Psalms 18 — Santali Bible (সান্তালী বাইবেল)

1E Probhu Isor, am kangeam ińakʼ daṛe, ar iń do amgeń dulạṛetʼmea.

2Probhu Isorge ińren usul buru, unige ińakʼ aotan gaṛ ar ińren babańcaoicʼ; ar ińren Isorge ińren usul buru, unirege iń do asrayiń hataoeda. Uni do ińren dhal kanae, rurukhiyạicʼ dereńge, ar ińakʼ asray gaṛge.

3Probhu Isor do sarhao ńam lek kanae, iń do uniń hohowae kana; onate ińren bạirikoakʼ ti khone rukhiyạyińạ.

4Gujukʼ reakʼ baberteń tol akan tahẽkana. ar banbạsiteń toraslena.

5Ar patal puri reakʼ barahikoteń tolakana, gujukʼ reakʼ pạsi do iń lạgitʼ oḍao tahẽkana.

6Iń do muhinre ińren Probhu Isoriń hohowadea ar goṛo ńam lạgitʼ uni ṭheniń rakʼkeda. Acʼakʼ tahen ṭhạ̃i khon uni do ińakʼ aṛaṅe ańjomketʼtińạ; ińakʼ rakʼjoṅ do uniyakʼ luturre seṭerena.

7Unre dhạrti do daldalaoena ar ḍikạ ḍakekʼ ehopʼena, ar buru reakʼ rehetʼko do dalmalaoena; uniyakʼ edrete onako do dal dalaoena.

8Uniyakʼ mũ khon dhũạ do coṭte rakapʼena, ar moca khon ḍahao maraoakʼ seṅgelge oḍokena. Uniyakʼ moca reakʼ seṅgelte koelako jolena.

9Uni do sermae liwetʼketʼteye pheḍ hecʼena; ar uniyakʼ jaṅga latarre do hende rimil tahẽkana.

10Uni do Kerubre decʼkateye uḍạu hecʼena, ar hoe reakʼ phạ̃kṛạ̃kʼteye ạphir hecʼena.

11Uni do ńutteye esetʼ ạcurena; uni beṛhaete dakʼ reakʼ dạriạ hende rimilge tahẽkana.

12Uni samaṅ reakʼ rãt khon ona dạriạ rimil do ocokʼena; arel ar seṅgel aṅgrakoge oḍok hecʼena.

13Probhu Isor do serma khone huḍurkeda; ar maraṅ daṛeyicʼ do arel ar seṅgel aṅgrakore acʼakʼ aṛaṅe ańjom ocokeda.

14Uni do sarkoe aṛakʼketʼte bạirikoe chirchạturketʼkoa, ar bijlikoteye andmandaoketʼkoa.

15E Probhu Isor, amakʼ dhomkaote ar mũ reakʼ sãhetʼte, ot latarre do dakʼ ńelena, ar dhạrti reakʼ rehetʼko hõ oṭakʼena.

16Uni do coṭ khon tiye tiyạrketʼteye sapʼkedińa, ar khạndri dakʼ khone owar rakapʼkedińa.

17Ińren daṛean bạirikoakʼ ti khon ar iń kurudạńko reakʼ ti khon uni doe bańcaokedińa; onkoakʼ daṛe do iń khon hõ ḍhergetakoa.

18Muhinre onko do ińko esetʼ ạcur ledeńạ, menkhan Probhu Isorgeye sapʼ sãohakedińa.

19Uni do mitʼṭecʼ phaelao jaegateye oḍok ạgukedińa; ar ińre kusiye tahẽkante uni doe bańcaokedińa.

20Ińakʼ dhorom kạmi lekatege Probhu Isor doe dan akawạdińa, ar ińakʼ kạmi reakʼ napaetetʼ iạtege kuṛạiye emadińạ;

21Ente Probhu Isorakʼ horrege iń doń dãṛãn kana; bạṛicʼakʼ kạmikate ińren Isor khon bạń ocokʼ akana.

22Uniyakʼ joto ạn-ạriko do iń samaṅre menakʼa; ar uniyakʼ ạn ạri khon do bạń ocokʼ akana.

23Uni samaṅre bin dusạngeń tahẽkana; iń do kại khon hõ pharakreń tahẽlena.

24Onate Probhu Isor do kuṛạiye emakawạdińa uniyakʼ mẽtʼãhã samaṅrege ińakʼ dhorom kạmi lekate ińakʼ mońjakʼ kạmiko iạtege.

25E Probhu Isor, biswạsiko tulucʼ do biswạstegem beohareda ar dhoromko tulucʼ do dhoromem beohareda,

26Ar khạṭiko tulucʼ do khạṭigem beohareda, ar phẽpṛakʼko do amakʼ bud reakʼ phundim udukʼako kana.

27Am do nacar jạtrenkom rukhiyạyetʼkoa ar bạḍạiko dom tumbutʼ ocoyetʼkoa.

28Amge ińakʼ jion reakʼ diuhe dom jol dohoyetʼ kana; ińren Probhu Isor do ińakʼ ńute marsalketʼtińạ.

29Amakʼ goṛote lạṛhại phạdko cetanre iń do jhãpiń em daṛeakʼa, ińren Isorakʼ goṛote iń do pạcrikoń don parom daṛeakʼa.

30Isorakʼ horre jãhãn bin sạbitanakʼ do bạnukʼanaṅ, Probhu Isorakʼ katha do khạṭi mente sạbud akana. Uni do acʼre hirlạjoṅ kan sanam hoṛren ḍhal kanae.

31Probhu eskar chaḍa ar okoe Isor menaea? Aboren Isor chaḍa cetʼ jãhãn aotan buru menakʼa?

32Isorge ińakʼ ḍanḍare daṛeye imạńkana unige ińakʼ horkoe sạbit ocoyetʼtińạ.

33Uni do posta-jel leka jaṅga reakʼ daṛeye emakawạdińa; ar sanam usul jaegakoreye teṅgo ocoakadińa.

34Uni khonge ińakʼ ti do lạṛhạiye cetʼakada, onate ińakʼ ti do pitạl reakʼ akʼe gakʼ daṛeakʼa.

35E Probhu Isor amakʼ rurukhiyạ ḍhal do ińem emakawạdińa, ar amakʼ jojom ti doe sapʼ akadińạ; amakʼ joton iạte iń do maraṅiń hoyakana.

36Am do ińakʼ taṛam horem phaelao akada, onate jaṅga do baṅ tohotʼlentińa.

37Ińren bạirikoń khudạuketʼkoa ar onko doń sapʼtiyokʼketʼkoa; ar ạuriko gocʼ cabakʼ hạbicʼ bạń ruạṛlena.

38Onko doń marao giḍi akatʼkoa, ariń gejer caba akatʼkoa, ar alo jemonko beretʼ daṛeakʼ; ente ińakʼ jaṅga latarreko ńur akana.

39Amge ińakʼ ḍanḍare lạṛhại lạgitʼ daṛeyem emakawạdińạ, ar iń upạrtenko do ińakʼ jaṅga latarrem dohoakatʼkoa.

40Ińren bạiriko do iń ṭhen khonem laga ńirketʼkoa; okoe ińko kurudạńkan onko doń marao caba akatʼkoa.

41Onko do goṛo ńam lạgitʼko hohoyetʼkana, menkhan onko rukhiyạko lạgitʼ do celege bako hecʼlena. Onko do Probhu Isor ṭhenko dohaekeda, menkhan uni do bae roṛ ruạṛatʼkoa.

42Hoete oṭaṅokʼkan dhuṛi leka onko doń holoṅ ḍigirketʼkoa, ar ḍahar reakʼ losotʼ lekań giḍikatʼkoa.

43E Probhu Isor, ińren huhulkan hoṛko khon am dom bańcao akadińạ, ar eṭakʼ jạtrenko cetanre am do matha mentem dohoakadińạ; okoe bạń orom akatʼko onko hõ iń ṭhen golamko khaṭao akana.

44Onko do ińakʼ katha ańjom torageko bataotińạ; ar bidisiạ hoṛ doko luhum suhumań kana.

45Onko doko tolmojokʼa; ar thar tharaoakʼte gaṛ khonko oḍok hijukʼa.

46Probhu Isor doe jiwetʼgea. Ińakʼ asray cạṭạini do sarhao hoyokʼtae ma, ar ińakʼ bańcaokʼren Isor doe usulokʼma.

47Uni do eṭakʼ jạtrenko iń tabereye ạguyetʼkoa ar iń huyạte unige sạjạiye emako kana.

48Uni do bạirikoakʼ ti khone rukhiyạ edeńkana. E Isor, am do bạiriko khonem usul akadińạ. Ar jor julumkan hoṛko khon amgem rukhiyạ akadińạ.

49E Probhu Isor, ona iạtege eṭakʼ jạtrenko talare amakʼ ṭhonokiń sodortama ar amakʼ ńutumiń maraṅtama.

50Probhu Isor do acʼren raj ḍher dhaoe jitạu ocoyea; acʼren bachao bahal akatʼko hoṛ lạgitʼ, Dạud do uniren bõsko lạgitʼ, uni do jaejug hạbicʼ acʼakʼ dulạṛe udugtaea.