1 Peter 3

Shan

← Chapter 2 Jump to: Chapter 4 →

1ၵႃႈၼင်ႇဢၼ်ဝႃႈမႃးယဝ်ႉဢွၼ်တၢင်းၼၼ်ႉ ၽူႈယိင်းၶဝ်ဢိူၺ်း၊ ဢွၼ်ၵၼ်ႁပ်ႉတုင်းဢဝ် တၢင်းဢၼ်ၽူဝ်သူဢုပ်ႉပိူင်ႇတႃႉ။-

2သူႁဵတ်းၸိူဝ်ႉၼင်ႇၼၼ်လႄႈ ပေႃးမီးၽူႈၸၢႆးဢၼ်ဢမ်ႇထွမ်ႇဢမ်ႇဢဝ် ၼုၵ်ႈၵပၢတ်ႈတြႃးၸဝ်ႈၼၼ်ႉ ၵမ်ႈၽွင်ႈၸိုင်၊ ပိၵ်ႉသမ်ႉၶဝ်ၼၼ်ႉ ဢမ်ႇထွမ်ႇဢမ်ႇဢဝ်တြႃးၸဝ်ႈသေၵေႃႈ၊ မိူဝ်ႈဢၼ်ၶဝ်တူၺ်းလူတၢင်းၵမ်တၢင်းၵျၢင်ႉသူ ဢၼ်ၸိုၼ်ႈၸၢင်ႇၶၢဝ်သႂ်ႇ ဢိၵ်ႇတင်းတၢင်းဢၼ်သူၵူဝ်ႁႄၼၼ်ႉၸိုင်၊ ၵွပ်ႈပိူဝ်ႈၼုၵ်ႈၵပၢတ်ႈၸဝ်ႈဢမ်ႇၸႂ်ႈလႄႈ တၵ်းမီးလွင်ႈဢၼ်တၵ်းၸူဝ်းဢဝ်လႄႈ ပႃးလူၺ်ႈၵၼ်ၵွပ်ႈပိူဝ်ႈတၢင်းၵမ်တၢင်းၵျၢင်ႉမေးတူဝ်ၸဝ်ႈၵဝ်ႇၼၼ်ႉဢေႃႈ။-

3တၢင်းဢၼ်သူႁၢင်ႈၶိူင်ႈၸမ်ႉ၊ ယင်းဢမ်ႇႁႂ်ႈပဵၼ်တၢင်းဢၼ်ၽၼ်ႈဢၼ်ၽိူဝ်ၶူၼ်ႁူဝ်၊ တၢင်းဢၼ်တိုဝ်းၶိူင်ႈၶမ်း၊ တၢင်းဢၼ်ၼုင်ႈၶူဝ်းၼုင်ႈလဵင်းဢၼ်ဝႃႈ တၢင်းဢၼ်ႁၢင်ႈၶိူင်ႈၵႃႈၼွၵ်ႈလႄႈ၊-

4ႁႂ်ႈပဵၼ်ႁူဝ်ၸႂ်ၵူၼ်းၵႃႈၼႂ်း ဢၼ်မီးတၢင်းဢၼ်ႁၢင်ႈၶိူင်ႈဢၼ်ဢမ်ႇလူႉလႅဝ်ၽွၵ်ႈပျၢၼ်ႇၶိုၼ်းဢၼ်ဝႃႈ သၽေႃးဢၼ်ၼိမ်သိမ်ႇဢူၼ်ႈဢွၼ်ႇ ဢၼ်ထိူၵ်ႈၵႃႈထိူၵ်ႈၶၼ်ယႂ်ႇၼႃႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉတႃႉ။-

