hukumiń manaoeda, ar ńindạ do amakʼ kathań disạyeda. Ińakʼ heowa do noage je,

56iń do amakʼ ạn ạriko lekań senokʼa.

57E Probhu Isor, am kangeam ińakʼ dhon do; iń do amakʼ katha leka calakʼ reakʼ iń kiriạkʼ kana.

58Iń do mon murukkate amakʼ dayań khojokʼ kana; amakʼ katha leka ińre baṛe dayakʼme.

59Ińakʼ dãṛãn reaṅ hudiskateń ńelakada, ar onate amakʼ katha secʼ ińakʼ jaṅgań ạcur akatʼtińạ.

60Okakom hukum akawạdiń ona do ạḍi usạrageń manao akada, ar baṅgeń bilomleda.

61Bạṛicʼ hoṛkoakʼ baberte iń doń tol akana menkhan amakʼ hukum do bạń hiṛińakada.

62Amakʼ dhoromte perecʼ ạn iạte sarhaome lạgitʼ iń do tala ńindạ hõń beredokʼkana.

63Okoe amko botoram ar amakʼ ạn ạriko manaoetʼ iń doń onko sãotenko kana.

64E Probhu Isor, dhạrti do amakʼ asambheṛ dulạṛte perecʼgea; ar amakʼ ạnko baṛe cetʼạńme.

65E Probhu Isor, amakʼ katha lekage amren nui golam dom bhạlạiyede kana.

66Ińakʼ jemon bhage bud bicạr ar akel hoyokʼ onate iń baṛe cetʼạń me; iń do amakʼ sanam hukumkoreń bhorsa akana.

67Kosṭo ńam lahare iń do eṭakʼ horreń tahẽkan, menkhan ńitokʼ do amakʼ kathareń gobol akana.

68Am dom bhagegea arem bhạlạiyetʼa; amakʼ ạnko baṛe cetʼạńme.

69Bạḍạiko do eṛeakʼte ińko esetʼ ạcur akadińạ menkhan iń do mon muruk kate amakʼ ạn ạrikoń senakʼkana.

70Onkoakʼ ontor do itil leka ạuṛiyakʼgetakoa, menkhan iń do amakʼ sanam hukumre rạskạń ńameda.

71Okaṭakʼ kosṭoń ńamakatʼ ona do iń lạgitʼ bhagege hoyakana; onate iń do amakʼ ạnkoń cetʼ daṛe akawada.

72Amakʼ moca reakʼ hukum iń ṭhen do hajar hajar sona rupạ khon hõ damangea.

73Amakʼ titege ińem tear akadińạ, arem benao rakapʼ akadińạ; iń bujhạu lạgitʼ daṛe imạńme jemon amakʼ sanam hukumkoń baḍae daṛeakʼ.

74Okoe amko botoram onko do iń ńelteko rạskạkʼa, ente amakʼ gokʼakʼreń bhorsa akana.

75E Probhu Isor, ińiń baḍaea amakʼ ạn ạriko do dhoromte perecʼgea; ar amem pạtiạrge iạte ińem duk ocoakadińạ.

76Amren golam ṭhen am dom gokʼakada ar ona lekage amakʼ dulạṛ do ińakʼ jiwiye raṛecʼeda.

77Ińre amakʼ mãyã hijukʼma jemon jiwetʼiń tahen, ente amakʼ hukum doe rạskạ ocoyedeń kana.

78Eṛe katha roṛte ińakʼ lokshan lạgitʼ bạḍạiko doko lajaokʼma; menkhan iń do amakʼ ạn ạriko reaṅgeń ganḍonjoṅa.

79Okoe amko botoram ar amakʼ kathako bujhạu daṛeakʼkan onko do iń ṭhenko ruạṛ hijukʼma.

80Amakʼ ạn ạriko senakʼ jokhecʼ ińakʼ ontor do jemon khạṭi tahen, jemon lajaore aloń paṛaokʼ.

81Am dom rukhiyạyińạ ar ona ńel horte daṛe do komao hijukʼkantińạ; iń do amakʼ katharege asiń dohoakada.

82Amakʼ gokʼakʼ purạukʼ reakʼ ńelhor iạte ińakʼ mẽtʼ do nijor idikʼ kantińạ; iń doń meneda, “Tisokʼ ińakʼ jiwi dom raṛejtińạ.”

83Darkha rasa dohoakatʼ kum cetʼleka dhũạte nosṭokʼ ińhõ onkageń hoyakana; enhõ amakʼ ạn do bạń hiṛińeda.

84Amren golamakʼ bahaokʼ do ar tinạkʼ din? Okoe ińko santaoedeń kan onko do tisem bicạrkoa?

85Bạḍạiko do iń lạgitʼ ghaḍlakʼko layeda; ar amakʼ hukum do bako manaoeda.

