2 Kings 5

Sena Malawi

← Chapter 4 Jump to: Chapter 6 →

1Naamani akhali mkadamu wa anyankhondo wa mfumu wa ku Aramu. Iye akhali munthu wamkulu pyakwanga pamaso pa mfumu, pontho akhalemedzwa thangwi kudzera muna iye MBUYA akhadachitisa Aaramu kukunda pankhondo. Iye akhali nyankhondo wamphamvu, kwache akhali nyamatanya.

2Ndzidzi unango magulu a nkhondo a ku Aramu adenda kachita nkhondo na Aisraele mbaphatako mwana mtsikana wa Chiisraele, ule adasanduka nyabasa wa mkazache Naamani.

3Mtsikana ule adalonga kuna mbuyache wamkazi mbati, “Mbuyangayu mbadakhala aonana na mprofeti ule ali ku Samaria mbadawangiswa matanyache.”

4Naamani adenda kuna mfumu kampanga pikhadalonga mtsikana wa ku Israele pile.

5Mfumu wa Aramu adatawira mbati, “Unakwanisa kwenda. Ine ndinati nditumize kalata kuna mfumu wa Israele.” Natenepo Naamani adalamuka kwenda mbakwata mitukwa ya kobiri zasiliva pikwi makumatatu, na golidi pikwi pitanthatu, pontho na pyakuvala pyadidi khumi.

6Kalata idakwata iye kwenda nayo kuna mfumu wa Israele idalembwa tenepa: “Ndikutuma nyabasanga Naamani na kalatayi kuna imwe, towera mumuwangise matanya ana iyewo.”

7Sindzidzi mfumu wa Israele nkhuwerenga kalata ile, adang'amba mkhanjo wache thangwi ya mantha mbalonga mbati, “Kadi ine ndine Mulungu? Kadi ine ndinakwanisa kupha na kubwezera moyo wa munthu? Thangwi yache ninji iye atuma munthu weneyu kuna ine kuti ndimuwangise matanyache? Ngayang'anani yeneyi ndi njira yakufuna kulamusa nayo nthonga pakati pa ine na iye.”

8Pidava Elisha, munthu wa Mulungu ule, kuti mfumu wa Israele ang'amba mkhanjo wache, adatumiza mphangwa kuna iye mbati, “Thangwi yache ninji mwang'amba mkhanjo wanu? Mpangeni munthuyo adze kuna ine, tenepo iye anadziwadi kuti mu Israele muna mprofeti.”

9Natenepo Naamani adenda pabodzi pene na akavalo ache pontho na pingolo pyache mbakaimira pamsuwo pa Elisha.

10Elisha adatuma nyamphangwa kuna Naamani kampanga kuti, “Ndoko kasambe mumkulo wa Yorodani kanomwe, tenepo manungo ako anawanga mbukhala wakuchena.”

11Mbwenye Naamani adazhangali pyakwanga mbaenda pyache uku akulonga kuti, “Ndikhanyerezera kuti iye anabuluka panja kuna ine mbaimira kupemphera kuna MBUYA Mulungu wache mbayambasa dzanjache pamatanyanga mbandiwangisa.

12Ayi mikulo ya Abana na Faripara ya kwathu ku Damasiko, si yadidi tayu kupiringana madzi a mu Israele? Ayi ine mbidakwanisa tayu kusamba mwenemo mbandicheneswa?” Natenepo adazungunuka mbaenda pyache mwakuzhangali.

13Anyabasa a Naamani adenda kuna iye mbalonga mbati, “Ayi mbuya, mprofetiyo mbadakupangani kuchita chinthu chikulu chene, imwe mbamudachichita tayu? Apo nditani na pyakupangani iye kuti, ‘Kasambe, tenepo unacheneswa!’ ”

14Natenepo Naamani adabidira kumkulo mbapivika yekha ene mumkulo wa Yorodani kanomwe ninga montho mukhadampangira munthu wa Mulungu, tenepo iye adacheneswadi, khandache idabwerera ninga mwakale mbikhala ninga yamphale.

