1 Peter 1

Shan

Jump to: Chapter 2 →

1ၵဝ် ပေႇတရူႉ ဢၼ်ပဵၼ်တမၢၼ်ႇ ယေႇသူႉၶရိၸ်ႈ ၼႆႉ တႅမ်ႈပၼ်ငိၼ်းၵႂႃႇၵႃႈတီႈၶႅၵ်ႇဢႃႇၵၼ်ႇတူႉ ဢၼ်ၽၢတ်ႇၽႄၵၼ် မီးယူႇၵူႈတီႈၵူႈလႅၼ် ၵႃႈၼႂ်းမိူင်း ပွၼ်ႇတူႉ ၊ မိူင်း ၵလႃႇတီႉ ၊ မိူင်း ၵပ်ႉပတေႃးၵီႉ ၊ မိူင်း ဢႃႇသီႉ ဢိၵ်ႇတင်းမိူင်း ပီႉသူႉၼီႉ ၊-

2ဢၼ်ဝႃႈၶဝ်ၸိူဝ်းဢၼ် လႆႈၶၢမ်ႇတၢင်းဢၼ်မၼ်းၸဝ်ႈ လိူၵ်ႈၵဵပ်းဢဝ် ၵႃႈၼင်ႇၺၢၼ်ႇဢၼႃႇၵႃႉတမ်ႇသႃႉ ၸဝ်ႈပေႃႈၽြႃးပဵၼ်ၸဝ်ႈလႄႈ ႁွတ်ႈထိုင်တၢင်းဢၼ် ဝီႉၺိၺ်ႇၸဝ်ႈႁႂ်ႈမူတ်းၸၢင်ႇ ႁႂ်ႈလႆႈၶၢမ်ႇဢဝ်ၵျေးၸူးတၢင်းဢၼ်ထွမ်ႇဢဝ် ဢိၵ်ႇတင်းၵျေးၸူး တၢင်းဢၼ်ဢဝ်တင်းလိူတ်ႈ ယေႇသူႉၶရိၸ်ႈ ၽႅတ်းသႂ်ႇၼၼ်ႉဢေႃႈ။ ႁႂ်ႈၵျေးၸူးၸဝ်ႈ ဢိၵ်ႇတင်းတၢင်းၼိမ်ၸဝ်ႈ ၼမ်မႃးၵိုၼ်းမႃးၵႃႈတီႈသူသေၵမ်းလူၺ်ႈ။

3ႁႂ်ႈၽြႃးပဵၼ်ၸဝ်ႈပေႃႈၸဝ်ႈႁဝ်း ယေႇသူႉၶရိၸ်ႈ ဢၼ်ၸွမ်းလူၺ်ႈ ၵရူႉၼႃႇၸဝ်ႈ ဢၼ်ယႂ်ႇၼႃႇသေလႄႈ ႁႂ်ႈႁဝ်းၵိူတ်ႇပဵၼ်မႃး ႁႂ်ႈလႆႈမီးတၢင်းဢၼ်မုင်ႈထႃႈမွင်းထႃႈ ဢၼ်ၸၢပ်ႈသႅင်ႇၵၼ်တင်းတၢင်းဢၼ်ဢသၢၵ်ႈလိပ်း ၵွပ်ႈပိူဝ်ႈတၢင်းဢၼ်မၼ်းၸဝ်ႈႁႂ်ႈ ယေႇသူႉၶရိၸ်ႈ လုၵ်ႉၵႃႈတၢင်းတၢႆၶိုၼ်းလိပ်း၊-

4လွင်ႈၼင်ႇႁိုဝ်တၵ်းႁႂ်ႈႁဝ်းလႆႈၶၢမ်ႇဢမူၺ်ႇၸဝ်ႈ ဢၼ်ၵၢင်းလွတ်ႈတင်းတၢင်းဢၼ်တူႇဢၼ်ၼဝ်ႈ၊ တၢင်းဢၼ်ၵူဝ်ႈဢၼ်ၵိူၵ်ႇ၊ တၢင်းဢၼ်ႁဵဝ်ႇဢၼ်ၸွပ်ႈၸိူဝ်းၼၼ်ႉၼၼ်ႉ မီးမင်ႇၵလႃႇသေၵမ်းလူၺ်ႈ။-

