Ezra 8

Shan NCL

← Chapter 7 Jump to: Chapter 9 →

1ၸရၢင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်ႉၶိူဝ်းႁိူၼ်း၊ၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇလႄႈတူၵ်းၵႅၼ်းၵႃႈၼႂ်းမိူင်း ပႃႇပုလုၼ်ႇ၊ လႄႈဢွၼ်ၵၼ်ပွၵ်ႈမႃးၶိုၼ်းၵႃႈတီႈဝဵင်း ယေႇရုသလႅမ်ႇ၊ လူၺ်ႈၵၼ်တင်းၵဝ်၊ၼႂ်းၸူဝ်ႈပၢၼ် ဢႃႇတႃႇၸေႇရိတ်ႉ၊ ပဵၼ်ၸဝ်ႈမုၼ်ယႂ်ႇၶုၼ်ႁေႃၶမ်းၼၼ်ႉၸမ်ႉ၊-

2ၵေႇရသုၼ်ႇ၊ဢၼ်ပဵၼ်ၶိူဝ်းႁိူၼ်းၽိၼႁတ်ႉ၊ တႃႇၼေႇလႃႉ၊ဢၼ်ပဵၼ်ၶိူဝ်းႁိူၼ်းဢိႀမႃႇ၊ ႁတ်ႉတုတ်ႉ၊လုၵ်ႈၸၢႆးသေႇၶၼိ၊ဢၼ်ပဵၼ်ၶိူဝ်းႁိူၼ်းတႃႇဝိတ်ႈ၊ ၸႃႇၶရိ၊ဢၼ်ပဵၼ်ၶိူဝ်းႁိူၼ်းပႃႇရုတ်ႉ၊ဢၼ်ပႃးၸရၢင်းၵူၼ်းၸၢႆးပၢၵ်ႇပၢႆႁႃႈသိပ်းၵေႃႉ၊ ဢေးလိဢေႃးၼေႇ၊လုၵ်ႈၸၢႆးၸေႇရႁိ၊ဢၼ်ပဵၼ်ၶိူဝ်းႁိူၼ်းပႃႇႁတ်ႉမေႃႇၽႃႉ၊တင်းၵူၼ်းၸၢႆးသွင်ပၢၵ်ႇၵေႃႉ၊ သေႇၶၼိ၊လုၵ်ႈၸၢႆးယႁႃႇၸေးလႃႉ၊ ဢၼ်ပဵၼ်ၶိူဝ်းႁိူၼ်းၸတ်ႉတု၊ တင်းၵူၼ်းၸၢႆးသၢမ်ပၢၵ်ႇၵေႃႉ၊ ဢေးပႅတ်ႉ၊လုၵ်ႈၸၢႆးယေႃးၼႀၼ်ႇ၊ဢၼ်ပဵၼ်ၶိူဝ်းႁိူၼ်းဢႃႇတိၼ်ႇ၊တင်းၵူၼ်းၸၢႆးႁႃႈသိပ်းၵေႃႉ၊ ယေႇသႃႇယႃႉ၊လုၵ်ႈၸၢႆးဢႃႇထလိ၊ဢၼ်ပဵၼ်ၶိူဝ်းႁိူၼ်းဢေႇလမ်ႇ၊ဢိၵ်ႇတင်းၵူၼ်းၸၢႆးၸဵတ်းသိပ်းၵေႃႉ၊ ၸေႇပတိ၊လုၵ်ႈၸၢႆးမိၵ်ႉၶေႇလႃႉ၊ဢၼ်ပဵၼ်ၶိူဝ်းႁိူၼ်းသေႇၽတိ၊ဢိၵ်ႇတင်းၵူၼ်းၸၢႆးပႅတ်ႇသိပ်းၵေႃႉ၊ ဢေႃးပတိ၊လုၵ်ႈၸၢႆးယေႇႁေးလႃႉ၊ဢၼ်ပဵၼ်ၶိူဝ်းႁိူၼ်းယွႃႇၽႃႉ၊တင်းၵူၼ်းၸၢႆးသွင်ပၢၵ်ႇပၢႆသိပ်းပႅတ်ႇၵေႃႉ၊ သေႇလေႃးမိတ်ႉ၊လုၵ်ႈၸၢႆးယေႃးသိၽိ၊ဢၼ်ပဵၼ်ၶိူဝ်းႁိူၼ်းပႃႇၼီႇ၊ တင်းၵူၼ်းၸၢႆးပၢၵ်ႇႁူၵ်းသိပ်းၵေႃႉ၊ ၸႃႇၶရိ၊လုၵ်ႈၸၢႆးပေႇပေႇ၊ဢၼ်ပဵၼ်ၶိူဝ်းႁိူၼ်းပေႇပေႇ၊တင်းၵူၼ်းၸၢႆးသၢဝ်းပႅတ်ႇၵေႃႉ၊ ယေႃးႁၼၼ်ႇ၊လုၵ်ႈၸၢႆးႁၵ်ႉၵတၼ်ႇ၊ဢၼ်ပဵၼ်ၶိူဝ်းႁိူၼ်းဢႃႇၸၵတ်ႉ၊တင်းၵူၼ်းၸၢႆးပၢၵ်ႇပၢႆသိပ်းၵေႃႉ၊ ၵူၼ်းၶိူဝ်းႁိူၼ်းဢႃႇတေႃးၼိၵမ်ႇ၊ဢၼ်မႃးတူၵ်းလိုၼ်းၼၼ်ႉပဵၼ်ဢေႇလီႇၽလႅတ်ႉ၊ယေႇယေႇလႃႉ၊ဢိၵ်ႇတင်းသေႇမႃႇယႃႉ၊တင်းၵူၼ်းၸၢႆးႁူၵ်းသိပ်းၵေႃႉ၊ ၵူၼ်းၶိူဝ်းႁိူၼ်းပိၵဝေႇ၊ဢၼ်ပဵၼ်ဢုသေႇ၊ၸၵ်ႉၵုရႃႉ၊ဢိၵ်ႇတင်းၵူၼ်းၸၢႆးၸဵတ်းသိပ်းၵေႃႉဢေႃႈ။

