James 1

Sena Malawi

Jump to: Chapter 2 →

1Kubulukira kuna ine Yakobo, nyabasa wa Mulungu, pontho wa Mbuya Yesu Khristu. Mwenyikiro kuna anthu onsene a Mulungu adabalalikira padziko yonsene ale!

2Abale anga, mupiyese mwekha ene akutsanzaya pikulu mayesero a mtundu na mtundu angakugwerani,

3thangwi mukupidziwa kuti chikhulupiro chanu chingaona mayesero ninga enewa, mamalisiro ache kumbakuchitisani kukwanisa kupirira.

4Onesesani kuti kupirira kwanu kwathema kuphata basa muna imwe mwakumalisikiratu, towera mukhale anthu akuthema monsene mwene, amumphu pontho na okhonda sowa chinthu na chibodzi chene.

5Mbwenye ngakhala unango pakati panu anasowa nzeru, apemphe kuna Mulungu, tenepo Mulungu anampasa, thangwi Mulungu ambapereka mwakufewa manja, pontho mwakukoma mtima kuna anthu onsene.

6Kwache mungapemphera muleke penuka, mbwenye mukhulupire. Munthu wakupenuka akhala ninga bimbi ya m'nyanza yakugwinywa na mphepo uku na uku.

7Munthu ninga weneyu aleke nyerezera kuti iye anatambira chinthu na chibodzi chene kubulukira kuna Mbuya.

8Iye ngwa mitima miwiri, okhonda likha papinthu pyonsene pimbachita iye.

9Mkhristu wapansiletu athema kukomerwa Mulungu angamkwiza,

10pontho mkhristu wakufuma athema kukomerwa Mulungu angamtchithisa. Thangwi anyamfuma anamala ninga maluwa am'tsanga.

11Dzuwa imbabuluka na kupisa kwache mbaivula mbewu; maluwa ambapakatika, pontho kubalika kwa mbewu ile kumbavungika. Ntchibodzi-bodzi kuna munthu wakufuma, anavungwa mwenemo ali pakati pa pinthu pinaphata iye.

12Ngwakutsanzaya munthu ule anathimiza kupirira pandzidzi wa mayesero, thangwi iye angapikwanisa pamayesero ninga enewa, anati afupwe moyo ule udadumbira Mulungu kuna anthu ambamfuna ale.

13Munthu angayeswa na mayesero ninga enewa, aleke longa kuti, “Mayesero enewa akubulukira kuna Mulungu.” Thangwi Mulungu nkhabe kwanisika kuyeswa na pyakuipa, penu iye kuyesa munthu na mbodzi ene na pyakuipa tayu.

14Mbwenye munthu ambayeswa na pyakuipa angakweya na kukweshwa na pikhumbo pyache.

15Tenepo iye angatawirisa pikhumbo pyachepyo kumtonga, pimbabala pyakudawa, kubuluka penepo pyakudawapyo pingakula, pimbabala imfa.

16Abale anga apamtima, lekani nyengezwa!

17Mitukwa yonsene yadidi, pontho yakuthema monsene mwene imbabulukira kudzulu; iyo imbabulukira kuna Mulungu, nyakulenga pyonsene pyakuonesa cheza pyakudzulu, ule ngokhonda sanduzika ninga mthunzi wakuzungunuka-zungunuka.

18Na kufuna kwache iye adatipasa moyo kudzera muna mafalache akuonadi, towera ife tikhale pyakuvuna pyakutoma pa pyakulengwa pyache pyonsene.

19Abale anga apamtima, kumbukani ipi! Munthu onsene athema kuchimbiza kuva, kwache aleke kuchimbiza kulonga, aleke pontho kuchimbiza kuzhangali.

20Kuzhangali kwa munthu nkhabe kwanisa kumchitisa kukhala na moyo wakulungama umbafuna Mulungu ule tayu.

21Natenepo lekani nsambo onsene wakuipa na makhaliro akudawika akuinjipa. Verani Mulungu, pontho tawirani mwakupichepesa mafala ambabzala iye mumtima mwanu, ale anakwanisa kukupulumusani.

22Lekani kupinyengeza mwekha ene pakuvesera kwene mafalawa, mbwenye imwe mwathema kuchita pinalonga iwopyo.

23Munthu anavesera mafala mbakhonda chita pinalonga iwopyo akhala ninga munthu wakuyang'ana pasupeyo mbaona nkhope yache ninga muna iye.

24Iye ambapiyang'anisisa yekha ene, sindzidzi nkhubuluka penepo ambaduwalira makhaliro a nkhope yache.

25Mbwenye munthu onsene wakuyang'ana mwambo wakuthema monsene mwene umbadzesa utumbe kuna anthu ule, mbathimiza kuuvesera mwadidi, nee kuuvesera kokha mbaduwalira tayu, mbwenye mbachita pimbalonga iwo, munthu ninga weneyu Mulungu anamtsanzayisa papinthu pyonsene pimbachita iye.

26Ngakhala pana munthu unango ambapiyesa yekha ene kuti iye ngwakupembedza, kwache mbakhonda chita mphole-mphole na lulume yache, iye akupinyengeza yekha ene, pontho chipembedzo chache ntchapezi.

27Chipembedzo changwiro, pontho chakusowa chinthu chakupokanyisa pamaso pa Mulungu Baba, ntchakuti munthu aphedze ana na akazi akusiyiwa panyatwa zawo, pontho apikoye gopesera kuipiswa na pinthu pya pansi pano.

Jump to: Chapter 2 →