86Amakʼ sanam hukumko do pạtiạrgea. Ar hoṛko do eṛe roṛte ińko santaoedeń kana; am do goṛowạńme baṛe.

87Dhạrti khon onko do ińko mohor meṭaoedeń kan tahẽkana, menkhan amakʼ ạn ạri do bạń bạgi akada.

88Amakʼ khạndri dulạṛte am do nãwã daṛe baṛe emạńme, jemon amakʼ moca reakʼ katha lekań sen daṛeakʼ.

89E Probhu Isor, amakʼ goha do sermare jaejug hạbicʼ diṛho akae menakʼa.

90Ar amakʼ pạtiạr do piṛhike piṛhi parom calakʼ kana; am do dhạrtim benaokʼ akada, ar ṭarhao menakʼa.

91Amakʼ ạn ạriko leka teheńhõ jotowakʼ do ṭarhao menakʼa, ente onako do amakʼ gobolrege menakʼa.

92Amakʼ jotowakʼ hukumre rạskạ bạń ńamle khan, iń do dukteń marao cabakokʼa.

93Amakʼ ạn ạriko do tishõ bạń hiṛińa, ente ona hotetege am do nãwã daṛem dan akawạdińa.

94Rukhiyạyińme baṛe, ente iń doń amren kangea; ar amakʼ ạn ạriko secʼ iń mone akawada.

95Bạṛicʼ hoṛko do maraoiń lạgitʼ koyokʼ horre menakʼkoa, menkhan amakʼ kathako iạte iń do khạndriyakʼkoń hudisjoṅ kana.

96Ińiń ńelakada jãhãnakʼ reakʼge puruntetʼ do bạnukʼa, menkhan amakʼ hukumko do joto secʼ khonge purungea.

97Iń do amakʼ hukum ạḍiń dulạṛeda! Ar goṭa dinge onań ganḍonjoṅ kana.

98Amakʼ sanam hukumkoge ińren bạiriko khon akelanicʼe hoyocoyediń kana, ente onako do sanam ghạṛicʼ iń soṅgete tahẽnkana.

99Ińren sanam cecetʼko khon iń doń akelanicʼ kana, ente amakʼ sanam kathako iń doń ganḍonjoṅ kana.

100Umeran hoṛko khon hõ iń do bạ̃ṛtiń bujhạueda, ente iń do amakʼ ạn ạrikoń senakʼ kana.

101Joto lekan kại reakʼ hor khon ińakʼ jaṅga doń ocokʼakada, jemon amakʼ katha lekań sen daṛeakʼ.

102Amakʼ ạn ạri reakʼ hor khon iń do bạń ocokʼakana, ente am do apnarte ińem cetʼakawạdińa.

103Amakʼ sanam gokʼakʼ do ińakʼ alaṅre heṛemgea! Ona do ińakʼ mocare dumur rasa khon hõ heṛemgea.

104Amakʼ ạn ạri khon iń do bicạr reakʼ budiń ńameda, onate iń do sanam eṛeakʼ reakʼ horkoń hirkhạwakʼ kana.

105Amakʼ katha do hor udukʼạń reakʼ diuhe kana, ona do ińakʼ calakʼ hor reakʼ marsalge.

106Iń do amakʼ dhoromte perecʼ ạn ạri manaokate calakʼ reakʼ iń kiriạ akana, ar ona do kajaktegeń kiriạ akana.

107Iń do aema kosṭoń sahao akada; E Probhu Isor, amakʼ katha leka nãwã daṛe baṛe emạńme.

108E Probhu Isor, iń do ińakʼ kusileka okaṭakʼ sarhao reakʼ dãṛẽń samaṅam ona baṛe ataṅtińme, ar amakʼ ạn ạriko cetʼạńme.

109Ińakʼ jiwi do jao ghuṛi cuputʼkateń calakʼkanre hõ, enhõ amakʼ hukum do bạń hiṛińa.

110Bạṛicʼ hoṛ do iń lạgitʼ pạsiko oḍao akada, menkhan iń do amakʼ ạn ạriko khon bạń ocokʼ akana.

111Amakʼ gohawakʼko jaejug hạbicʼ iń ạidạri akawana; onate ińakʼ ontor do rạskạkʼ kana.

112Jao ghuṛi, hẽ mucạtʼ hạbicʼge iń do amakʼ ạnko pańjae lạgitʼ ińakʼ ontoriń lawer akatʼtińa.

113Bar monan hoṛko do bạń kusiyakoa, menkhan amakʼ hukum doń dulạṛeda.

114Amge ińren asray ar ińakʼ ḍhal do; amakʼ katharege iń do asiń dohoakada.

115Ape okoe do bạṛicʼakʼpe kạmikan, ape do iń khon men pharakokʼpe, jemon ińren Isorakʼ hukumkoń doho daṛeakʼ.

