Song of Solomon 8

Santali Bible (সান্তালী বাইবেল)

← Chapter 7 Jump to:

1Ohae, ińren boeha baṛem tahẽlen khan okoe do eṅgạńakʼ toakine nunu akatʼ! Ar bahrereń ńamlem khan enḍekhan am doń cokʼkema, ar okoehõ cetʼge bako mendaṛekińạ;

2ar iń do horiń udukʼamkea ińren eṅgạńakʼ oṛakʼteń ạgukema, ar am dom cetʼạńkea. Iń do jut so mosola mesalakatʼ darkha rasań ńũ ocokema, ar ińakʼ ḍạlim jo reakʼ ros hõń ńũ ocokema.

3Uni do leṅga tite bohokʼe ãṭhṛẽketʼtińạ, ar jojom tite doe hạṛupʼkedińạ.

4E Jerusalemren kuṛiko, nehõrkateń metape kana, dulạṛ do alope buskuyea ar alope ebhenea uniyakʼ okteko ạuri hoyokʼtae hạbicʼ.

5Acʼren dulạṛiạreye ṭenḍar akan uni hahaṅkar secʼ khon rakapʼ hijukʼicʼ doe okoekana? Apel dare latarreń ebhenketʼmea; amren eṅgam do onḍege bedon rakapʼadete ame janamketʼmea.

6Amakʼ ontorte dohoyińme mohorchap akatʼleka ar amakʼ soporege mohor chapakʼme; ente dulạṛ do moron leka daṛeanakʼ kana, ar kobor leka kumãyãwakʼ kana ahkaokʼ do. Ona do lepʼ seṅgel leka jolokʼtege tahena, ạḍi tạpis lepʼ lekage ona do.

7Aema dakʼ hõ bae ĩṛĩcʼ daṛeakʼa dulạṛ do; ar banbạsi hõ ohoe ḍubạ daṛelea ona do. Dulạṛ lạgitʼ jãhãe acʼakʼ jotowakʼe emlenre hõ ona do nihạ̃t giḍikakʼge hoyokʼa.

8Aleren mitʼṭen huḍiń misera menaetalea, uniyakʼ bạskin do ńit hõ ạuri harakʼtaea. Unire tisokʼ peṛako lagaokʼa enhilokʼ do cetʼle cekaea?

9Uni do pạcriye tahẽlen khan uni cetante rupạ reakʼ pahra oṛakʼle benaokea. Ar duạre tahẽlen khan enḍekhan debdạru kaṭ reakʼ toktate uni do sińkatele dohokea.

10Iń do mitʼṭecʼ pạcri kạnạń, ar ińakʼ bạskin do usul pahra oṛakʼkin lekage. Iń do uniyakʼ nońjorre onkageń hoyena suluke ńamketʼ kuṛi lekage.

11Bakʼal-hamonre Solomonakʼ do mitʼṭecʼ darkha bagwan menakʼa; ona do horhokoe jimạ akatʼkoa. Ar ona jo reakʼ dam lekate mimitʼ hoṛ do gelbar keji rupạ sekelko emokʼa.

12Ińakʼ darkha bagwan menakʼa, ona do ińakʼkangea. E Solomon, ona gelbar keji rupạ do amakʼge tahenma, menkhan bar keji tala do onko lạgitʼge okoe do joko horho kan.

13E bagwanre tahenkạnicʼ, gateko do amakʼ aṛaṅ ańjom lạgitʼko akʼtenkana, ar ińhõ baṛe ańjom ocoyińme.

14E dulạṛiạtiń, dela hijukʼme; jut so mosolate perecʼ buru coṭre selepʼ jel leka, juạn jhaṅkaṛ jel leka baṛe hoyokʼme.

← Chapter 7 Jump to: