Mark 1 — Shan NCL

1ၼႆႉၸမ်ႉ၊ပဵၼ်ငဝ်ႈႁၢၵ်ႈတြႃးၶၢဝ်ႇငၢဝ်းသိူဝ်းပျေႃႇ ၸဝ်ႈယေႇသုၶရိၸ်ႈ၊ လုၵ်ႈၽြႃးပဵၼ်ၸဝ်ႈဢေႃႈ။-

2တြႃးၸဝ်ႈပဵၼ်ၸွမ်းၵႃႈၼင်ႇၵျၢမ်းဢၼ်ပရေႃးၽႅတ်ႈ ဢိသႃႇယႃႉ၊ တႅမ်ႈဝႆႉလႄႈဝႃႈ၊ “တူၺ်းလူး။ ၵဝ်ပွႆႇၸႂ်ႉၽူႈတၢင်တူဝ်ၵဝ် ၵႂႃႇပႃႈၼႃႈမႂ်း၊ ပုၼ်ႈတၵ်းလႆႈမႄးႁဵတ်းမႄးႁႅၼ်း သဵၼ်ႈတၢင်းမႂ်းဢေႃႈ။

3သဵင်ၵႂၢမ်းၵေႃႉဢၼ်ႁွင်ႉသႅၼ်ႇၵႃႈၼႂ်းထိူၼ်ႇလႅင်ႉၼၼ်ႉဝႃႈၸမ်ႉ၊ မႄးသဵၼ်ႈတၢင်းထႃႇဝရႃႉၽြႃးတႃႉ။ ႁႂ်ႈသဵၼ်ႈတၢင်းသိုဝ်ႈလီပုၼ်ႈမၼ်းၸဝ်ႈတၵ်းပႆတႃႉ၊” ဝႃႈၼင်ႇၼႆၼၼ်ႉဢေႃႈ။

4သြႃႇ ယူဝ်းႁၢၼ်ႇ၊ ပေႃႇမႃးပၼ်မၢင်ႇၵလႃႇပပ်ႉတိၸမ်ႇ ယူႇဢိၵ်ႇတင်းႁေႃးလၢတ်ႈတြႃးၸဝ်ႈတီႈၵူၼ်းတင်းလၢႆယူႇလႄႈဝႃႈ၊ “ပိၼ်ႇၸႂ်သူလႄႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၽြႃးပဵၼ်ၸဝ်ႈတၵ်းပွႆႇလွတ်ႈဢပျတ်ႈသူဢေႃႈ၊” ဝႃႈၼင်ႇၼႆဢေႃႈ။-

5ၵူၼ်းၼမ်ၼႃႇလုၵ်ႉသေၵႃႈတီႈဢိူင်ႇ ယုတႃႉ၊ ၵူႈတီႈၵူႈလႅၼ်ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ ဢွၵ်ႇမႃးၸူးတီႈသြႃႇ ယူဝ်းႁၢၼ်ႇ၊ လႄႈၶဝ်ၽုၺ်ႇၼႄဢပျတ်ႈတူဝ်ၸဝ်ႈၵဝ်ႇသေယဝ်ႉ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇၼႂ်းၼမ်ႉ ယေႃးတၢၼ်ႇ၊ တီႈသြႃႇ ယူဝ်းႁၢၼ်ႇ၊ ဢေႃႈ။

6သြႃႇ ယူဝ်းႁၢၼ်ႇ၊ ၼႆႉ၊ၼုင်ႈၶူဝ်းၶူၼ်ၵလႃႇဢုၵ်ႈလႄႈဢဝ်သၢႆၼင်ႁတ်ႉဢႅဝ်မၼ်းဝႆႉသေယဝ်ႉ၊ၵိၼ်မႅင်းၸၵ်းတႅၼ်ၵပ်းတင်းၼမ်ႉၽိုင်ႈထိူၼ်ႇၵူၺ်းဢေႃႈ။-