5ဢမူၺ်ႇၸဝ်ႈၼၼ်ႉၸမ်ႉ၊ ပဵၼ်ဢမူၺ်ႇၸဝ်ႈ ဢၼ်သိမ်းဝႆႉၵႃႈၼိူဝ်မိူင်းၵၢင်ႁၢဝ်ၼၼ်ႉ ပုၼ်ႈသူၸိူဝ်းဢၼ်တၼ်းၶူဝ်းၽြႃးပဵၼ်ၸဝ်ႈပႂ်ႉယူႇၸွမ်းလူၺ်ႈ တၢင်းဢၼ်ယုမ်ႇမၢတ်ႈ ႁႂ်ႈလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ် ဢၼ်မႄးဝႆႉႁႂ်ႈလႆႈထၢင်ႇသႃး ၼႂ်းၶိင်ႇၵႃႇလႃႉၵမ်းလိုၼ်းပုၼ်ႉဢေႃႈ။-

6ပေႃးမီးလွင်ႈဢၼ်တၵ်းလႆႈၶၢမ်ႇ တၢင်းဢၼ်ၸၢမ်းတူၺ်းယႃႉယူၵ်ႉ ၵူႈၸိူဝ်ႉၵူႈပိူင်ၸိုင်၊ ပိၵ်ႉသမ်ႉသူလႆႈၶၢမ်ႇၵမ်းဢွၼ်ႇၼိုင်ႈ တေႃႈလဵဝ်ၼႆႉလႄႈ ၸႂ်လဵၵ်ႉသေၵေႃႈ၊ သူထွၵ်ႈလူၺ်ႈၵျေးၸူးၸဝ်ႈ ဢၼ်ဝႃႈမႃးယဝ်ႉမိူဝ်ႈဢွၼ်တၢင်းၼၼ်ႉသေလႄႈ မီးၸႂ်ဢၼ်မူၼ်ႈပျေႃႇယူႇ၊-

7လွင်ႈၼင်ႇႁိုဝ်လွင်ႈတၢင်းဢၼ် ၸႅတ်ႈထၢမ်ၸၢမ်းတူၺ်းတၢင်းဢၼ်ယုမ်ႇမၢတ်ႈသူ ဢၼ်မျၢတ်ႈလီၼႃႇသေ တၢင်းဢၼ်ၸႅတ်ႈထၢမ်ၸၢမ်းတူၺ်းငိုၼ်းၶမ်း ဢၼ်ဢဝ်ႁႂ်ႈၸိူမ်ႈသေလႄႈၸၢမ်းတူၺ်းလႆႈသေၵေႃႈ၊ ၸၢင်ႈလူႉၸၢင်ႈလႅဝ်ၼၼ်ႉၼၼ်ႉ တၵ်းပဵၼ်ပုၼ်ႈတၢင်းဢၼ်ယွင်ႈယေႃး ၵုင်ႇသရေႇ၊ မုၼ်ဢႃႇၼူႉၽေႃႇ ၼႂ်းမိူဝ်ႈဢၼ် ယေႇသူႉၶရိၸ်ႈ ပေႃႇမႃးၼၼ်ႉဢေႃႈ။-

8ၸဝ်ႈၼၼ်ႉၸိုင် ပိၵ်ႉသမ်ႉသူဢမ်ႇတွၼ်ႉႁၼ်သေၵေႃႈ သူႁၵ်ႉယူႇဢေႃႈ။ တေႃႈလဵဝ်ၼႆႉၵေႃႈ၊ သူယင်းဢမ်ႇႁၼ်ယူႇသေလႄႈ ယုမ်ႇမၢတ်ႈသေယဝ်ႉ၊ မီးတင်းၸႂ်ဢၼ်သိူဝ်းသႂၢင်ႇၼႃႇဢၼ်လၢတ်ႈဢမ်ႇသဵင်ႈလႆႈ၊ ဢၼ်ၸၢပ်ႈသႅင်ႇၵၼ်တင်းမုၼ်သရေႇၼၼ်ႉၸူမ်းပျေႃႇလႄႈ၊-

9လႆႈၶၢမ်ႇဢဝ်ဢၵျူဝ်း တၢင်းဢၼ်ယုမ်ႇမၢတ်ႈဢၼ်ဝႃႈ တၢင်းဢၼ်ၵႄႇၶျွတ်ႈဢဝ်ၸႂ်ဝီႉၺိၺ်ႇၼၼ်ႉဢေႃႈ။

10လွင်ႈတၢင်းဢၼ်ၵႄႇၶျွတ်ႈဢဝ်ၼၼ်ႉၸိုင် ပရေႃးၽႅတ်ႈတင်းလၢႆ ၸႅတ်ႈထၢမ်ၸၢမ်းတူၺ်း ႁႃဢဝ်ၸေးၸေးၸွတ်ႇၸွတ်ႇသေလႄႈ ႁေႃးလၢတ်ႈလွင်ႈၵျေးၸူးၸဝ်ႈ ဢၼ်သူလႆႈၶၢမ်ႇဢဝ်ၼၼ်ႉဝႆႉယဝ်ႉ။-

11ၶဝ်ၼၼ်ႉတွင်ႈထၢမ်လႄႈႁႃဢဝ် လွင်ႈဢၼ်မၼ်းၸဝ်ႈၶႂ်ႈဝႃႈလွင်ႈၸိူဝ်ႉၼင်ႇႁိုဝ်။ ၶိင်ႇၵႃႇလႃႉၸိူဝ်ႉၼင်ႇႁိုဝ်ၼၼ်ႉ ၼႂ်းမိူဝ်ႈဢၼ်ဝီႉၺိၺ်ႇၸဝ်ႈၶရိၸ်ႈ ဢၼ်မီးယူႇၵႃႈၼႂ်းၶဝ်ၼၼ်ႉ ၶၢမ်ႇသၢၵ်ႈသေႇလွင်ႈတၢင်းၽၢၼ် ဢၼ်ၸဝ်ႈၶရိၸ်ႈတၵ်းလႆႈၶၢမ်ႇ ဢိၵ်ႇတင်းလွင်ႈမုၼ်ၸေးၸိမ်ႇ ဢၼ်မၼ်းၸဝ်ႈတၵ်းလႆႈၶဝ်ႈၸၢမ်ႇၸႃး လိုၼ်းသေမၼ်းၸဝ်ႈၶၢမ်ႇတၢင်းၽၢၼ်ယဝ်ႉၼၼ်ႉဢေႃႈ။-

12တီႈၶဝ်ၼၼ်ႉၸိုင်မၼ်းၸဝ်ႈၽုၺ်ႇဢွၵ်ႇၼႄပျႃး လွင်ႈဢၼ်ၶဝ်လႆႈပွင်ႁဵတ်းလွင်ႈတၢင်းဢၼ်မၼ်းၸဝ်ႈ ဢဝ်ၶဝ်ၸိူဝ်းဢၼ်ပႃးတင်းဝီႉၺိၺ်ႇဢၼ်မူတ်းၸၢင်ႇၸဝ်ႈ ဢၼ်မၼ်းၸဝ်ႈပွႆႇၸႂ်ႉဢွၵ်ႇသေၵႃႈတီႈ မိူင်းၵၢင်ႁၢဝ်ပုၼ်ႉမႃးလႄႈ ႁေႃးလၢတ်ႈတြႃးသတၢင်းသိူဝ်းပျေႃႇတီႈသူၼၼ်ႉ မွၵ်ႇလၢတ်ႈတီႈသူၼႂ်းၶိင်ႇတေႃႈလဵဝ်ၼႆႉၼၼ်ႉ ပုၼ်ႈသူဢမ်ႇၸႂ်ႈ။ ပွင်ႁဵတ်းသူၼၼ်ႉဝႆႉဢေႃႈ။ လွင်ႈတၢင်းၸိူဝ်းၼၼ်ႉၸိုင် တမၢၼ်ႇၵၢင်ႁၢဝ်တင်းလၢႆ မီးၸႂ်ၸေႇတၼႃႇ ဢၼ်ၶႂ်ႈလူတူၺ်းႁူႉၸႅင်ႈဢေႃႈ။

13ပိူဝ်ႈၼႆလႄႈ ႁတ်ႉသၢႆဢႅဝ် ၵႃႈတီႈႁူဝ်ၸႂ်သူသေလႄႈ မီးသမ်ႇမႃႇသတီႉယူႇတႃႉ။ မုင်ႈထႃႈမွင်းထႃႈသူႉၵျေးၸူးၸဝ်ႈ ဢၼ်တၵ်းႁွတ်ႈၽႅဝ်တီႈသူ မိူဝ်ႈဢၼ် ယေႇသူႉၶရိၸ်ႈ တၵ်းပေႃႇမႃးၼၼ်ႉ တေႃႇထိုင်ႁွတ်ႈတီႈသုတ်းတီႈၵွႆပုၼ်ႉတႃႉ။-

14တေႃႈလဵဝ်ၼႆႉ သူယင်းဢမ်ႇၸွမ်းဢမ်ႇၵျၢင်ႉတြႃး တၢင်းဢၼ်ၸွႆးဢၼ်ၸပ်းဢၼ်သူလႆႈၵမ်ၵျၢင်ႉ ၵႃႈၼႂ်းလပ်းသိင်ႇမိူဝ်ႈဢွၼ်ၼႆႉၼၼ်ႉသေလႄႈ၊ ပဵၼ်ၸိူဝ်ႉၼင်ႇလုၵ်ႈဢွၼ်ႇဢၼ်ၸၢင်ႈထွမ်ႇဢဝ်ၼၼ်ႉလႄႈ၊-