15ၵဝ်ႁႂ်ႈၶဝ်ၸိူဝ်းၼၼ်ႉၸုၵၼ်တုမ်ၵၼ်ၵႃႈတီႈႁိမ်းၼမ်ႉဢၼ်လႆၵႂႃႇၸူးၵႃႈတီႈဝဵင်း ဢႁႃႇဝႃႉ၊ ၼၼ်ႉလႄႈႁဝ်းဢွၼ်ၵၼ်ၶျႃးပၢင်ၵႃႈတီႈၼၼ်ႈသၢမ်ဝၼ်းတဵမ်တဵမ်ဢေႃႈ။ ၵဝ်ၸႅတ်ႈထၢမ်တီႈၵူၼ်းတင်းလၢႆ၊ဢိၵ်ႇတင်းယဵၸ်ႈပရေႃးႁဵၵ်ႈ ၸိူဝ်းၼၼ်ႉလႄႈလႆႈႁုလွင်ႈဢၼ်ဢမ်ႇပႃးၵူၼ်းမဵဝ်း လေႇဝိ၊ သေၵေႃႉသေၵူၼ်းၼၼ်ႉၸိုင်၊-

16ၵဝ်ၸင်ႇႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵဝ်ႈၵေႃႉ၊ဢၼ်ပဵၼ် ဢေးလျေႇၸႃႇ၊ဢရေႇလႃႉ၊သေႇမႃႇယႃႉ၊ဢေးလႃႉၼႃႇႀၼ်ႇ၊ယေႃးယရိပ်ႉ၊ဢေးလႃႉၼႃႇႀၼ်ႇ၊ၼႃႇႀၼ်ႇ၊ၸႃႇၶရိ၊မေႇသုလမ်ႇ၊ ဢိၵ်ႇတင်းသွင်ၵေႃႉဢၼ်ပဵၼ် ယွႃႇရိပ်ႉ၊ တင်း ဢေးလႃႉၼႃႇႀၼ်ႇ၊ ဢၼ်မီးတၢင်းႁုၼမ်ၼၼ်ႉမႃးလႄႈ၊-

