Mark 14 — Tashelhayt Morocco 1998 (Tashelhayt Arabic Script Morocco) (اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم)

1سين‑ووسّان ا‑يقامان ءي‑لعيد ن‑وسورف د‑ووسّان ن‑ورخصيص. ار‑سيگّيلن ءينمغورن ن‑تگمّي ن‑ربّي د‑يمسلمدن ن‑شّرع مامنك ا‑راد‑امژن ياسوع س‑لحيلت ا‑ت‑نغن.

2والاينّي نّان ءي‑نگراتسن: «ءورد غ‑ووسّان لّعيد باش ا‑ور‑دووين مدّن.»

3ءيلّا ياسوع غ‑ودوّار ن‑بيتعانيا، ءيسكيوس ار‑يشتّا غ‑تگمّي ن‑سيمعان لّي‑ستّين‑يكّان ءيگا انجدام. تكشم‑د دارس يات‑تمغارت توسي‑د يات‑تبوقّالت ن‑وژرو تيلي‑گيس‑توجّوت ن‑ناردين ءيصفان، ءيگّوت‑باهرا‑واتيگ‑نس. ترژ ءيمي ن‑تبوقّالت تفّي‑تّ‑يد ف‑يخف ن‑ياسوع.

4ءيمّا غويلّي لّانين غين، كرا گيسن ءيبزگ فلّاس ءينين ءي‑نگراتسن: «ماخ ا‑تجلا توجّوت‑اد؟

5مراد ءيس‑تنزا را‑دي‑تاوي ءوگُّار ن‑كراض ءيد‑ميّا ن‑نّوقرت، نفك‑تن ءي‑يمژلاض.» بدون ار‑فلّاس‑سّنگموگن.

6ءيمّا ياسوع ءينّا‑ياسن: «ادجات‑ستّ. ماخ ايلّيغ ديدس تشقام؟ هاتّي تسكر گيگي افولكي.

7ءيمژلاض راد‑بدّا‑ديدون‑يلين. غاكود نّا‑ترام را‑تافم ما‑س‑ا‑گيسن‑تسكارم لخير. ءيمّا نكّي ءور‑راد‑بدّا‑ديدون‑يليغ.

8هاتّي تسكر مايلّي مي توفا. نتّات تزوار تژغور دّات‑ينو ءي‑ومضّال.

9لحقّ ا‑راد‑اون‑ينيغ، ءينّاغ ا‑تبرّاحن مدّن س‑لخبار‑اد ءيفولكين غ‑كولّو دّونيت، را‑تّينين ف‑مايد تسكر ختاد، ار‑تّ‑يد‑سرس‑كتّين.»

10غاكودان ءينكر ياهودا ءيسخاريوط لّي‑يگان يان زغ‑سين د‑مراو ن‑ومحضار، ءيدّو س‑دار ءينمغورن ن‑تگمّي ن‑ربّي باش اد‑اسن‑يزّنز ياسوع.

11لّيغ سفلدن ءي‑ماد‑اسن‑ينّا، فرحن ءينين‑اس اد‑اس‑فكن ءيقاريدن. يوورّي ار‑يسوينگيم مامنك ا‑را‑تن‑يعاون اد‑امژن ياسوع.

12ءيلكم‑د‑واسّ امزوارو ن‑ووسّان ن‑ورخصيص لّي‑غ‑ا‑قّرسن مدّن ءي‑يلقّاغن. سقسان‑ت ءيمحضارن‑نس: «ماني تريت ا‑سرس‑ندّو اد‑اك‑ن‑گيس‑نجّوجاد ءيمنسي لّعيد ن‑وسورف؟»

13يازن سين زغ‑يمحضارن‑نس غاكودان، ييني‑اسن: «زايدات س‑تمدينت. را‑تمناگّارم يان‑ورگاز يوسي‑د اگدور ن‑وامان.

14ضفورات‑ت س‑تگمّي نّا‑س‑يكشم، تينيم ءي‑بو‑تگمّي‑ان ‹هاتي ءينّا‑ياك‑د‑ومسلمد، مانيغ ءيلّا‑وحانو لّي‑غ‑راد‑شّغ ءيمنسي ن‑وسورف نكّي د‑يمحضارن‑ينو؟›

15راد‑اون‑يمل يان‑وحانو ن‑وفلّا ءيمقّورن ءيسوان ءينگادّان. غين ا‑غ‑راد‑اغ‑تجّوجادم.»

16فّوغن ءيمحضارن، دّون س‑تمدينت افن‑ين غمكلّي‑اسن‑ينّا. جّوجادن ءيمنسي ن‑وسورف.

17تروح‑د‑تدگُّات، ءيلكم ياسوع تيگمّي نتّا د‑يمحضارن‑نس س‑سين د‑مراو.

18لّيغ سكيوسن ار‑شتّان ييني‑اسن: «لحقّ ا‑راد‑اون‑ينيغ، را‑يّي‑يزّنز يان غ‑گراتون، كونّي لّي‑ديدي‑شتّانين.»

19طيّر‑اسن باهرا، بدون ار‑ت‑سقسان كولّوتن، كود يان ار‑يتّيني: «ياك، ءورد نكّي؟»

20ييني‑اسن: «ءيگا يان زغ‑سين د‑مراو لّي‑ديدي‑درانين غ‑وروكو‑اد.

21ها‑يوس ن‑بنادم را‑يمّت غمكلّي فلّاس ءيتياران، والاينّي تاگوضي ا‑را‑ييلي ءي‑ورگاز لّي‑يزّنزان يوس ن‑بنادم. يوف‑اس ءي‑ورگاز‑ان مراد ءيس‑ور‑اكُّ‑يلول.»

22لّيغ ا‑شتّان ياسي ياسوع تانگولت، ءيشكر ربّي ءيبّي‑تّ، ءيفك‑اسن‑تّ ييني‑اسن: «امژات. ختاد تگا دّات‑ينو.»

23ياسي لكاس، ءيشكر ربّي ءيفك‑اسن‑ت. سون زغ‑گيس كولّوتن.

24ييني‑اسن: «غويد گان ءيدامّن‑ينو لّي‑را‑يفّي ف‑سّيبت ن‑مدّن گّوتنين باش اد‑گن لعهد لّجديد غ‑گراتون د‑ربّي.

25لحقّ ا‑راد‑اون‑ينيغ، ءور‑سول‑راد‑سوغ زغ‑لغلّت ن‑واضيل ار اسّ لّي‑غ‑را‑ت‑سوغ زغ‑لجديد غ‑تگلديت ن‑ربّي.»

26اسين ءيلمّا يان‑ومارگ زغ‑يموريگن ن‑ربّي، فّوغن س‑وورير ن‑زّيتون.

27ييني‑اسن ياسوع: «ها‑كونّي را‑يّي‑كولّو‑تفلم، اشكو ءيتيارا ‹راد‑وتغ امكسا، مزرنت‑وولّي.›

28والاينّي تيگيرا ن‑ما‑د‑نكرغ زغ‑لموت را‑كُن‑زوورغ س‑تمازيرت ن‑جاليل.»

29ءيساول بطرُس ييني‑اس: «واخّا‑ك‑كولّو‑فلن ءور‑سار‑ك‑فيلغ نكّي.»

30ءيمّا ياسوع ءيرور‑اس: «لحقّ ا‑راد‑اك‑ينيغ، غ‑يض‑اد ءور‑را‑يغر‑وفولّوس سنات‑توال ارد تينيت كراطّ‑توال ءور‑يّي‑تسّينت.»

31ءيمّا نتّا ءينّا‑ياس س‑جّهد: «واخّا راد‑ديدك‑مّتغ ءور‑راد‑ينيغ ءور‑ك‑سّينغ.» غمكاد اد‑نّان كولّوتن.

32اشكين‑د س‑يان‑ودغار لّي‑مي‑تّينين ‹گاتسيماني›. ييني ياسوع ءي‑يمحضارن‑نس: «گاورات غيد، راد‑ژّالّغ.»

33ياوي ديدس بطرُس د‑ياعقوب د‑يوحانّا. ءيغووض ياسوع غ‑تاساعت‑ان، مّاغن ءيسوينگيمن باهرا غ‑وول‑نس.

34ييني‑اسن: «تژّاي فلّا تاغوفت‑اد ار لموت. گاورات غيد تاوزم.»

35ءيزايد ءيفتو يان ءيميكّ ءيضر س‑واكال ءيژّالّ ييني: «سّيتّي فلّا تاساعت‑اد ن‑ورفوفن ءيغ‑تژضار ا‑تيتّي.»

36ءيژّالّ‑داغ ييني: «ابّا وا‑بابا، ءور‑يلّي كرا مي ءور‑تژضارت ا‑تي‑تسكرت. كّيس فلّا لكاس‑اد ن‑ورفوفن، والاينّي ا‑ييلي ما‑تريت، ءورد ماد‑ريغ نكّي.»

37يوورّي ياسوع ياف‑تن‑ين طّاسن. ءيساول س‑بطرُس ييني‑اس: «وا‑سيمعان، ءيس‑تطّاست؟ ءيس‑ور‑تژضارت ا‑تاوزت يات تاساعت؟

38اوزات تضالبم ربّي ا‑كُن‑يسّانف ءي‑كولّو ما‑را‑كُن‑يجلّو. هاتي ءول ن‑بنادم ار‑يتّيري ا‑يسكار افولكي، ءيمّا دّات‑نس تضعف.»

39ءيدّو‑داغ ا‑يژّالّ ييني غمكلّي ءينّا تاوالا تامزواروت.

40يوورّي ياف‑تن‑ين طّاسن، ءينرا‑تن ءيطس. ءور‑سّينّ ما‑راد‑اس‑ينين.

41يوورّي تيس كراطّ‑توال ييني‑اسن: «طّاسات غيلا تسونفوم. يوودا غونشكاد، تلكم‑د تاساعت. ءينزا يوس ن‑بنادم س‑گر ءيفاسّن ن‑مدّن أُخشنّين.

42نكرات ا‑ندّو. ها‑والّي‑يّي‑يزّنزان يوشكا‑د.»

43سول ا‑يساوال س‑د‑يروح ياهودا لّي‑يگان يان زغ‑سين د‑مراو ن‑ومحضار. مونّ‑د ديدس كيگان د‑مدّن اسين‑د لكمامي د‑يعماد. ءوزنّ‑تن‑د ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن ن‑تمازيرت‑ان.

44غوالّي ءيزّنزان ياسوع ءيملا‑ياسن‑ياد تاماتارت‑اد، ييني‑اسن: «وانّا سّودنغ، غوان ا‑ت‑يگان. امژات‑ت تاويم‑ت تضوفم‑ت.»

45ياشك‑يد ياهودا ءيفتو س‑دار ياسوع ييني‑اس: «واي‑امسلمد»، ءيسّودن‑ت.

46گرن‑ين فلّاس ءيفاسّن امژن‑ت.

47ءينكر ءيلمّا يان زغ‑ويلّي لّانين د‑ياسوع ءيلدي‑د لكومّيت، يوت اخدّام ن‑ونمغور ن‑تگمّي ن‑ربّي ءيبّي‑اس امژّوغ.

48ءيساول ياسوع ييني‑اسن: «ما‑س‑دي‑تفّوغم س‑لكمامي د‑يعماد ا‑يّي‑تغويم زوند ءيغ‑گيغ امخّار؟

49لّيغ‑ن‑بدّا ديدون كرايگاتّ اسّ ار‑سّلمادغ غ‑تگمّي ن‑ربّي، ءور‑يّي‑تومژم غ‑ووسّان‑ان. والاينّي ءيجرا غمكاد باش ا‑يافو ما‑يتياران غ‑وارّاتن ن‑ربّي.»

50غاكودان روولن كولّو ءيمحضارن، فلن ياسوع.

51ءيضفور‑ت‑سول يان‑وعيّال ءور‑يلسي غير احايك.

52غوين‑ت مدّن‑ان، ءيمّا نتّا ءيفل احايك ءيروول ءور‑يلسي يات.

53اوين ياسوع س‑دار‑ونمغور ن‑تگمّي ن‑ربّي، مونّ‑د ءينمغورن كولّوتن د‑يمغارن ن‑تمازيرت د‑يمسلمدن ن‑شّرع.

54ءيمّا بطرُس ءيضفار‑ت زغ‑توگّوگت، ءيكشم س‑وامّاس ن‑تگمّي ن‑ونمغور، ءيسكيوس د‑يمخزنيين غ‑دار لعافيت ار‑ديدسن‑يرقّا.

55ءيمّا ءينمغورن ن‑تگمّي ن‑ربّي د‑يمغارن لّمحكاما كولّوتن ار‑سيگّيلن س‑توگّا ف‑ياسوع باش ا‑ت‑نغن، والاينّي ءور‑وفين يات.

56كيگان د‑مدّن ار‑فلّاس‑اكّان توگّا ن‑تكركاس، والاينّي ءور‑نگادّانت توگّا‑نسن.

57ءينكر كرا گيسن ار‑سّكيركيسن ءينين:

58«نكُّني نسفلد‑اس ءينّا ‹نكّي راد‑خلوغ تيگمّي‑اد ن‑ربّي ءيتياوسكارن س‑يفاسّن ن‑بنادم، بنوغ غ‑كراض‑ووسّان يات ياضني ءور‑يتياوسكارن س‑يفاسّن ن‑بنادم.› »

59ءولا غمكاد‑داغ، ءور‑نگادّانت توگّا‑نسن.

60ءيبيدّ‑ونمغور ن‑تگمّي ن‑ربّي غ‑وامّاس‑نسن، ءيسقسا ياسوع: «ءيس‑ور‑را‑د‑فلّاسن‑ترارت س‑يات؟ مايد‑فلّاك‑تّينين غويد غ‑توگّا‑نسن؟»

61ءيمّا ياسوع غير ءيفسّا، ءور‑ينّي يات. ءيسقسا‑ت‑داغ‑ونمغور: «ءيزد كيّي ا‑يگان لماسيح يوس ن‑ومباركي؟»

62ييني‑اس ياسوع: «نكّي ا‑ت‑يگان. را‑تژرم يوس ن‑بنادم ءيسكيوس ف‑وفاسي ن‑ربّي ءيتجهّدن، ءيفتو‑د غ‑يمدلا ن‑يگنوان.»

63لّيغ‑اس‑يسفلد‑ونمغور ن‑تگمّي ن‑ربّي، ءيبّي تيملسا‑نس ييني‑اسن: «ما‑سول‑نرا ءيناگان‑اد؟

64كونّي تسفلدم ءي‑واوال‑نس لّكوفر. ما‑فلّاس‑تنّام؟» حكامن فلّاس كولّوتن ءينين: «ءيقّان‑ت‑يد ا‑يمّت.»

65ءينكر كرا گيسن ار‑فلّاس‑سّوفوسن ار‑اس‑دالن ءودم ار‑ت‑كّاتن س‑يباريقن ار‑اس‑تّينين: «وا‑نّابي، مل‑اغ مانوا‑ك‑يوتن.» امژن‑ت ءيمخزنيين ار‑ت‑كّاتن.

66ءيمّا بطرُس ءيلّا‑سول غ‑ييزدار غ‑وامّاس ن‑تگمّي. تاشك‑يد يات‑تخدّامت ن‑ونمغور ن‑تگمّي ن‑ربّي

67تژر بطرُس ار‑يرقّا، تسّماقّل گيس تيني‑اس: «ءولا كيّي تلّيت د‑ياسوع گو‑ناصيرا.»

68ءيرار‑اس نتّان: «ءور‑سّينغ، ءور‑فهيمغ ما‑س‑تنّيت.» ءيفّوغ س‑وغگُمّي. ءيغر‑وفولّوس غاكودان.

69تژر‑ت‑داغ‑تخدّامت‑لّي، تيني فلّاس ءي‑ويلّي بيدّنين غين: «غواد ءيگا يان زغ‑گيسن.»

70ءيرار‑داغ بطرُس: «ءوهو.» يان ءيميكّ س‑اس‑نّان غويلّي بيدّنين غين: «س‑صّاحت تگيت كيّي زغ‑گيسن اشكو گو‑جاليل ا‑تگيت.»

71ءينكر بطرُس ار‑يتگالّا ار‑يتّيني س‑جّهد: «نكّي ءور‑سّينغ ارگاز‑اد ف‑ا‑تساوالم.»

72ءيغر‑وفولّوس غاكودان تيس سنات‑توال. ءيكتي‑د بطرُس مايلّي‑س‑اس‑ينّا ياسوع «ءور‑را‑يغر‑وفولّوس سنات‑توال ارد تينيت كراطّ‑توال ءور‑يّي‑تسّينت.» ءيسوانگم‑د اوال‑ان ار‑يالّا.