Nehemiah 3

Sindhi Bible (Muslim) (مقدس ڪلام توريت، زبور ۽ نبين جون ٻيو لکتون ۽ انجيل شريف)

← Chapter 2 Jump to: Chapter 4 →

1سردار ڪاهن الياسب پنهنجي ساٿي ڪاهنن سان گڏجي اتر واري ڀت جو رڍن وارو دروازو وري تعمير ڪيو. هنن انهيءَ کي وقف ڪيو ۽ انهيءَ ۾ طاق لڳايائون. هنن ڀت کي سؤ نالي ٺُلهہ ۽ حنن‌ايل ٺُلهہ تائين وقف ڪيو.

2انهيءَ سان اولهہ طرف وارو لاڳيتو حصو يريحو شهر جي ماڻهن تعمير ڪيو ۽ ان کان پوءِ وارو حصو زڪور ولد اِمريءَ تعمير ڪيو.

3مڇيءَ وارو دروازو هسناہ جي پٽن تعمير ڪيو. هنن ان مٿان سردر رکيا، طاق لڳايائون ۽ منجھس هڙڪيون ۽ گز لڳايائون.

4ان سان لاڳيتو حصو مريموت ولد اورياہ ولد هقوص مرمت ڪيو. ان سان لاڳيتو حصو مسلام ولد برڪياہ ولد مشيزبيل مرمت ڪيو. ان سان لاڳيتو حصو صدوق ولد بعنہ مرمت ڪيو.

5ان سان لاڳيتو حصو تقوع جي رهاڪن مرمت ڪيو، پر نگراني ڪندڙن جيڪو ڪم اتان جي اميرن کي ڪرڻ لاءِ ڏنو، تن انهيءَ ڪم کان انڪار ڪيو.

6يشانہ دروازي جي مرمت يهويدع ولد فاسخ ۽ مسلام ولد بسودياہ ڪئي. هنن انهيءَ مٿان سردر رکيا، طاق لڳايائون ۽ منجھس هڙڪيون ۽ گز لڳايائون.

7ان سان لاڳيتو حصو جِبعون ۽ مصفاہ جي ماڻهن جي مدد سان ملطياہ جِبعونيءَ ۽ يدون ميرونوتيءَ مرمت ڪيو. مصفاہ ۾ اولهہ واري فرات نديءَ جي صوبي جي گورنر جو دفتر هو.

8ان سان لاڳيتو حصو عزيئيل ولد حرهياہ جيڪو سونارو هو، تنهن مرمت ڪيو. ان سان لاڳيتو حصو حنانياہ جيڪو عطرفروش هو، تنهن ويڪري ڀت تائين مرمت ڪئي.

9ان سان لاڳيتي حصي جي مرمت جو ڪم رفاياہ ولد حور ڪرايو، جيڪو يروشلم جي اڌ ضلعي جو حاڪم هو.

10ان جي لاڳيتي حصي جي مرمت جو ڪم يداياہ ولد حرومف ڪيو جيڪو سندس گھر جي ويجھو هو. ان سان لاڳيتي حصي جي مرمت حطوش ولد حسبنياہ ڪئي.

11ملڪياہ ولد حارم ۽ حسوب ولد پخت موآب ان جي لاڳيتي حصي ۽ کورن واري ٺُلهہ جي مرمت ڪئي.

12ان جي لاڳيتي حصي جي مرمت جو ڪم، يروشلم جي ٻئي اڌ ضلعي جي حاڪم سلوم ولد هلوحيش پنهنجي ڌيئرن جي مدد سان ڪيو.

13ماٿريءَ واري دروازي جي نئين سر اڏاوت زنواح شهر جي رهاڪن ۽ حنون گڏجي ڪئي. هنن انهيءَ ۾ طاق، هڙڪيون ۽ گز وڌا. هنن گند واري دروازي تائين اٽڪل ساڍا چار سؤ ميٽر ڀت جي مرمت بہ ڪئي.

14گند واري دروازي جي نئين سر اڏاوت بيت‌هڪرم جي ضلعي جي حاڪم ملڪياہ ولد ريڪاب ڪرائي. هن انهيءَ ۾ طاق، هڙڪيون ۽ گز وجھرايا.

15چشمي واري دروازي جي اڏاوت مصفاہ ضلعي جي حاڪم سلوم ولد ڪل‌حوزہ ڪرائي. هن ان جي مٿان ڇت وجھرائي ۽ انهيءَ ۾ طاق، هڙڪيون ۽ گز بہ وجھرايا. هن بادشاهہ جي باغ کان وٺي ويندي دائود جي شهر واري ڏاڪڻ تائين شيلا جي تلاءَ واري ڀت جي مرمت پڻ ڪرائي.