5မိူဝ်ႈဢွၼ်ၼႆႉၼၼ်ႉ ၽူႈယိင်းဢၼ်မူတ်းၸၢင်ႇလႄႈဢိင်ပိုင်ႈၽြႃးပဵၼ်ၸဝ်ႈၸိူဝ်းၼၼ်ႉ ႁၢင်ႈၶိူင်ႈတူဝ်ၸဝ်ႈၵဝ်ႇၸိူဝ်ႉၼင်ႇၼၼ်ယူႇသေလႄႈ ႁပ်ႉတုင်းဢဝ်တၢင်းဢၼ်ၽူဝ်တူဝ်ၸဝ်ႈၵဝ်ႇဢုပ်ႉပိူင်ႇ၊-

6မိူၼ်ၸိူဝ်ႉၼင်ႇဢၼ် ၸႃႇရႃႇ ႁွင်ႉ ဢႃႇပြႃႇႁၢမ်ႇ လႄႈဝႃႈ၊ ၸဝ်ႈ၊ ဝႃႈၼင်ႇၼႆၼၼ်ႉလႄႈ ထွမ်ႇဢဝ်ၵႂၢမ်းမၼ်းၼၼ်ႉဢေႃႈ။ ပေႃးသူၵမ်ၵျၢင်ႉလီလီငၢမ်းငၢမ်းလႄႈ ယင်းဢမ်ႇၵူဝ်ဢမ်ႇသၼ်ႇယူႇသေဢိတ်းၸိုင် သူပဵၼ်လုၵ်ႈယိင်း ၸႃႇရႃႇ ၼၼ်ႉဢေႃႈ။

7မိူၼ်ၸိူဝ်ႉၼင်ႇၼၼ်၊ ၽူႈၸၢႆးၶဝ်ဢိူၺ်း၊ လွင်ႈၼင်ႇႁိုဝ်သူတၵ်းဢမ်ႇမီးလွင်ႈ တၢင်းဢၼ်ႁႄႉဢၼ်ၶႅၼ် ၼႂ်းတၢင်းဢၼ်သူသူးတွင်း ႁဵတ်းပထၼႃႇၼၼ်ႉၸိုင် မီးတင်းသတီႉပိင်ႇၺႃႇယူႇလူၺ်ႈၵၼ်တင်း မေးတူဝ်ၸဝ်ႈၵဝ်ႇလႄႈ ၸွႆႈထႅမ်လူတူၺ်းမၼ်းၸွမ်းၵႃႈၼင်ႇဢၼ် ထုၵ်ႇလီႁဵတ်းတီႈၵေႃႉဢၼ်ႁႅင်းလဵၵ်ႉႁႅင်းၵေႇၼၼ်ႉ၊ မိူၼ်ၸိူဝ်ႉၼင်ႇၶဝ်ၸိူဝ်းဢၼ် သိူၵ်ႈသမ်ႇၵၼ်တင်းၵျေးၸူးၸဝ်ႈ တၢင်းဢၼ်ဢသၢၵ်ႈလိပ်းလႄႈ လႆႈၶၢမ်ႇဢမူၺ်ႇၼင်ႇၵၼ်ၵၼ်ၼၼ်ႉတႃႉ။

8ၵႂၢမ်းဢၼ်ႁူမ်ႇလူမ်ႈၸမ်ႉ၊ သူၵႃႈမီးတင်းသဵင်ႈတင်းလူင် မီးႁူဝ်ၸႂ်ဢၼ်လဵဝ်ၵၼ်တႃႉ။ မီးတၢင်းဢၼ်ၸၢင်ႈမႆႈၸႂ်လူၺ်ႈပိူၼ်ႈ တၢင်းဢၼ်ၸၢင်ႈႁၵ်ႉပႅင်းပီႈၼွင်ႉၵၼ်၊ တၢင်းဢၼ်ၸၢင်ႈဢဵတ်းလူၸူမ်းပႅင်း၊ တၢင်းဢၼ်ႁူဝ်ၸႂ်ၸၢင်ႈၶျႃးတႅမ်ႇၼၼ်ႉတႃႉ။-