7ဢၼ်မၼ်းႁေႃးလၢတ်ႈတီႈမူႇၵူၼ်းတင်းလၢႆလႄႈဝႃႈၸမ်ႉ၊ “ၸဝ်ႈဢၼ်မႃးပႃႈလင်ၵဝ်ၼၼ်ႉယႂ်ႇမျၢတ်ႈၼႃႇသေၵဝ်ဢေႃႈ။ ၵဝ်ယင်းဢမ်ႇထိူၵ်ႈၵူမ်ႈ လႄႈၵႄႈသၢႆၶႅပ်းတိၼ်ၸဝ်ႈၼၼ်ႉ။-

8ၵဝ်ၼႆႉပၼ်မၢင်ႇၵလႃႇပပ်ႉတိၸမ်ႇတီႈသူၼႂ်းၼမ်ႉၵူၺ်းဢေႃႈ။ ၸဝ်ႈၼၼ်ႉၸမ်ႉ၊တၵ်းပၼ်မၢင်ႇၵလႃႇပပ်ႉတိၸမ်ႇတီႈသူၼႂ်းဝိၺိၺ်ႇဢၼ်မူတ်းၸၢင်ႇၸဝ်ႈဢေႃႈ၊” ဝႃႈၼင်ႇၼႆဢေႃႈ။

9မိူဝ်ႈၼၼ်ႉ၊ ၸဝ်ႈယေႇသု၊ လုၵ်ႉသေၵႃႈတီႈဢိူင်ႇ ၵႃႇလိလႄး၊ ဝဵင်း ၼႃႇၸရႅတ်ႈ၊ မႃးၶၢမ်ႇဢဝ်မၢင်ႇၵလႃႇပပ်ႉတိၸမ်ႇတီႈသြႃႇ ယူဝ်းႁၢၼ်ႇ၊ ၵႃႈၼႂ်းၼမ်ႉ ယေႃးတၢၼ်ႇ၊ ဢေႃႈ။-

10ယၢမ်းမိူဝ်ႈဢၼ် ၸဝ်ႈယေႇသု၊ လုၵ်ႉသေၵႃႈၼႂ်းၼမ်ႉဢွၵ်ႇမႃးၵမ်းလဵဝ်ယူႇၼၼ်ႉၸိုင်၊လႆႈႁၼ်ၼႃႈၽႃႉၵၢင်ႁၢဝ်ၽုၺ်ႇပိုတ်ႇၵႂႃႇသေလႄႈဝိၺိၺ်ႇမူတ်းၸၢင်ႇၸဝ်ႈဢၼ်ပဵၼ်မိူၼ်ၸိူဝ်ႉၼင်ႇၼူၵ်ႉတူႈၼၼ်ႉလူင်းမႃးၵႃႈၼိူဝ်မၼ်းၸဝ်ႈဢေႃႈ။-

11မိူဝ်ႈၼၼ်ႉ၊မီးသဵင်ဢၼ်လုၵ်ႉၵႃႈတီႈၵၢင်ႁၢဝ်မေႃးမႃးလႄႈဝႃႈ၊ “မႂ်းပဵၼ်လုၵ်ႈၵဝ်ဢၼ်ၵဝ်ႁၵ်ႉၼႃႇ၊ၵေႃႉဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊” ဝႃႈၼင်ႇၼႆဢေႃႈ။

12မိူဝ်ႈၼၼ်ႉၵမ်းလဵဝ်ဝိၺိၺ်ႇၸဝ်ႈႁႂ်ႈ ၸဝ်ႈယေႇသု၊ ၵႂႃႇၵႃႈၼႂ်းထိူၼ်ႇလႅင်ႉသေဢေႃႈ။-

13မၼ်းၸဝ်ႈယူႇၵႃႈၼႂ်းထိူၼ်ႇလႅင်ႉၼၼ်ႉသီႇသိပ်းဝၼ်းတဵမ်တဵမ်၊လႆႈၶၢမ်ႇတၢင်းဢၼ်ၸႃႇတၢၼ်ႇၸၢမ်းတူၺ်းယႃႉၵဝ်းဢေႃႈ။ ၵႃႈတီႈၼၼ်ႈတူဝ်ထိူၼ်ႇႁၢႆႉလႂ်ၵေႃႈမီးဢေႃႈ။ ၵူၺ်းၵႃႈ၊တမၢၼ်ႇၵၢင်ႁၢဝ်တင်းလၢႆလုမ်းလႃးလူတူၺ်းမၼ်းၸဝ်ႈဢေႃႈ။