17ပွႆႇၸႂ်ႉၶဝ်ၵႂႃႇၵႃႈတီႈ ဢိတ်ႉတေႃႇ၊ ၵေႃႉဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းမိူင်း ၵသိၽိ၊ လႄႈႁႂ်ႈၵႂႃႇမွၵ်ႇလၢတ်ႈတီႈမၼ်း၊ဢိၵ်ႇတင်းပီႈၼွင်ႉမၼ်းဢၼ်ယၢမ်ႈၵိုတ်ႉႁၢပ်ႇၼႃႈၵၢၼ်ၽြႃးၼႂ်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉလႄႈဝႃႈ၊ၶႅၼ်းတေႃႈသူင်ႇၵူၼ်းဢၼ်တၵ်းႁဵတ်းၼႃႈၵၢၼ်ၽြႃးပဵၼ်ၸဝ်ႈၼႂ်းၵျွင်းပိၵ်ႈမၢၼ်ႇၸဝ်ႈမႃးပၼ်တီႈႁဝ်းၶႃႈသေၵမ်းၶႃႈ။-

18ၵွပ်ႈလူၺ်ႈၵျေးၸူးတၢင်းလီၽြႃးပဵၼ်ၸဝ်ႈလႄႈၶဝ်သူင်ႇပၼ် သေႇရၽိ၊ ဢၼ်ပဵၼ်ၵူၼ်းမီးတၢင်းႁုတၢင်းႁၼ်ၵေႃႉၼိုင်ႈလႄႈပဵၼ်ၵူၼ်း လေႇဝိ၊ ၼႂ်းၶိူဝ်းႁိူၼ်း မႃႇလိ၊ တင်းပီႈၼွင်ႉမၼ်းလႄႈလုၵ်ႈလၢင်းၶဝ်သိပ်းပႅတ်ႇၵေႃႉ။-

19ႁႃႇသပိ၊ တင်း ယေႇသႃႇယႃႉ၊ ၶိူဝ်းႁိူၼ်း မေႇရႃႇရိ၊ ဢိၵ်ႇတင်းပီႈၼွင်ႉမၼ်းလႄႈလုၵ်ႈလၢင်းၶဝ်သၢဝ်းၵေႃႉဢေႃႈ။-

20ၼွၵ်ႈသေၼၼ်ႉၶႃႈၸႂ်ႉၼႂ်းၵျွင်းၽြႃးပဵၼ်ၸဝ်ႈၸိူဝ်းဢၼ် တႃႇဝိတ်ႈ၊ တင်းမူးမၢတ်ႈၽွင်းမိူင်းမၼ်းၶၢၼ်းဝႆႉႁႂ်ႈၶဝ်လႆႈႁဵတ်းၵၢၼ်ပၼ်ၵူၼ်းမဵဝ်း လေႇဝိ၊ တင်းလၢႆၼၼ်ႉ၊ၸိုဝ်ႈသဵင်ၶဝ်တင်းသဵင်ႈတင်းလူင်ၶဝ်ႈပႃးၼႂ်းၸရၢင်းလႄႈမီးသွင်ပၢၵ်ႇပၢႆသၢဝ်းၵေႃႉဢေႃႈ။

21မိူဝ်ႈၼၼ်ႉၵဝ်မီးဢမိင်ႉႁႂ်ႈၶဝ်တင်းသဵင်ႈတင်းလူင်ဢွၼ်ၵၼ်ၵမ်သိၼ်ဢမ်ႇၵိၼ်တၢင်းၵိၼ်လႄႈႁႂ်ႈႁဝ်းလႆႈဝႆႉတူဝ်တႅမ်ႇယေႃႈၵႃႈတီႈၽၢႆႇၼႃႈၽြႃးပဵၼ်ၸဝ်ႈႁဝ်းၵႃႈႁိမ်းၼမ်ႉႁွင်ႈ ဢႁႃႇဝႃႉ၊ ၼၼ်ႉႁႂ်ႈလႆႈလဝ်ႈယွၼ်းသူးတွင်းပုၼ်ႈလွင်ႈၼင်ႇႁိုဝ်မၼ်းၸဝ်ႈတၵ်းဢွၼ်သူင်ႇၸွမ်းသဵၼ်ႈတႃသၢႆတၢင်းႁဝ်းလႄႈၵႅတ်ႇၶႄႁႄႉၵင်ႈပၼ်ႁဝ်းတင်းလုၵ်ႈလၢင်းႁဝ်း၊ဢိၵ်ႇတင်းဢုၵ်ႉၸႃႇၶူဝ်းလဵင်းႁဝ်းၵႃႈမီးၼၼ်ႉဢေႃႈ။-