15မီးတၢင်းဢၼ်မူတ်းၸၢင်ႇယူႇၼႂ်းၵႃႈဢၼ် ၵမ်ၵျၢင်ႉသၢင်ႈႁဵတ်း တင်းသဵင်ႈတင်းလူင်ၸိူဝ်ႉၼင်ႇဢၼ် ၸဝ်ႈဢၼ်ႁွင်ႉဢဝ်သူၼၼ်ႉ မူတ်းၸၢင်ႇၼၼ်ႉတႃႉ။-

16လွင်ႈမၼ်းၸမ်ႉ ၵျၢမ်းလိၵ်ႈမႃးလႄႈဝႃႈ၊ ၵွပ်ႈပိူဝ်ႈဢၼ်ၵဝ်မူတ်းၸၢင်ႇလႄႈ သူၵေႃႈမီးတၢင်းဢၼ်မူတ်းၸၢင်ႇတႃႉ၊ ဝႃႈၼင်ႇၼႆဢေႃႈ။

17ပေႃးသူႁွင်ႉမၼ်းၸဝ်ႈ ဢၼ်ဢမ်ႇထွၵ်ႈလူၺ်ႈၼႃႈၵူၼ်းလႄႈ ၸီႇယၢင်ႇၸွမ်းၼင်ႇ တၢင်းၵမ်တၢင်းၵျၢင်ႉ ၵူၼ်းတင်းသဵင်ႈတင်းလူင်ၼၼ်ႉလႄႈဝႃႈ၊ ၸဝ်ႈပေႃႈ၊ ဝႃႈၼင်ႇၼႆၸိုင်၊ မီးတင်းၸႂ်ဢၼ်ၵူဝ်ႁႄသေလႄႈ ၵမ်ၵျၢင်ႉယူႇၼႂ်းၶိင်ႇၸူဝ်ႈဢၼ် ယင်းတိုၵ်ႉပဵၼ်ၶႅၵ်ႇယူႇၼႆႉတႃႉ။-

18မၢတ်ႈတွင်းလွင်ႈဢၼ် မၼ်းၸဝ်ႈဢဝ်တင်းငိုၼ်းတင်းၶမ်း ၵႃႈပဵၼ်ဢုၵ်ႉၸႃႇဢၼ်ၸၢင်ႈလူႉ ၸၢင်ႈလႅဝ် ထုတ်ႇဢဝ်သူၵႃႈၼႂ်းတၢင်းဢၼ် ၵမ်ၵျၢင်ႉသၢင်ႈႁဵတ်းလၢႆလၢႆ ဢမ်ႇပွင်ႇလွင်ႈ၊ ဢၼ်သိုပ်ႇလူင်းမႃးၵႃႈတီႈပူႇမွၼ်ႇသူၼၼ်ႉဢမ်ႇၸႂ်ႈ။-

19မၼ်းၸဝ်ႈဢဝ်တင်းလိူတ်ႈမျၢတ်ႈၸဝ်ႈၶရိၸ်ႈ ဢၼ်ပဵၼ်ၸိူဝ်ႉၼင်ႇသူဝ်းဢွၼ်ႇ ဢၼ်ဢမ်ႇမီးဢပႅတ်ႈၵႃႈသင်လႃးလႃးလႄႈ ၵၢင်းလွတ်ႈတင်းတၢင်းဢၼ်ၵူဝ်ႈဢၼ်ၵိူၵ်ႇၼၼ်ႉ ထုတ်ႇဢဝ်ၼၼ်ႉဝႆႉတႃႉ။-

20ၸဝ်ႈၶရိၸ်ႈၼၼ်ႉၸမ်ႉ၊ လႆႈၶၢမ်ႇတၢင်းဢၼ်ၶၢၼ်းဝႆႉ ၸႃႉၸဵမ်မိူဝ်ႈၸူဝ်ႈဢၼ်ၵမ်ႇၽႃႇၼႆႉ ဢမ်ႇပႆႇတႄႇဢမ်ႇပႆႇမီးၼၼ်ႉလႄႈ တေႃႈလဵဝ်ၼႆႉၵေႃႈ၊ ထၢင်ႇသႃးပုၼ်ႈသူ ၸိူဝ်းဢၼ်ယုမ်ႇမၢတ်ႈၽြႃးပဵၼ်ၸဝ်ႈ ၵွပ်ႈပိူဝ်ႈမၼ်းၸဝ်ႈ ၼႂ်းၶိင်ႇၵႃႇလႃႉလိုၼ်းလင်သုတ်း မိူဝ်ႈလဵဝ်ၼႆႉယဝ်ႉယဝ်ႉ။-