116Amakʼ gokʼakʼ leka am do sapʼ dohoyińme, onate iń do jiwetʼiń tahena; amre ińakʼ oka as menakʼtiń ona reaṅ am do alom lajao ocoyińạ.

117Sabeńme, enḍekhan iń do rukhiyạń ńama, ar amakʼ ạn ạriko jaogeń manao idiya.

118Amakʼ ạn khon okoe do sạṅgińteko calakʼkan onko dom nihạ̃t akatʼkoa, ente onkoakʼ phorphundi do ạuṛiyakʼgetakoa.

119Dhạrtiren sanam bạṛicʼ hoṛko do mạilạ lekam pharaketʼkoa, ar onatege iń do amakʼ sanam kathakoń dulạṛeda.

120Am botorte hoṛmo do caṭokʼkantińạ; ar amakʼ ạn ạriko iạte iń doń botorokʼ kana.

121Iń do hok reakʼ iń bicạr akada ar dhoromiń kạmi akada; ar okoe ińko santaoedeń kan onkoakʼ tire do alogem aṛakʼ giḍikạńạ.

122Am do amren golamakʼ bhạlại reakʼ bhar hataome; ar bạḍạiko ṭhen do alom santao ocoyińạ.

123Amakʼ dhorom khạtirte okaṭakʼem gokʼakatʼ ona purạu lạgitʼ ar amakʼ bańcao ńam reakʼ koyokʼ horte ińakʼ mẽtʼkin do nijor akantińạ.

124Amren golam sãote amakʼ asambheṛ dulạṛ lekate beoharińme baṛe, ar amakʼ ạnko hõ cetʼạńme.

125Iń do amren golam kạnạń; bujhạu lạgitʼ daṛe imạńme jemon iń do amakʼ kathań bujhạu daṛeakʼ.

126E Probhu Isor, ńitokʼ do kạmire lagaokʼ reakʼ somoe hoyakana; hoṛko do amakʼ hukumko bebatao akada.

127Onate iń do amakʼ sanam hukumko sona khon, khạṭi sona khon hõ bạ̃ṛtiń dulạṛeda.

128Amakʼ sanam ạn ạriko iń do mońjiń metakʼkana, ar sanam eṛeakʼ horkoń hirkhạwakʼ kana.

129Amakʼ sanam kathako do mońjgea, onatege iń do onań pańjayeda.

130Amakʼ kathako sodorlenre marsale emeda; ona do sojhe monan hoṛkoakʼ buj reakʼ daṛeye emakoa.

131Amakʼ hukumko ńam lạgitʼ iń doń uihạretʼ tahẽkana, ar cahapʼkateń ahkaokʼkan tahẽkana.

132Okoe amko dulạṛme onkore cetʼlekam tahenkan, onkage iń secʼ ạcurokʼme ar iń dayawạńme.

133Amakʼ katha leka ṭhik horte calakʼ lạgitʼ am do ińakʼ jaṅgam kajaketʼtińạ; jãhãn behokakʼ jemon ińre aloe raj daṛeakʼ.

134Santaokan hoṛkoakʼ ti khon chaḍaoińme. Jemon iń do amakʼ ạn ạrikoń manao daṛeakʼ.

135Amakʼ daya reakʼ marsal leka amren nui golamre baṛe paṛaokʼma; amakʼ sanam ạnko cetʼạń me.

136Ińakʼ mẽtʼdakʼ do ạtukʼkantińạ ente hoṛko do amakʼ hukum bako manaoeda.

137E Probhu Isor, am dom dhoromgea; amakʼ bicạr do hok reakʼ kana.

138Amakʼ dhoromte ar maraṅ pạtiạrte am do amakʼ ạn ạrikom emakana.

139Ińren bạiriko do amakʼ kathako hiṛiń akatʼte amakʼ manot rukhiyại lạgitʼ khạndri udgạu iń doe ńam akadińạ.

140Amakʼ katha do khạṭigea mente sạbud akana, onatege amren golam do onae dulạṛeda.

141Iń doń huḍińgea ariń nihạ̃tgea, enhõ iń do amakʼ ạn ạriko bạń hiṛińeda.

142Amakʼ dhorom do jaejug hạbicʼkana, ar amakʼ sanam hukumko do sạrigea.

143Gạr ar kosṭo ińre hecʼ paṛao akana, menkhan iń do joto hukumkogeń kusiyakʼ kana.

144Amakʼ sanam kathako do jaejug dhoromte perecʼgea; ona bujhạu lạgitʼ daṛe emạńme jemon jiwetʼ iń tahẽ daṛeakʼ.

145Ińakʼ goṭa ontorteń hohowam kana; E Probhu Isor, roṛ ruạṛạńme. Amakʼ sanam ạnkoń manaoa.

146Amiń hohowam kana, bańcaoińme baṛe; iń do amakʼ joto kathań senakʼa.