22လွင်ႈမၼ်းၸမ်ႉ၊ၵဝ်ဢူၵ်းဢၢႆလွင်ႈဢၼ်တၵ်းယွၼ်းဢဝ်တပ်ႉၵူၼ်းသိုၵ်း၊တပ်ႉၵူၼ်းၶီႇမႃႉသေတပ်ႉၼိုင်ႈၵႃႈတီႈၶုၼ်ႁေႃၶမ်း ႁႂ်ႈလႆႈၸွမ်းသူင်ႇႁဝ်းႁႂ်ႈလႆႈၸွႆႈထႅမ်ႁၢမ်ႈတၢပ်ႈႁႄႉၶႅၼ်ရၢၼ်ႇသူႇၵႃႈတီႈသဵၼ်ႈတၢင်းၼၼ်ႉ၊ၵွပ်ႈပိူဝ်ႈၵဝ်လႆႈလဝ်ႈလၢတ်ႈတီႈၶုၼ်ႁေႃၶမ်းဝႆႉလႄႈဝႃႈ၊ “ၽြႃးပဵၼ်ၸဝ်ႈပၼ်ၵျေးၸူးတၢင်းလီတီႈၵေႃႉဢၼ်ယုမ်ႇမၢတ်ႈဢိင်ပိုင်ႈမၼ်းၸဝ်ႈၼၼ်ႉလႄႈ၊တီႈၵေႃႉဢၼ်ၸုၼ်ႉပႅတ်ႈမၼ်းၸဝ်ႈၼၼ်ႉၸမ်ႉ၊မၼ်းၸဝ်ႈဢမ်ႇထုၵ်ႇၸႂ်ၵျိူၵ်ႈၸႂ်လႄႈပၼ်တၢမ်ႇတီႈၵေႃႉၼၼ်ႉဢေႃႈ၊” ဝႃႈၼင်ႇၼႆဝႆႉၼၼ်ႉဢေႃႈ။

23ၼင်ႇၼၼ်လႄႈႁဝ်းဢွၼ်ၵၼ်ၵမ်သိၼ်ဢမ်ႇၵိၼ်တၢင်းၵိၼ်လႄႈသူးတွင်းလဝ်ႈယွၼ်းလွင်ႈၼၼ်ႉတီႈၽြႃးပဵၼ်ၸဝ်ႈႁဝ်းဢေႃႈ။ မၼ်းၸဝ်ႈၵေႃႈထွမ်ႇဢဝ်ဢေႃႈ။

24ၵႃႈၼႂ်းယဵၸ်ႈပရေႃးႁဵၵ်ႈ ဢၼ်ပဵၼ်ငဝ်ႈပဵၼ်ႁူဝ်တင်းလၢႆၼၼ်ႉၵဝ်လိူၵ်ႈဢဝ် သေႇရၽိ၊ တင်း ႁႃႇသပိ၊ တင်းယဵၸ်ႈပရေႃးႁဵၵ်ႈထႅင်ႈသိပ်းၵေႃႉသေယဝ်ႉ၊-

25ၸင်ႈႁိဝ်ႈငိုၼ်းၶမ်းၶိူင်ႈပိူင်တင်းလၢႆဢၼ်ၸဝ်ႈမုၼ်ယႂ်ႇၶုၼ်ႁေႃၶမ်း၊ဢိၵ်ႇတင်းဝုၼ်ႇလူင်တင်းလၢႆတင်းမူးမၢတ်ႈၽွင်းမိူင်းတင်းလၢႆ၊ဢိၵ်ႇတင်းၵူၼ်းမဵဝ်း ဢိသရေး၊ ၸိူဝ်းၼၼ်ႉလူႇတၢၼ်းမႃးႁႂ်ႈလႆႈၸႂ်ႉသုင်းၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢၢပ်ႈပၼ်တီႈၶဝ်ဢေႃႈ။-