21ၽြႃးပဵၼ်ၸဝ်ႈ ႁႂ်ႈၸဝ်ႈၼၼ်ႉလုၵ်ႉၵႃႈတၢင်းတၢႆၶိုၼ်းလိပ်းလႄႈ ဢဵတ်းလူပၼ်မုၼ်သရေႇ ႁႂ်ႈသူလႆႈထွၵ်ႈလူၺ်ႈၽြႃးပဵၼ်ၸဝ်ႈသေလႄႈ မီးတၢင်းဢၼ်ယုမ်ႇမၢတ်ႈ ဢိၵ်ႇတင်းတၢင်းဢၼ်မုင်ႈထႃႈမွင်းထႃႈၼၼ်ႉယဝ်ႉယဝ်ႉ။

22ၵွပ်ႈပိူဝ်ႈဢၼ်သူ သမ်ႉၶိုၼ်းၵိူတ်ႇပဵၼ်မႃးလူၺ်ႈၸိူဝ်ႉၽၼ်းဢၼ် ၸၢင်ႈလူႉၸၢင်ႈလဵဝ်ၼၼ်ႉဢမ်ႇၸႂ်ႈ၊-

23ၵွပ်ႈပိူဝ်ႈဢၼ်သူသမ်ႉၶိုၼ်းၵိူတ်ႇပဵၼ်မႃးလူၺ်ႈၸိူဝ်ႉၽၼ်းဢၼ် ဢမ်ႇၸၢင်ႈလူႉၸၢင်ႈလႅဝ်ဢၼ်ဝႃႈ ၼုၵ်ႈၵပၢတ်ႈၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းလႄႈ တႄႇယူႇသေႇသေႇၼၼ်ႉလႄႈ မႅၼ်ႈၼင်ႇဢၼ်သူလႆႈထွမ်ႇဢဝ်သမ်ႇမႃႇတြႃး ၵႃႈၼႂ်းၸႂ်သူယူႇသေလႄႈ ႁႂ်ႈႁူဝ်ၸႂ်သူမူတ်းသႂ် ႁႂ်ႈလႆႈႁဵတ်းၸိူဝ်ႉၼင်ႇႁၢင်ႈႁၵ်ႉပႅင်းဢမ်ႇၸႂ်ႈ၊ ႁႂ်ႈလႆႈႁၵ်ႉပႅင်းဢမၢၼ်ႇၶၼ်ပဵၼ်ၼၼ်ႉ ဢဝ်တင်းၸႂ်ဢၼ်ၶၢဝ်သႂ်လႄႈ ၼင်ႇၵၼ်ၵၼ်မီးတၢင်းႁၵ်ႉမႅတ်ႈတႃႇ ဢၼ်ႁႅင်းယႂ်ႇၼႃႇတီႈၵၼ်တႃႉ။-

24လွင်ႈမၼ်းၸမ်ႉ မဵဝ်းၵူၼ်းၵႃႈမီးတင်းသဵင်ႈတင်းလူင် ပဵၼ်ၸိူဝ်ႉၼင်ႇတူၼ်ႈယိူဝ်ႈတူၼ်ႈယႃႈၼၼ်ႉဢေႃႈ။ မုၼ်ၽုင်းၵူၼ်းၵႃႈမီးတင်းသဵင်ႈတင်းလူင်ၵေႃႈ ပဵၼ်ၸိူဝ်ႉၼင်ႇမွၵ်ႇယိူဝ်ႈမွၵ်ႇယႃႈၼၼ်ႉဢေႃႈ။ တူၼ်ႈယိူဝ်ႈတူၼ်ႈယႃႈၼၼ်ႉ ၸၢင်ႈႁဵဝ်ႇၸွပ်ႈႁႅင်ႈၵႂႃႇဢေႃႈ။ မွၵ်ႇမၼ်းၵေႃႈၸၢင်ႈလူၼ်ႇၵႂႃႇႁူင်ႈၵႂႃႇဢေႃႈ။-

25ၼုၵ်ႈၵပၢတ်ႈတြႃးထႃႇဝရႃႉၽြႃးၸမ်ႉ၊ တႄႇယူႇသေႇသေႇဢေႃႈ။ ၼုၵ်ႈၵပၢတ်ႈတြႃးၼၼ်ႉ ပဵၼ်တြႃးသတၢင်းသိူဝ်းပျေႃႇ ဢၼ်ႁေႃးလၢတ်ႈတီႈသူၼၼ်ႉဢေႃႈ။

Jump to: Chapter 2 →