14ဝၢႆးသေသြႃႇ ယူဝ်းႁၢၼ်ႇ၊ လႆႈၶမ်ထွင်ႇယဝ်ႉၸိုင်၊ ၸဝ်ႈယေႇသု၊ ၶိုၼ်ႈၵႂႃႇၸူးဢိူင်ႇ ၵႃႇလိလႄး၊ သေယဝ်ႉ၊ႁေႃးလၢတ်ႈၶၢဝ်ႇငၢဝ်းတြႃးသိူဝ်းပျေႃႇလွင်ႈၽြႃးပဵၼ်ၸဝ်ႈလႄႈဝႃႈ၊-

15“ဢၶိင်ႇမၼ်းထိုင်မႃးယဝ်ႉ။ မိူင်းၽြႃးပဵၼ်ၸဝ်ႈမႃးၸမ်ယူႇယဝ်ႉ။ ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူတႃႉ။ ယုမ်ႇမၢတ်ႈတြႃးသိူဝ်းပျေႃႇၸဝ်ႈတႃႉ၊” ဝႃႈၼင်ႇၼႆဢေႃႈ။

16ၼႂ်းမိူဝ်ႈဢၼ် ၸဝ်ႈယေႇသု၊ ပႆလဵပ်ႈၸွမ်းတၢင်းၽင်ႇၼွင် ၵႃႇလိလႄး၊ ၵႂႃႇယူႇၼၼ်ႉ၊မၼ်းၸဝ်ႈထူပ်းႁၼ်ၵူၼ်းလႃႈၼမ်ႉ သွင်ပီႈၼွင်ႉ၊ သိမုၼ်ႇ၊ ဢိၵ်ႇတင်း ဢၼ်ႇတရေႇ၊ ဝၢၼ်ႇၶႄယူႇဢေႃႈ။-

17ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ၸွမ်းၵဝ်မႃးတႃႉ။ ၵဝ်တၵ်းႁႂ်ႈသူပဵၼ်ၵူၼ်းဢၼ်ႁႃၵူၼ်းဢေႃႈ၊” ဝႃႈၼင်ႇၼႆဢေႃႈ။-

18ၶဝ်ၵေႃႈဝႆႉပႅတ်ႈၶႄၶဝ်ၵမ်းလဵဝ်သေလႄႈၸွမ်းမၼ်းၸဝ်ႈၵႂႃႇဢေႃႈ။

19ၸဝ်ႈယေႇသု၊ ပူၼ်ႉၵႂႃႇထႅင်ႈဢိတ်းၼိုင်ႈယဝ်ႉၸင်ႇ၊ထူပ်းႁၼ်ထႅင်ႈၵူၼ်းလႃႈၼမ်ႉသွင်ၵေႃႉပီႈၼွင်ႉ ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ လုၵ်ႈၸၢႆး ၸေႇပေႇတႄး၊ ဢၼ်တိုၵ်ႉမႄးၽုင်မႄးၵုပ်းၶႄၶဝ်ယူႇၵႃႈၼိူဝ်ႁိူဝ်းၼၼ်ႉဢေႃႈ။-

20ၸဝ်ႈယေႇသု၊ ၵေႃႈ၊မိူဝ်ႈဢၼ်ထူပ်းႁၼ်ၶဝ်ၸိုင်၊ႁွင်ႉဢဝ်ၵမ်းလဵဝ်လႄႈ၊ၶဝ်ၵေႃႈဝႆႉပႅတ်ႈပေႃႈၶဝ် ၸေႇပေႇတႄး၊ ၵႃႈၼိူဝ်ႁိူဝ်းႁူမ်ႈလူၺ်ႈၵၼ်တင်းလုၵ်ႈၸၢင်ႈၶဝ်တင်းလၢႆသေယဝ်ႉ၊ၸွမ်းမၼ်းၸဝ်ႈၵႂႃႇဢေႃႈ။

