Ezra 7

Sindhi Bible (Muslim) (مقدس ڪلام توريت، زبور ۽ نبين جون ٻيو لکتون ۽ انجيل شريف)

← Chapter 6 Jump to: Chapter 8 →

1انهن ڳالهين کان ڪيترائي سال پوءِ فارس جي شهنشاهہ ارتخششتا جي شاهيءَ جي ڏينهن ۾ هڪ شخص عزرا ولد سراياہ ولد عزرياہ ولد خلقياہ

2ولد سلوم ولد صدوق ولد اخيطوب

3ولد امرياہ ولد عزرياہ ولد مرايوت

4ولد زراخياہ ولد عُزي ولد بُقي

5ولد ابيسوع ولد فينحاس ولد اليعزر ولد هارون سردار ڪاهن

6بابل کان يروشلم ڏانهن روانو ٿيو. موسيٰ جي شريعت جيڪا خداوند ، بني اسرائيل جي خدا ڏني هئي، تنهن ۾ هو هوشيار عالم هو. شهنشاهہ هن کي هر اُها شيءِ ڏني جيڪا هن کانئس گھري، ڇاڪاڻ تہ خداوند سندس خدا جو هٿ مٿس هو.

7سو ارتخششتا شهنشاهہ جي شاهيءَ جي ستين سال ڪجھہ بني اسرائيل جن ۾ ڪاهن ، لاوي ، هيڪل جا ڳائڻا، دربان ۽ خدمتگار شامل هئا، سي پڻ عزرا سان گڏ يروشلم ۾ آيا.

8اهي بابل کان پهرئين مهيني جي پهرين تاريخ تي روانا ٿيا ۽ پنجين مهيني جي پهرين تاريخ تي يروشلم ۾ اچي پهتا، ڇاڪاڻ تہ سندن خدا جو فضل ڀريو هٿ مٿن هو.

10اهو انهيءَ ڪري هو جو عزرا خداوند جي شريعت جي مطالعي ڪرڻ، مٿس عمل ڪرڻ ۽ بني اسرائيل ۾ قاعدن قانونن جي تعليم ڏيڻ لاءِ پنهنجو پاڻ کي وقف ڪري ڇڏيو هو.

11عزرا ڪاهن ۽ عالم هو ۽ انهن قاعدن قانونن جو چڱو ڄاڻو هو جيڪي خداوند بني اسرائيل کي ڏنا هئا. شهنشاهہ ارتخششتا عزرا کي هڪ اختياريءَ جو خط ڏنو جنهن جو متن هي آهي تہ

12شهنشاهہ ارتخششتا جي طرفان عزرا ڪاهن ڏانهن سلام، جيڪو عرش عظيم جي خدا جي شريعت جو وڏو عالم آهي،

13آءٌ حڪم ٿو جاري ڪريان تہ منهنجي شهنشاهت مان بني اسرائيل جا ماڻهو، ڪاهنن ۽ لاوين سميت جيڪي بہ تو سان گڏ يروشلم ڏانهن وڃڻ گھرن سي ڀلي وڃن.

14هاڻي آءٌ ۽ منهنجا ست مشير تو کي چئون ٿا تہ تون يروشلم بلڪ سڄي يهوداہ ۾ وڃي اهو معلوم ڪر تہ خدا جي شريعت جنهن جو تون عالم آهين، تنهن جي ڪيتري قدر اطاعت ڪئي وڃي ٿي.

15انهيءَ کان سواءِ تون پاڻ سان سون ۽ چاندي بہ کڻي وڃ جيڪا مون ۽ منهنجي مشيرن خوشيءَ سان بني اسرائيل جي خدا لاءِ ڏني آهي، جنهن جو گھر يروشلم ۾ آهي.

16ٻيو جيڪو بہ سون ۽ چاندي تو کي بابل مان ملي، ۽ جيڪي نذرانا ڪاهن ۽ ماڻهو خوشيءَ سان پنهنجي خدا جي گھر جي لاءِ ڏين سي پڻ يروشلم ڏانهن کڻي وڃ.