15Naamani na anthu ache onsene ale adabwerera kuna munthu wa Mulungu ule. Iye adaimira pamaso pache mbalonga mbati, “Lero ndapidziwa kuti padziko yonsene yapansi nkhabepo milungu inango kupambula Mulungu wa Israele. Ndaphata miyendo tambirani mitukwa yadza na ine kuna imweyi.”

16Mprofeti ule adatawira mbati, “Ine ndinadumbira pamaso pa MBUYA wamoyo ambatumikira ineyi kuti ine nkhabe dzatambira chinthu na chibodzi chene tayu.” Natenepo iye adakhonda podi kwene kuti Naamani adamkhakhamiza.

17Naamani adalonga mbati, “Ngakhala munatambira tayu mitukwangayi, ndipaseni tchetcha ya kuno ninga munakwanisira mabulu mawiri kuthukula kwenda nayo kwathu. Thangwi kutomera lero kwenda m'tsogolo sinaperekave nsembe penu nsembe zakupyerera kuna mulungu unango tayu, mbwenye kuna MBUYA ene basi.

18Kwache ndikupempha MBUYA kuti andilekerere chinthu ichi: Pimbapita mbuyanga mfumu m'nyumba yakupembedzeramo milungu Rimoni kamulambira, iye ambatsamira mkono wanga, natenepo ine ndimbalambambo, thangwi ya kulambira kumbachita ine Rimoni, MBUYA mbandilekerere.”

19Elisha adalonga mbati, “Ndoko na mtendere.” Pidafamba Naamani kansinzo kene,

20Gehazi nyabasa wa Elisha, munthu wa Mulungu ule, adalonga yekha ene mbati, “Mbuyanga amuleka pyache Naamani Muaramu nee kumpagalisa chinthu na chibodzi chene tayu. Iye adathema kutambira mitukwa idadza na iye ile. Ndinadumbira pamaso pa MBUYA wamoyo kuti ine ndinati ndimthamangire ndikakwateko pinthu pang'ono.”

21Natenepo Gehazi adamthamangira Naamani. Pidaona Naamani kuti munthu unango akumthamangira, iye adatchitha m'chingolo mwache mule kagumanikana na munthu ule. Iye adavunza mbati, “Ayi nkhwadidi kwene?”

22Gehazi adatawira mbati, “Ande, nkhwadidi kwene. Mbwenye mbuyanga andituma ndikupangeni kuti, ‘Aphale awiri a m'gulu ya maprofeti andifikira kwene chinchino pano kubulukira kudziko ya mapiri ya Eferemu. Ndaphata miyendo apaseni kobiri zasiliva pikwi pitatu na pyakuvala piwiri.’ ”

23Naamani adalonga mbati, “Ndaphata miyendo kwatani kobiri zasiliva pikwi pitanthatu.” Iye adamkhakhamiza Gehazi kuti atambire penepi. Natenepo adamanga siliva ule m'mabudu mawiri pabodzi pene na pyakuvala pile. Iye adapipereka kuna anyabasache awiri mbapithukula kwenda patsogolo pache.

24Pidafika Gehazi paphiri, adakwata pinthu pikhadathukula anyabasache pile mbapipitisa m'bwalo mwa nyumba. Kubuluka penepo adapanga anyabasa ale kwenda pyawo, tenepo iwo adalamuka mbaenda pyawo.

25Gehazi adapita m'nyumba mbakaimira pamaso pa Elisha mbuyache. Elisha adamvunza mbati, “Gehazi ukhali kupi?” Gehazi adatawira mbati, “Ine nyabasanu sidafambe kwenda kunango tayu.”

26Mbwenye Elisha adalonga kuna iye mbati, “Kani ukunyerezera kuti mzimu wanga hukhali nawe tayu pikhatchitha munthu ule m'chingolo mwache dzagumanikana nawe? Kadi uno ndi ndzidzi wakukwata kobiri, penu kutambira nguwo, minda yaolivi, minda yamfesa, mabira, ng'ombe, penu anyabasa achimuna na achikazi?

27Matanya a Naamani anakakamira pana iwepo na pana pidzukulu pyako kwenda na kwenda.” Natenepo Gehazi adabuluka pamaso pa Elisha mbakhala na matanya akuchena ninga matalala.

← Chapter 4 Jump to: Chapter 6 →