26ၸရၢင်းၶိူင်ႈပိူင်ဢၼ်ၵဝ်ပၼ်ၶဝ်ၸမ်ႉ၊ ငိုၼ်း - သၢဝ်းႁႃႈတၢၼ်ႇ၊ ၶိူင်ႈငိုၼ်းပၢၵ်ႇဢၼ် - သီႇသိပ်းသွင်ၸွႆႉ၊ ၶမ်း - သွင်ႁဵင်ၸွႆႉ၊ ၵွၵ်းၶမ်းသၢဝ်းၵွၵ်း - သၢဝ်းႁႃႈၸွႆႉ၊ ၵွၵ်းတွင်းလိူင်ၸႅတ်ႈၸႅတ်ႈဢၼ်ထိူၵ်ႈၵႃႈပဵင်းတၢၼ်ႇၶမ်းၼၼ်ႉသွင်လုၵ်ႈဢေႃႈ။

28ၵဝ်လၢတ်ႈတီႈၶဝ်လႄႈဝႃႈ၊ “သူၼႆႉပဵၼ်ၵေႃႉဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇႁဝ်းၼၼ်ႉဢေႃႈ။ ၶိူင်ႈပိူင်ငိုၼ်းၶမ်းၸိူဝ်းၼႆႉၵေႃႈပဵၼ်ၶိူင်ႈတၢင်းလူႇဢၼ်မူတ်းၸၢင်ႇလႄႈၶဝ်ၸိူဝ်းဢၼ်မီးၸႂ်ၸေႇတၼႃႇၼၼ်ႉလူႇတၢၼ်းတီႈမၼ်းၸဝ်ႈဢေႃႈ။-

29သူဢွၼ်ၵၼ်ပႂ်ႉထိင်းၸိူဝ်းၼႆႉလီလီ တေႃႇထိုင်ႁဝ်းႁွတ်ႈၽႅဝ်ၵႂႃႇၵႃႈတီႈဝဵင်း ယေႇရုသလႅမ်ႇ၊ တႃႉ။ ၵႃႈတီႈၼၼ်ႈၸင်ႈႁဵဝ်ႈၵႃႈတီႈၽၢႆႇၼႃႈယဵၸ်ႈပရေႃးႁဵၵ်ႈသေလႄႈဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ယဵၸ်ႈပရေႃးႁဵၵ်ႈလႂ်၊ၵူၼ်း လေႇဝိ၊ လႂ် ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ လႂ်ၸိူဝ်းၼၼ်ႉၵႃႈတီႈၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ပုၼ်ႉတႃႉ၊” ဝႃႈၼင်ႇၼႆဢေႃႈ။-

30ပိူဝ်ႈၼႆလႄႈယဵၸ်ႈပရေႃးႁဵၵ်ႈတင်းလၢႆတင်းၵူၼ်း လေႇဝိ၊ ၸိူဝ်းၼၼ်ႉဢွၼ်ၵၼ်ပႂ်ႉထိင်းငိုၼ်းၶမ်းတင်းၶိူင်ႈပိူင်ၸိူဝ်းၼၼ်ႉႁႂ်ႈလႆႈဢဝ်ၵႂႃႇတီႈၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။

31ၼႂ်းလိူၼ်တီႈၼိုင်ႈဝၼ်းတီႈသိပ်းသွင်ၼၼ်ႉႁဝ်းဢွၼ်ၵၼ်ဢွၵ်ႇသေၵႃႈတီႈၼမ်ႉ ဢႁႃႇဝႃႉ၊ လႄႈၵႂႃႇၸူးဝဵင်း ယေႇရုသလႅမ်ႇ၊ ဢေႃႈ။ ၽြႃးပဵၼ်ၸဝ်ႈမီးလူၺ်ႈၵၼ်တင်းႁဝ်းယူႇ၊ၵႅတ်ႇၶႄႁႄႉၵင်ႈပၼ်ႁႂ်ႈႁဝ်းလွတ်ႈသေၵႃႈၼႂ်းမိုဝ်းရၢၼ်ႇသူႇဢိၵ်ႇတင်းၵေႃႉဢၼ်လွမ်ပႂ်ႉၸူၼ်ဢဝ်ၸွမ်းတႃႈၸွမ်းတၢင်းၼၼ်ႉဢေႃႈ။-

32မိူဝ်ႈဢၼ်ႁဝ်းႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ ၼၼ်ႉၸိုင်၊ႁဝ်းလိုဝ်ႈယူႇသၢမ်ဝၼ်းသေယဝ်ႉ၊-