16بيت‌سور جي اڌ ضلعي جي حاڪم نحمياہ ولد عزبوق ان جي لاڳيتي حصي جي ويندي دائود واري قبرستان، تلاءَ ۽ باريڪن تائين تعمير ڪرائي.

17انهيءَ کان پوءِ هنن لاوين پڻ مرمت جو ڪم ڪيو. رحوم ولد باني ڀر واري حصي جي مرمت ڪئي. انهيءَ کان پوءِ حسبياہ، جيڪو قعيلاہ جي اڌ ضلعي جو حاڪم هو، تنهن پنهنجي ضلعي جي طرفان ڀر واري حصي جي مرمت ڪرائي.

18انهيءَ کان پوءِ بنوي ولد حنداد جيڪو قعيلاہ جي ٻئي اڌ ضلعي جو حاڪم هو، تنهن ڀر واري حصي جي مرمت ڪرائي.

19انهيءَ کان پوءِ عيزر ولد يشوع جيڪو مصفاہ جو حاڪم هو، تنهن اسلحہ‌خاني جي چاڙهيءَ جي سامهون کان وٺي ويندي ڀت جي وراڻي تائين واري حصي جي مرمت ڪرائي.

20انهيءَ کان پوءِ باروڪ ولد زبي وراڻي کان وٺي الياسب سردار ڪاهن جي گھر جي در تائين دل وَ جان سان ڀت جي حصي جي مرمت ڪئي.

21انهيءَ کان پوءِ سردار ڪاهن الياسب جي گھر جي دروازي کان وٺي سندس گھر جي ڇيڙي تائين مريموت ولد اورياہ ولد هقوص مرمت ڪئي.

22انهيءَ کان پوءِ آس‌پاس واري علائقي جي ڪاهنن مرمت جو ڪم ڪيو.

23تنهن کان پوءِ بنيامين ۽ حسوب پنهنجي گھر جي سامهون واري حصي جي مرمت ڪئي. انهيءَ کان پوءِ عزرياہ ولد معسياہ ولد عننياہ پنهنجي گھر جي ڀر واري حصي جي مرمت ڪئي.

24تنهن کان پوءِ بنوي ولد حنداد ٻئي حصي جي مرمت ڪئي، جيڪو عزرياہ جي گھر کان وٺي ڀت جي موڙ ۽ ڪنڊ تائين هو.

25ڀت جي موڙ جي سامهون واري حصي جي ۽ جيڪو ٺُلهہ پهري وارن جي پڌر جي ڀر ۾ بادشاهي محل جي مٿئين حصي کان نڪتل آهي، تنهن کان وٺي فلال ولد اوزيءَ ڀت جي تعمير ڪئي. انهيءَ کان پوءِ فداياہ ولد پرعوس

26۽ خداوند جي گھر جا خدمتگار جيڪي عوفل ٽڪريءَ تي رهندا هئا، تن اوڀر طرف پاڻيءَ واري دروازي ۽ ٻاهر نڪتل ٺُلهہ جي سامهون تائين ڀت جي تعمير ڪئي.

27انهيءَ کان پوءِ تقوع جي رهاڪن ٻئي حصي جي مرمت ڪئي، جيڪو ٻاهر نڪتل وڏي ٺُلهہ جي سامهون عوفل جي ڀت تائين هو.

28گھوڙن واري دروازي جي اتر طرف ڪن ڪاهنن پنهنجي پنهنجي گھر جي سامهون واري حصي جي مرمت ڪئي.

29انهن کان پوءِ صدوق ولد امير پنهنجي گھر جي سامهون واري حصي جي مرمت ڪئي. تنهن کان پوءِ سمعياہ ولد سڪنياہ مرمت ڪئي، جيڪو اوڀر واري دروازي جو رکوالو هو.

30انهيءَ کان پوءِ حنانياہ ولد سلمياہ ۽ حنون جيڪو صلف جو ڇهون پٽ هو، تن گڏجي ٻئي حصي جي مرمت ڪئي. تنهن کان پوءِ مسلام ولد برڪياہ پنهنجي گھر جي سامهون واري حصي جي مرمت ڪئي.

31انهيءَ کان پوءِ ملڪياہ نالي هڪڙي سوناري فوجي حاضريءَ واري دروازي جي سامهون واپارين ۽ خداوند جي گھر جي خدمتگارن جي رهائش‌گاهہ تائين ۽ ڪنڊ واري برج تائين ڀت جي حصي جي مرمت ڪئي.

32انهيءَ ڪنڊ واري برج کان رڍن واري دروازي جي وچ واري حصي جي مرمت سونارن ۽ واپارين ڪئي.

← Chapter 2 Jump to: Chapter 4 →