9မၢတ်ႈတွင်းလွင်ႈဢၼ်သူပဵၼ်ၵေႃႉဢၼ် မၼ်းၸဝ်ႈႁွင်ႉႁႂ်ႈလႆႈၶၢမ်ႇဢဝ်ဢမူၺ်ႇတၢင်းလီမင်ႇၵလႃႇၼၼ်ႉဝႆႉသေလႄႈ ယင်းဢမ်ႇၶိုၼ်းတွပ်ႇတၢင်းၽိတ်း၊ ယင်းဢမ်ႇၶိုၼ်းသႄႉသွမ်းလႄႈ ႁဵတ်းတၢင်းဢၼ်သူင်ႇပၼ်မႅတ်ႈတႃႇၵူၺ်းတႃႉ။

10ၵေႃႉဢၼ်မီးဢလူဝ်ႇၶႂ်ႈႁၵ်ႉပႅင်းဢသၢၵ်ႈလႄႈ ထူပ်းႁၼ်ဝၼ်းဢၼ်လီဢၼ်ငၢမ်းၼမ်ၼႃႇၼၼ်ႉၸမ်ႉ၊ ႁႂ်ႈလိၼ်ႉတူဝ်ၸဝ်ႈၵဝ်ႇ ၵၢင်းလွတ်ႈတင်းလွင်ႈတၢင်းဢၼ်ဢမ်ႇလီဢမ်ႇငၢမ်းတႃႉ။ သူပ်းတူဝ်ၸဝ်ႈၵဝ်ႇၵေႃႈ ယႃႇပေႁႂ်ႈလၢတ်ႈၵႂၢမ်းမူႉသႃႇ။-

11ႁႂ်ႈဝႄႈပႅတ်ႈတူႉၸရိူၵ်ႈလႄႈ ႁဵတ်းသူႉၸရိူၵ်ႈတႃႉ။ ႁႂ်ႈႁႃတၢင်းဢၼ်ယူႇထုၵ်ႇထုၵ်ႇၵၼ်တင်းပိူၼ်ႈတၢင်ႇၵေႃႉလႄႈ ၸွမ်းႁႂ်ႈၶိုတ်းတႃႉ။-

12လွင်ႈမၼ်းၸမ်ႉ မၢၵ်ႇတႃထႃႇဝရႃႉၽြႃးလူတူၺ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉယူႇဢေႃႈ။ တၢင်းဢၼ်ၶဝ်ႁဵတ်းသူးတွင်းပထၼႃႇၵေႃႈ ႁူမၼ်းၸဝ်ႈထွမ်ႇဢဝ်ယူႇဢေႃႈ။ တီႈၶဝ်ၸိူဝ်းဢၼ်ႁဵတ်းတူႉၸရိူၵ်ႈၼၼ်ႉၸမ်ႉ၊ ထႃႇဝရႃႉၽြႃးဝၢႆႇၼႃႈပႅတ်ႈဢေႃႈ။-

13ပေႃးသူပဵၼ်ၵေႃႉဢၼ်ၵမ်ၵျၢင်ႉလွင်ႈတၢင်းဢၼ်လီဢၼ်ငၢမ်းယူႇၸိုင်၊ ၽူႈလႂ်တၵ်းၼိၵ်ႈၸၢၵ်ႈငႅၼ်းသႄးသူ။

14ပေႃးသူလႆႈၶၢမ်ႇတၢင်းၽၢၼ် ၵွပ်ႈပိူဝ်ႈတြႃးတၢင်းဢၼ်သိုဝ်ႈတေႃႇၸိုင်၊ သူမီးမင်ႇၵလႃႇဢေႃႈ။ လွင်ႈတၢင်းဢၼ်ၶဝ်ၸၢင်ႈၵူဝ်ၸၢင်ႈႁႄၼၼ်ႉၸိုင် ယႃႇပေၵူဝ်ပေႁႄ။ ယႃႇပေတူၵ်းၸႂ်။-