33ၼႂ်းဝၼ်းဢၼ်ထူၼ်ႈထိုင်သီႇဝၼ်းၼၼ်ႉႁဝ်းဢွၼ်ၵၼ်ၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈလႄႈၸင်ႈႁဵဝ်ႈငိုၼ်းၶမ်းၶိူင်ႈပိူင်ၸိူဝ်းၼၼ်ႉသေယဝ်ႉ၊ဢၢပ်ႈပၼ်ၵႃႈၼႂ်းမိုဝ်းယဵၸ်ႈပရေႃးႁဵၵ်ႈ မေႇရမုတ်ႉ၊ လုၵ်ႈၸၢႆး ဢုရိယႃး၊ ၼၼ်ႉဢေႃႈ။ ဢေးလႃႇၸႃႇ၊ လုၵ်ႈၸၢႆး ၽိၼႁတ်ႉ၊ ဢိၵ်ႇတင်းၵူၼ်း လေႇဝိ၊ သွင်ၵေႃႉဢၼ်ပဵၼ် ယေႃးၸပတ်ႉ၊ လုၵ်ႈၸၢႆး ယေႇသွႃႇ၊ တင်း ၼေႃႇတိ၊ လုၵ်ႈၸၢႆး ပိၼုၺ်ႇ၊ ၸိူဝ်းၼၼ်ႉၵေႃႈ မီးယူႇလူၺ်ႈၵၼ်တင်း မေႇရမုတ်ႉ၊ ဢေႃႈ။-

34ဢဝ်ၶိူင်ႈပိူင်ၸိူဝ်းၼၼ်ႉၸင်ႈႁိဝ်ႈလႄႈၼပ်ႉဢၢၼ်ႇတင်းမူတ်းသေယဝ်ႉ၊မၢတ်ႈမၢႆတႅမ်ႈဝႆႉၼမ်ႉၼၵ်းမၼ်းတင်းသဵင်ႈတင်းလူင်ၵႃႈၼႂ်းဝၼ်းၼၼ်ႉၵမ်းလဵဝ်ဢေႃႈ။

35ၶဝ်ၸိူဝ်းဢၼ်ပွၵ်ႈၶိုၼ်းမႃးသေတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇလႄႈတူၵ်းၵႅၼ်းၼၼ်ႉတင်းသဵင်ႈတင်းလူင်ဢွၼ်ၵၼ်ႁဵတ်းတၢင်းလူႇဢၼ်တုတ်ႇၽႆးၵႃႈတီႈၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။ ၶဝ်သၢၵ်ႈလူႇဝူဝ်းပေႃႈသိပ်းသွင်တူဝ်ပုၼ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်၊သူဝ်းပေႃႈၵဝ်ႈသိပ်းႁူၵ်းတူဝ်၊သူဝ်းဢွၼ်ႇၸဵတ်းသိပ်းၸဵတ်းတူဝ်ဢေႃႈ။ ပုၼ်ႈဢၼ်ႁဵတ်းတၢင်းလူႇဢၼ်ၽေႇဢပျတ်ႈၸိုင်၊ဢဝ်ပႄႉသိပ်းသွင်တူဝ်ဢေႃႈ။ တင်းသဵင်ႈတင်းမူတ်းၸမ်ႉ၊ႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။-

36ၶဝ်သမ်ႉဢဝ်လိၵ်ႈဢမိင်ႉၸဝ်ႈမုၼ်ယႂ်ႇၶုၼ်ႁေႃၶမ်းဢၼ်ပၼ်တီႈၶဝ်မႃးၼၼ်ႉ ဢၢပ်ႈပၼ်ၵႃႈၼႂ်းမိုဝ်းဝုၼ်ႇတင်းလၢႆ၊ဢိၵ်ႇတင်းၶုၼ်ဢၼ်ဢုပ်ႉမိူင်းတင်းလၢႆၵႃႈတီႈၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ ၼၼ်ႉလႄႈၶဝ်ၸိူဝ်းၼၼ်ႉဢွၼ်ၵၼ်ၸွႆႈၵမ်ႉၸွႆႈထႅမ်ၵူၼ်းတင်းလၢႆဢိၵ်ႇတင်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။

← Chapter 7 Jump to: Chapter 9 →