147Ạuri aṅga marsalokʼrege iń do beretʼkate goṛo ńam lạgitʼ iń rakʼeda; amakʼ gokʼakʼ cetanreń bhorsakʼ kana.

148Ńindạ ạuri cabakʼrege ińakʼ mẽtʼ do beṅgedokʼ kana, jemon amakʼ sanam gokʼakʼkoń ganḍon daṛeakʼa.

149Amakʼ khạndri dulạṛ lekate ińakʼ katha ańjomme; E Probhu Isor, amakʼ ạn ạri lekate nãwã daṛe baṛe danạńme.

150Okoe bạṛicʼakʼko kạmikan onko doko hecʼ sorakana; onko do amakʼ hukum khon sạṅgińreko tahenkana.

151Menkhan E Probhu Isor, am do sorre menama, ar amakʼ sanam hukumko do sạrigea.

152Amakʼ goha khon laharegeń baḍae akada je, am do jaejug lạgitʼ onam dohoakada.

153Ińakʼ duk beṅgetʼakʼme ar rukhiyạyińme, ente iń do amakʼ hukumko bạń hiṛińakada,

154Iń secʼ katha baṛe roṛme ar ińiń miridosge ona sạbudme; amakʼ gokʼakʼ lekage nãwã daṛe danạńme.

155Bạṛicʼ hoṛko khon bańcao do ḍher sạṅgińgea, ente onko do amakʼ ạn ạri secʼ bako moneyakʼ kana.

156E Probhu Isor, amakʼ mãyã do bạ̃ṛtigea; amakʼ ạn ạriko leka nãwã daṛe baṛe danạńme.

157Ińren bạiri ar santaokan hoṛkoakʼ lekha do ḍhergea, menkhan amakʼ katha khon iń do bạń ocokʼakana.

158Bepạtiạrko ńelte iń doń hirkhạkʼ kana, ente onko do amakʼ katha leka bako calakʼ kana.

159Ńelme, amakʼ ạn ạriko do tinạkʼ iń dulạṛeda! E Probhu Isor, amakʼ asambheṛ dulạṛte nãwã daṛe baṛe danạńme.

160Amakʼ sanam kathako do sạrigea; amakʼ mitʼke mitʼ dhoromte perecʼ ạn do jaejug hạbicʼ tahena.

161Disạm calaoko do ạuṛiyakʼte ińko santaoedeń kana, menkhan ińakʼ ontorre amakʼ katha lạgitʼ botor menakʼa.

162Lạṛhạire ńamakʼ jiniskote hoṛko cetʼlekako rạskạkʼ, onkage amakʼ gokʼakʼ lạgitʼ iń doń rạskạkʼ kana.

163Eṛeakʼ do kurud ariń hirkhạwakʼ kana, menkhan amakʼ hukumiń dulạṛetʼ kana.

164Amakʼ dhoromte perecʼ ạn ạri lạgitʼ iń do dinre eae dhaoiń gun manao joharam kana.

165Okoe amakʼ hukumko dulạṛetʼ onko do ạḍi sulukko ńama; ar cetʼte hõ onko do bako tohodokʼa.

166E Probhu Isor, amem bańcaoińạ ona asre minạńa, ar iń do amakʼ hukumkoń senakʼ kana.

167Iń do amakʼ sanam kathakoń senakʼkana ariń dulạṛeda.

168Amakʼ ạn ạriko ar sanam kathań senakʼkana, ente ińakʼ jion reakʼ jotowakʼgem baḍaea.

169E Probhu Isor, ińakʼ rakʼjoṅ do am samaṅre seṭerokʼma; amakʼ katha lekate bujhạu lạgitʼ daṛe danạńme.

170Ińakʼ nehõr do am samaṅre tahenma; ar amakʼ gokʼakʼ lekate bańcaoińme.

171Ińakʼ luṭi khon amakʼ sarhao do heḍecʼ oḍokokʼma, ente amge amakʼ ạn reakʼem cetʼạń kana.

172Ińakʼ jiwi do amakʼ katha iạteye sereńma, ente amakʼ sanam hukumko do dhoromte perecʼgea.

173Amakʼ ti do goṛowạń lạgitʼ sapṛao akan tahenma, ente amakʼ ạn ạriko leka senokʼ reakʼ iń goṭa akada.

174E Probhu Isor, amem bańcaoiń iạte iń doń koyokʼ horakada; amakʼ sanam hukumkoge iń ṭhen do rạskạ reakʼ kana.

175Iń bańcao dohoyińme jemoniń gun manao joharam; ar amakʼ ạn ạriko do ińe goṛowạńma.

176Atʼ akan bhiḍi leka iń doń chingạu akana; amren golam baṛe sendra ńameń me, ente amakʼ hukumko do bạń hiṛiń akada.