15ၵႃႈၼႂ်းႁူဝ်ၸႂ်သူမီးတၢင်းဢၼ်ရူဝ်ႇသေႇၵူဝ်ယမ် ၸဝ်ႈၶရိၸ်ႈဢၼ်ပဵၼ်ထႃႇဝရႃႉၽြႃးၼၼ်ႉတႃႉ။ လွင်ႈၼင်ႇႁိုဝ်တၵ်းမီးတင်းသၽေႃးဢၼ်ဢူၼ်ႈဢွၼ်ႇ ဢိၵ်ႇတင်းသၽေႃးဢၼ်ၵူဝ်ႁႄသေလႄႈ ၶိုၼ်းလၢတ်ႈတီႈၶဝ်ၵႃႈဢၼ်တွင်ႈထၢမ်လွင်ႈတၢင်းဢၼ် သူမုင်ႈထႃႈမွင်းထႃႈယူႇၼၼ်ႉၸိုင်၊ မႄးႁႅၼ်းမီးဝႆႉယူႇၶိင်ႇၵႃႇလႃႉတႃႇသေႇဢမ်ႇထၢတ်ႇတႃႉ။-

16လွင်ႈၼင်ႇႁိုဝ်ၶဝ်ၸိူဝ်းဢၼ်ယႃႉသရေႇ တၢင်းၵမ်တၢင်းၵျၢင်ႉဢၼ်သူၵမ်ၵျၢင်ႉ ၼႂ်းၸဝ်ႈၶရိၸ်ႈၼၼ်ႉၼၼ်ႉ တၵ်းမီးတၢင်းဢၼ်လီဢူၵ်းလီဢၢႆၼႂ်းမိူဝ်ႈဢၼ် ၶဝ်သႄႉသွမ်းတၢင်ႇဢပႅတ်ႈယူႇၼၼ်ႉၸိုင်၊ သူမီးၸႂ်ဢၼ်ႁူႉတူဝ်ၸဝ်ႈၵဝ်ႇ ဢၼ်မူတ်းသႂ်လႄႈယူႇတႃႉ။-

17ပေႃးၽြႃးပဵၼ်ၸဝ်ႈမီးဢလူဝ်ႇၸိုင် တၢင်းဢၼ်ႁဵတ်းသူႉၸရိူၵ်ႈလႄႈ လႆႈၶၢမ်ႇတၢင်းၽၢၼ်ၼၼ်ႉ လီၼႃႇသေတၢင်းဢၼ်ႁဵတ်းတူႉၸရိူၵ်ႈဢေႃႈ။-

18ၵွပ်ႈပိူဝ်ႈဢၼ်ၸဝ်ႈၶရိၸ်ႈ ၶၢမ်ႇတၢင်းဢၼ်ဢဝ်တၢႆၵႃႈၼႂ်းတူဝ်ၶၼ်ႇထႃႇသေလႄႈ ႁွတ်ႈထိုင်တၢင်းဢၼ်ဢသၢၵ်ႈလိပ်း ၵွပ်ႈပိူဝ်ႈ ဝီႉၺိၺ်ႇၸဝ်ႈၼၼ်ႉလႄႈ၊ ၵေႃႉဢၼ်သိုဝ်ႈတေႃႇၼၼ်ႉလႆႈၶၢမ်ႇ ပုၼ်ႈၶဝ်ၸိူဝ်းဢၼ်ဢမ်ႇသိုဝ်ႈတေႃႇၼၼ်ႉ ၵွပ်ႈပိူဝ်ႈတူႉၸရိူၵ်ႈဢပႅတ်ႈတင်းလၢႆ ပွၵ်ႈလဵဝ်ၵူၺ်း ႁႂ်ႈလႆႈဢဝ်ႁဝ်းသူင်ႇထိုင်ႁွတ်ႈ ၵႃႈတီႈၽြႃးပဵၼ်ၸဝ်ႈဢေႃႈ။-