21ၸဝ်ႈယေႇသု၊ ဢိၵ်ႇတင်းတပႄးၸဝ်ႈတင်းလၢႆ၊ဢွၼ်ၵၼ်ၶိုၼ်ႈၵႂႃႇၸူးဝဵင်း ၵပိူဝ်ႇၼေႇဢုမ်ႇ၊ သေယဝ်ႉ၊ၼႂ်းဝၼ်းၵမ်သိၼ်ၼၼ်ႉၵမ်းလဵဝ်မၼ်းၸဝ်ႈၶဝ်ႈၵႃႈၼႂ်းၸရွပ်ႈႁေႃးတြႃးသေလႄႈႁေႃးလၢတ်ႈသင်ႇသွၼ်ပၼ်ဢေႃႈ။-

22ၶဝ်ၸိူဝ်းဢၼ်လႆႈထွမ်ႇလႆႈငိၼ်းတင်းသဵင်ႈတင်းလူင်ဢွၼ်ၵၼ်ဢၢမ်းလွင်ႈတၢင်းဢၼ်မၼ်းၸဝ်ႈသင်ႇသွၼ်ၼၼ်ႉၼႃႇလူင်လၢင်၊ၵွပ်ႈပိူဝ်ႈမၼ်းၸဝ်ႈသင်ႇသွၼ်ပၼ်ၶဝ်မိူၼ်ၸိူဝ်ႉၼင်ႇသြႃႇမေႃၵျၢမ်းထမ်ႇမႃႉၶဝ်ဢမ်ႇၸႂ်ႈ။ မိူၼ်ၸိူဝ်ႉၼင်ႇၵေႃႉဢၼ်မီးဢႃႇၼႃႇၼၼ်ႉဢေႃႈ။

23ယၢမ်းမိူဝ်ႈၼၼ်ႉၵမ်းလဵဝ်၊ၵူၼ်းဢၼ်ၽိူဝ်ႉၶဝ်ႈၵေႃႉၼိုင်ႈၶဝ်ႈမႃးသေလႄႈပၢဝ်ႇသႅၼ်ႇလႄႈဝႃႈ၊-

24“ဢူဝ်း ယေႇသု၊ ၵူၼ်းဝဵင်း ၼႃႇၸရႅတ်ႈ၊ ၸဝ်ႈႁဝ်းလူဝ်ႇႁဵတ်းသင်တင်းႁဝ်းၶႃႈ။ ၸဝ်ႈႁဝ်းမႃးႁႂ်ႈလႆႈယႃႉပႅတ်ႈႁဝ်းၶႃႈ၊ၶႃႈႁိုဝ်း။ ၸဝ်ႈႁဝ်းပဵၼ်ၽူႈလႂ်ၼၼ်ႉ၊ၵဝ်ၶႃႈႁုယူႇၶႃႈဢေႃႈ။ ပဵၼ်ၽူႈမူတ်းၸၢင်ႇၽြႃးပဵၼ်ၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။

25ၸဝ်ႈယေႇသု၊ ပူင်ဢမိင်ႉတီႈၽိူဝ်ႉၼၼ်ႉလႄႈဝႃႈ၊ “ယူႇတဵတ်ႇတဵတ်ႇတႃႉ။ ဢွၵ်ႇသေၵႃႈၼႂ်းမၼ်းၵႂႃႇတႃႉ။” မိူဝ်ႈဢၼ်ဝႃႈၼင်ႇၼႆၸိုင်။