17انهيءَ رقم مان ڍڳا، گھٽا، گھيٽا ۽ اناج جي قربانين سان گڏ اوتڻ وارين قربانين جو سامان خريد ڪج ۽ اُهي يروشلم ۾ کڻي وڃي پنهنجي خدا جي گھر جي قربان‌گاهہ تي قربان ڪج.

18باقي جيڪو سون ۽ چاندي بچي سو پنهنجي خدا جي مرضيءَ موجب، جيئن تو کي ۽ تنهنجي هم‌قوم ڀائرن کي مناسب نظر اچي تيئن ڪم آڻجو.

19جيڪي ٿانوَ تنهنجي خدا جي هيڪل ۾ خدمت لاءِ تو کي ڏنا ويا آهن، سي تون يروشلم ۾ خدا جي حضور ۾ ڏيئي ڇڏج.

20ٻيو بہ جيڪي ڪجھہ وڌيڪ تنهنجي خدا جي گھر لاءِ گھربل هجي ۽ تو کي ڏيڻو هجي سو ڀلي شاهي خزاني مان وٺي ڏج.

21آءٌ انهن خزانچين ڏانهن هي حڪم جاري ڪريان ٿو جيڪي اولهہ واري فرات نديءَ جي صوبي ۾ رهن ٿا، تہ ”عرش عظيم جي خدا جي شريعت جي عالم عزرا ڪاهن کي جيڪي بہ گھرجي سو اوهين سعيو ڪري کيس مهيا ڪري ڏجو.

22اوهين ساڍا ٽي هزار ڪلوگرام چاندي، ڏهہ هزار ڪلوگرام ڪڻڪ، ٻہ هزار ليٽر مئي ۽ ٻہ هزار ليٽر زيتون جو تيل ۽ بي‌انداز لوڻ ڏجو.

23جيڪي بہ عرش عظيم جي خدا حڪم ڪيو آهي سو سندس گھر لاءِ ڌيان سان ڪيو وڃي، انهيءَ لاءِ تہ منهنجي شهنشاهت ۽ منهنجي پٽن تي خدا جو ڪو غضب نازل نہ ٿئي.

24اوهان کي اهو بہ معلوم هجي تہ ڪاهنن، لاوين ، خدا جي هيڪل جي ڳائڻن، دربانن ۽ خدمتگارن يا هيڪل سان واسطي رکندڙن مان ڪنهن تي بہ ڪا ڍل، ٽيڪس يا چونگي ناهي مڙهڻي.“

25اي عزرا! پنهنجي خدا جي حڪمت موجب جيڪا تو کي مليل آهي، تون منتظمَ ۽ ججَ مقرر ڪر. اهي اولهہ واري فرات نديءَ جي صوبي جي انهن ماڻهن جو انصاف ڪن جيڪي تنهنجي خدا جي شريعت کي مڃين ٿا. پر جنهن کي شريعت جي ڄاڻ نہ هجي تنهن کي اوهين سيکاريو.

26جيڪي بہ تنهنجي خدا جي شريعت ۽ شاهي قانونن تي عمل نہ ڪن تن کي هڪدم موت، جلاوطنيءَ، ملڪيت ضبطيءَ يا قيد جي سزا ڏني وڃي.

27عزرا چيو تہ ” خداوند اسان جي ابن ڏاڏن جي خدا جي تعريف هجي، جنهن شهنشاهہ جي دل ۾ اها ڳالهہ وڌي تہ يروشلم ۾ جيڪو خداوند جو گھر آهي، تنهن جي تعظيم ٿئي.

28بلڪ خدا شهنشاهہ، مشيرن ۽ سڀني سگھارن عملدارن جي آڏو منهنجو مان وڌايو آهي. بيشڪ منهنجي خدا جو هٿ مون تي هو، جنهن مون کي همت عطا ڪئي جو مون بني اسرائيل مان ڪجھہ مکيہ ماڻهن کي گڏ ڪيو، تہ جيئن هو مون سان گڏجي هلن.“

← Chapter 6 Jump to: Chapter 8 →