19ၵွပ်ႈပိူဝ်ႈဝီႉၺိၺ်ႇၸဝ်ႈၼၼ်ႉၵေႃႈ မၼ်းၸဝ်ႈၵႂႃႇလႄႈႁေႃးလၢတ်ႈတြႃး ၵႃႈတီႈဝီႉၺိၺ်ႇဢၼ်ၶင်ဝႆႉၼႂ်းထွင်ႇတင်းလၢႆ၊-

20ဢၼ်ပိၵ်ႉသမ်ႉၽြႃးပဵၼ်ၸဝ်ႈၶၼ်ႇထီႇယိူၼ်ႉထႃႈ ၼႂ်းၸူဝ်ႈၼႂ်းပၢၼ် ၼူဝ်းဢႃႇ ၼႂ်းမိူဝ်ႈဢၼ်မၼ်းယင်းတိုၵ်ႉ မႄးႁဵတ်းႁိူဝ်းသၢင်းၽေႃးဢၼ်ဢဝ်တင်းၼမ်ႉ ၵႄႇၶျွတ်ႈဢဝ်ၵူၼ်းၵေႇၵေႇဢၼ်ဝႃႈ ၵူၼ်းပႅတ်ႇၵေႃႉၼၼ်ႉသေၵေႃႈ၊ ပဵၼ်ဝီႉၺိၺ်ႇဢၼ်ဢမ်ႇထွမ်ႇဢမ်ႇဢဝ် ၼႂ်းၶိင်ႇၵႃႇလႃႉမိူဝ်ႈဢွၼ်ၼႆႉၼၼ်ႉဢေႃႈ။-

21ၸွမ်းၼင်ႇဢူႉပမႃႇၼၼ်ႉလႄႈ၊ ၼႂ်းၶိင်ႇတေႃႈလဵဝ်ၼႆႉ ပပ်ႉတီႉၸမ်ႇ ၸိုင်ၸၢင်ႈၵႄႇၶျွတ်ႈဢဝ်ႁဝ်း ၵွပ်ႈပိူဝ်ႈတၢင်းဢၼ် ယေႇသူႉၶရိၸ်ႈ လုၵ်ႉၶိုၼ်းၼၼ်ႉဢေႃႈ။ ဢၼ်ဝႃႈ ပပ်ႉတီႉၸမ်ႇ ၼၼ်ႉၸမ်ႉ၊ ဢမ်ႇၶႂ်ႈဝႃႈတၢင်းဢၼ်သုၵ်ႈပွတ်ႈတၢင်းဢၼ်ၵူဝ်ႈၵိူၵ်ႇတူဝ်ၵႃႇယႃႉ။ ၶႂ်ႈဝႃႈတၢင်းဢၼ်ၸႂ်ဢၼ်ႁူႉ တူဝ်ၸဝ်ႈၵဝ်ႇမူတ်းသႂ်သေလႄႈ ႁပ်ႉတုင်းဢဝ်ၵႃႈတီႈၽၢႆႇၼႃႈ ၽြႃးပဵၼ်ၸဝ်ႈၼၼ်ႉဢေႃႈ။-

22ၸဝ်ႈၼၼ်ႉ ပိူဝ်ႈဢၼ်ၶိုၼ်ႈၵႂႃႇၵႃႈၼိူဝ် မိူင်းၵၢင်ႁၢဝ်လႄႈ ဢုပ်ႉပိူင်ႇတမၢၼ်ႇၵၢင်ႁၢဝ် ဢိၵ်ႇတင်းဢႃႇၼႃႇၸၢၵ်ႈ တင်းတၼ်းၶူဝ်းတင်းလၢႆသေလႄႈ ၼင်ႈယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈဢေႃႈ။

← Chapter 2 Jump to: Chapter 4 →