26ၽိူဝ်ႉၼၼ်ႉ၊ႁဵတ်းႁႂ်ႈၵေႃႉၼၼ်ႉၵႅၼ်ႇၶႅင်ၵႂႃႇယဝ်ႉၸင်ႇ၊ႁွင်ႉသႅၼ်ႇလူၺ်ႈတင်းသဵင်ဢၼ်ယႂ်ႇၼႃႇသေလႄႈဢွၵ်ႇၵႂႃႇသေဢေႃႈ။-

27ၵူၼ်းတင်းသဵင်ႈတင်းလူင်ဢၢမ်းၼႃႇလူင်လၢင်၊ထၢၼ်ႈပေႃးၵေႃႉၼိုင်ႈလႄႈၵေႃႉၼိုင်ႈလၢတ်ႈၸႃတီႈၵၼ်လႄႈဝႃႈ၊ “လွင်ႈတၢင်းၼႆႉပဵၼ်ၸိူဝ်ႉၼင်ႇႁိုဝ်။ ပဵၼ်တြႃးဢၼ်မႂ်ႇႁိုဝ်း။ ၸဝ်ႈၼႆႉယင်းပႃးတင်းတၼ်းၶူဝ်းလႄႈႁေႃႈၽိူဝ်ႉႁေႃႈၽီလႆႈ၊ၽိူဝ်ႉၽီၵေႃႈထွမ်ႇၵႂၢမ်းလူင်ပႄႇ၊” ဝႃႈၼင်ႇၼႆဢေႃႈ။

28ပိူဝ်ႈၼႆလႄႈၶၢဝ်ႇငၢဝ်းလွင်ႈ ၸဝ်ႈယေႇသု၊ ႁူင်ႁၢင်းၸွတ်ႇတူဝ်ႈၵႂႃႇၵႃႈၼႂ်းဢိူင်ႇ ၵႃႇလိလႄး၊ ၵူႈတီႈၵူႈလႅၼ်ၵမ်းလဵဝ်ဢေႃႈ။

29ၸဝ်ႈယေႇသု၊ တင်းတပႄးၸဝ်ႈတင်းလၢႆဢၼ်ပႃး ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ ဢွၵ်ႇသေၵႃႈၼႂ်းၸရွပ်ႈႁေႃးတြႃးလႄႈၶဝ်ႈၵႂႃႇၵႃႈၼႂ်းႁိူၼ်း သိမုၼ်ႇ၊ ဢိၵ်ႇတင်း ဢၼ်ႇတရေႇ၊ ၶဝ်ပီႈၼွင်ႉၼၼ်ႉဢေႃႈ။-

30မႄႈဢွၵ်ႇၼၢႆး သိမုၼ်ႇ၊ ၼၼ်ႉၼၢဝ်လႄႈၼွၼ်းယူႇဢေႃႈ။ ၶဝ်လဝ်ႈလၢတ်ႈတီႈမၼ်းၸဝ်ႈၵမ်းလဵဝ်ဢေႃႈ။-

31မၼ်းၸဝ်ႈၵေႃႈၵႂႃႇယိပ်းဢဝ်မိုဝ်းမၼ်းသေယဝ်ႉ၊တိုတ်ႉလုၵ်ႉဢေႃႈ။ ၼၢဝ်မၼ်းၸိုၼ်ႈႁၢႆၵမ်းလဵဝ်သေလႄႈမၼ်းလုၵ်ႉႁဵတ်းဝၢတ်ႈႁပ်ႉၶၢမ်ႇၶႅၵ်ႇဢေႃႈ။

32မိူဝ်ႈဢၼ်ၵၢင်ဝၼ်းတူၵ်းယဝ်ႉလႄႈပဵၼ်ၶိင်ႇႁူဝ်ၶမ်ႈၸိုင်၊ၵူၼ်းၵႃႈတီႈၼၼ်ႈဢဝ်ၵူၼ်းၶႆႈၵူၼ်းပဵၼ်တင်းၵူၼ်းဢၼ်ၽီၶဝ်ႈၽိူဝ်ႉၶဝ်ႈ၊ၵႃႈမီးတင်းသဵင်ႈတင်းလူင်မႃးတီႈမၼ်းၸဝ်ႈလႄႈ၊-

