Psalms 44

Santali Bible (সান্তালী বাইবেল)

← Chapter 43 Jump to: Chapter 45 →

1E Isor, sedaere aleren hapṛamko oktere okaṭakʼem cekaletʼ onko reaṅ katha ale do apnarakʼ luturtele ańjomleda.

2Am do amakʼ tite eṭakʼ jạtrenkom laga ńirketʼkote ona jaegare aleren hapṛamkom doholetʼkoa; am do onko hoṛko cetanre nosṭoakʼem ạguleda ar aleren hapṛamkom teṅgo keṭecʼ ocoletʼkoa.

3Onko do akoakʼ tarwaṛete noa disạm do bako ạidạrian tahẽkana, ar akoakʼ daṛete hõ bako jitạu daṛeada; amakʼ daṛe, hẽ amakʼ maraṅ daṛete, ar amakʼ ṭhonoktege ona doko onkaleda, ente onkore amakʼ daya do tahẽkana.

4E Isor, ińren raj do amge; Jakobakʼ jitạukʼ reakʼ do amgem bebosta akada.

5Aleren bạiriko do amakʼ daṛetegele teṅgo daramkoa; ar okoe ale upạrteko teṅgokʼ onko do amakʼ jortegele lebetʼ gańjaokoa.

6Ińakʼ akʼ cetanre iń do bạń bhorsakʼkana, ińakʼ tarwaṛe do bae jitạu oco daṛeạńạ;

7Menkhan amge bạiriko cetanre alem jitạu ocoakatʼlea, ar ale upạrtenko do lajaorem paṛao ocoakatʼkoa.

8Isor iạtege ale do jaogele gorbokʼ kana; jaejug ale do amgele sarhaomea. (Sela)

9Menkhan ńitokʼ am dom bạgi giḍiakatʼlea ar lajaorem paṛao ocoakatʼlea; lạṛhạire aleren palṭonko sãote am do ar bam tahẽnkana.

10Bạiriko samaṅ khonem pạc ocoketʼlea; ale upạrtenko do aleko luṭ akatʼlea.

11Samaṅe lạgitʼ tiyạkʼ idiye bhiḍi leka onkoakʼ tire am dom aṛakʼ akatʼlea ar eṭakʼ eṭakʼ jạtrenko talarem chirchạtur akatʼlea.

12Am do begor damtege amren hoṛkom ạkhriń akatʼkoa; ar noa iạte cetʼ amakʼ jãhãnakʼ lab hoyakantama?

13Aḍepase jạtrenko ṭhen am do alem henosta ocoyetʼlea; ar beṛhaeten hoṛko ṭhen do landa dhudhutʼkom hoyocoakatʼlea.

14Judạ judạ jạtrenko ṭhen aleakʼ ńutum do kạhtukgem hoyocoakada; ar hoṛko do ale ńelte bohokʼko rukuyetʼtakoa.

15Okoe ińko henostayedeń kan arko durnam edeńkan onkoakʼ katha iạte, ar okoe bạiriko iń cetanre hala ruạṛ lạgitʼko duṛupʼ akan onko iạte, iń do lajaoteń unum akana.

17Noako ale cetanre paṛao akante, amle hiṛińakatʼmea ona do baṅa; ar amakʼ bondobosre bepạtiạr akae menakʼlea ona hõ baṅa.

18Am khon aleakʼ ontor do baṅ pạc ruạṛ akantalea; ar amakʼ hor khon aleakʼ jaṅga do baṅ ocokʼ akana.

19Menkhan am do enhõ nonkan mitʼ jaegare alem rạputʼ caba akatʼlea one okare toyokoakʼ ḍerakan; ar ale do kaṛaṅ ńutrem esetʼ ạcur akatʼlea.

20Aleren Isorle hiṛiń akade khan, ar debotako secʼ tile tiạr akatʼtale khan,

21enḍekhan Isor do cetʼ ona bae baḍaekan tahẽkana? Uni ma aleakʼ ontor reakʼ jotowakʼge coṅe baḍaege.

22Menkhan enhõ am lạgitʼge jao ghuṛi aleren jãhãe baṅ jãhãeko gocʼ ocokʼkana, ar hoṛko do gur ocokʼ bhiḍiko lekageko hudisetʼlea.

23E Probhu Isor, ebhenokʼme, cedakʼem jạpitʼ akada? Ma beretʼme, jaejug hạbicʼ do alom bạgi giḍilea.

24Cedakʼ mẽtʼãhã dom betʼ akatʼtama? Aleakʼ duk ar santao reakʼ katha do cedakʼem hiṛiń akada?

25Ale do dhuṛirele sombotʼ hape akana; ar aleakʼ hoṛmo do otre jalatʼ akantalea.

26Dela hijukʼme, ar goṛowaleme; amakʼ asambheṛ dayate chaḍaoleme.

← Chapter 43 Jump to: Chapter 45 →