33ၵူၼ်းဝဵင်းတင်းဝဵင်းဢွၼ်ၵၼ်ၸုတုမ်ၵၼ်ယူႇၽၢႆႇၼႃႈႁိူၼ်းဢေႃႈ။-

34မၼ်းၸဝ်ႈၵေႃႈ၊ႁႂ်ႈတၢင်းၶႆႈတၢင်းပဵၼ်ၵူႈမဵဝ်းမဵဝ်းၸိုၼ်ႈႁၢႆမႃးလီလႄႈ၊ၽိူဝ်ႉၽီၼမ်ၼႃႇၵေႃႈမၼ်းၸဝ်ႈႁေႃႈဢွၵ်ႇပႅတ်ႈဢေႃႈ။ မၼ်းၸဝ်ႈဢမ်ႇပၼ်ဢၶႂၢင်ႉၽိူဝ်ႉၽီၸိူဝ်းၼၼ်ႉလၢတ်ႈၵႂၢမ်းသေၶေႃႈသေၵမ်း၊ပိူဝ်ႈဢၼ်ၶဝ်ႁုၸၵ်းမၼ်းၸဝ်ႈယူႇၼၼ်ႉဢေႃႈ။

35ၶိင်ႇၵၢင်ၼႂ်ၸဝ်ႉ၊ၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉ၊ ၸဝ်ႈယေႇသု၊ လုၵ်ႉသေလႄႈဢွၵ်ႇႁိူၼ်းၵႂႃႇ၊သမ်ႉပႆဢွၵ်ႇဝဵင်းၵႂႃႇၵႃႈတီႈဢၼ်ဢမ်ႇမီးၵူၼ်းၼၼ်ႉယဝ်ႉၸင်ႇ၊သူးတွင်းၵႃႈတီႈၼၼ်ႈဢေႃႈ။-

36သိမုၼ်ႇ၊ ဢိၵ်ႇတင်းၵေႃႉသႄႈမၼ်းတင်းလၢႆၸွမ်းႁႃမၼ်းၸဝ်ႈလႄႈ၊-

37မိူဝ်ႈဢၼ်ထူပ်းႁၼ်ၸိုင်၊လဝ်ႈလၢတ်ႈလႄႈဝႃႈ၊ “ၵူၼ်းတင်းသဵင်ႈတင်းလူင်ထၢမ်ႁႃၸဝ်ႈႁဝ်းယူႇၶႃႈဢေႃႈ၊” ဝႃႈၼင်ႇၼႆဢေႃႈ။

38ၵူၺ်းၵႃႈ၊မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ႁဝ်းဢွၼ်ၵၼ်ၵႂႃႇၼႂ်းဝၢၼ်ႈႁိမ်းႁွမ်းၸိူဝ်းၼႆႉတႃႉႁဝ်း။ တီႈၶဝ်ၸိူဝ်းၼႆႉၵေႃႈၵဝ်လူဝ်ႇၵႂႃႇႁေႃးတြႃးၼင်ႇၵဝ်ႇဢေႃႈ။ ၵဝ်မႃးႁႂ်ႈလႆႈႁဵတ်းၸိူဝ်ႉၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။

39ႁဵတ်းၼၼ်လႄႈမၼ်းၸဝ်ႈလႄႇၵႂႃႇၵႃႈၼႂ်းဢိူင်ႇ ၵႃႇလိလႄး၊ ၵူႈတီႈၵူႈလႅၼ်ႁႂ်ႈလႆႈႁေႃးတြႃးၵႃႈၼႂ်းၸရွပ်ႈႁေႃးတြႃးတင်းလၢႆလႂ်၊ဢိၵ်ႇတင်းႁေႃႈၽီႁေႃႈၽိူဝ်ႉတင်းလၢႆဢွၵ်ႇပႅတ်ႈဢေႃႈ။

40ၵူၼ်းဢၼ်ပဵၼ်တုတ်ႈ ၵေႃႉၼိုင်ႈ၊မႃးတီႈ ၸဝ်ႈယေႇသု၊ လႄႈၶုပ်ႉမူပ်ႇသေယဝ်ႉ၊တွင်းပၢၼ်ႇလႄႈလဝ်ႈလၢတ်ႈဝႃႈ၊ “ပေႃးၸဝ်ႈႁဝ်းမီးဢလူဝ်ႇၸိုင်၊ႁႂ်ႈၵဝ်ၶႃႈမူတ်းသႂ်လႆႈယူႇၶႃႈဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။

41မီးၸႂ်ဢဵတ်းလူၼႃႇလႄႈ ၸဝ်ႈယေႇသု၊ ယိုၼ်းမိုဝ်းတၢင်ႇၵႃႈၼိူဝ်ၵေႃႉၼၼ်ႉသေယဝ်ႉလၢတ်ႈဝႃႈ၊ “ၵဝ်မီးဢလူဝ်ႇဢေႃႈ။ ႁႂ်ႈမူတ်းသႂ်တႃႉ၊” ဝႃႈၼင်ႇၼႆဢေႃႈ။-

42ယေႃးၵႃႇမၼ်းၵေႃႈႁၢႆၵမ်းလဵဝ်လႄႈႁွတ်ႈထိုင်တၢင်းဢၼ်မူတ်းသႂ်မႃးဢေႃႈ။-

43မၼ်းၸဝ်ႈၵေႃႈႁၢမ်ႈတၢပ်ႈမၼ်းတႄႉတႄႉဝႃႈဝႃႈသေယဝ်ႉ၊ပွႆႇႁႂ်ႈမၼ်းဢွၵ်ႇၵႂႃႇလူၺ်ႈၵႂၢမ်းသင်ႇလၢတ်ႈလႄႈဝႃႈ၊-

44“ထွမ်ႇလူး။ လွင်ႈၼႆႉယႃႇပေလၢတ်ႈၼႄတီႈၽူႈလႂ်သေဢိတ်း။ ၵူၺ်းၵႃႈ၊ၵႂႃႇတီႈယဵၸ်ႈပရေႃးႁဵၵ်ႈ လႄႈၼႄပျႃးတူဝ်မႂ်းႁႂ်ႈမၼ်းၸၢမ်းတူၺ်းသေယဝ်ႉ၊လွင်ႈဢၼ်မႂ်းမူတ်းသႂ်ယဝ်ႉၼၼ်ႉ၊ၼင်ႇႁိုဝ်တၵ်းပဵၼ်သၢၵ်ႈသေႇတီႈပိူၼ်ႈၸိုင်၊ႁဵတ်းတၢင်းလူႇဢၼ်ၸွမ်းၼင်ႇတြႃး မူဝ်းသေႇ၊ မီးဝႆႉၼၼ်ႉတႃႉ၊” ဝႃႈၼင်ႇၼႆဢေႃႈ။

45ၵူၺ်းၵႃႈ၊ၵေႃႉၼၼ်ႉဢွၵ်ႇၵႂႃႇမွၵ်ႇလၢတ်ႈၸွတ်ႇၵႂႃႇၵူႈတီႈၵူႈလႅၼ်ဢေႃႈ။ ပိူဝ်ႈဢၼ်မၼ်းလၢတ်ႈၼမ်ၼႃႇလူင်လၢင်တေႃႇႁွတ်ႈ ၸဝ်ႈယေႇသု၊ ဢမ်ႇၸၢင်ႈၶဝ်ႈၵႃႈၼႂ်းဝဵင်းၵႂႃႇထၢင်ႇထၢင်ႇသႃးသႃးယဝ်ႉလႄႈ၊လႆႈယူႇၵႃႈတီႈဝၢၼ်ႈၼွၵ်ႈၵူၺ်းဢေႃႈ။ ပိူၼ်ႈဢွၼ်ၵၼ်လုၵ်ႉသေၵူႈတီႈၵူႈလႅၼ်မႃးၸူးတီႈမၼ်းၸဝ်ႈဢေႃႈ။