1 Peter 4

Shan

← Chapter 3 Jump to: Chapter 5 →

1ၵွပ်ႈပိူဝ်ႈဢၼ်ၸဝ်ႈၶရိၸ်ႈၶၢမ်ႇၼႂ်း တူဝ်ၶၼ်ႇထႃႇၸိူဝ်ႉၼင်ႇၼၼ် ပုၼ်ႈႁဝ်းဢမၢၼ်ႇၶၼ်ပဵၼ်လႄႈ သူၵေႃႈဢဝ်သၽေႃးၸိူဝ်ႉၼင်ႇၼၼ် ႁဵတ်းလၢၵ်ႈၼၢၵ်ႈသေလႄႈသုင်းသွင်ႇတႃႉ။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၵေႃႉဢၼ်လႆႈၶၢမ်ႇ တီႈတူဝ်ၶၼ်ႇထႃႇၼၼ်ႉ လႆႈၵၢင်းလွတ်ႈထၢတ်ႇယဵၼ်တင်းတူႉၸရိူၵ်ႈလႄႈ၊-

2ၵမ်းလိုၼ်းသူယင်းဢမ်ႇၵမ်ဢမ်ႇၵျၢင်ႉၸွမ်းၼင်ႇ တြႃးၸႃႇတီႉပၵတီႉ တၢင်းဢၼ်ၵူၼ်းတင်းလၢႆ ၸွႆးၸပ်းၼၼ်ႉလႄႈ ၵမ်ၵျၢင်ႉၸွမ်းၼင်ႇ ဢလူဝ်ႇၽြႃးပဵၼ်ၸဝ်ႈယူႇသေလႄႈ ၸၢင်ႈႁႂ်ႈၶိင်ႇၵႃႇလႃႉ ဢသၢၵ်ႈဢၼ်ယင်းၵိုတ်းယင်းၵျၢၼ်ႇၼၼ်ႉ ပူၼ်ႉၵႂႃႇယူႇဢေႃႈ။-

3ၶိင်ႇၵႃႇလႃႉဢသၢၵ်ႈႁဝ်း ဢၼ်ႁဝ်းၸွမ်းၼင်ႇဢလူဝ်ႇၵူၼ်းသႃႇသၼႃႇပႃႉတင်းလၢႆသေလႄႈ ၵမ်ၵျၢင်ႉၵီႉလေႇသႃႇ တၢင်းဢၼ်ၵူဝ်ႈဢၼ်ၵိူၵ်ႇ၊ တၢင်းဢၼ်ၸွႆးဢၼ်ၸပ်းၵႃႇမႃႉ၊ တၢင်းဢၼ်မဝ်းလဝ်ႈမဝ်းၵမ် လူၺ်ႈၼမ်ႉၸပိတ်ႈ၊ တၢင်းဢၼ်ႁဵတ်းပွႆးႁဵတ်းလၢမ်း၊ တၢင်းဢၼ် ၵိၼ်ပူၼ်ႉၵိၼ်လိူဝ်၊ တၢင်းဢၼ်ၵူဝ်းၵႂၢႆႇရုၵ်ႈထူႉသၢင်းထူႉ ဢၼ်လီႁင်ႈၸိူဝ်းၼၼ်ႉလႄႈ ပူၼ်ႉမႃးယဝ်ႉၼၼ်ႉ ပေႃးၵုမ်ႇပုၼ်ႈႁဝ်းယဝ်ႉ ဢေႃႈ။-

4တေႃႈလဵဝ်ၼႆႉ ၶဝ်ၼၼ်ႉၸၢင်ႈဢၢမ်းလွင်ႈဢၼ်သူ ဢမ်ႇသိူၵ်ႈသမ်ႇလူၺ်ႈၵၼ်တင်းၶဝ်လႄႈ ဢမ်ႇႁဵတ်းတၢင်းဢၼ်ပူၼ်ႉလိူဝ်ၵူဝ်ႈၵိူၵ်ႇ ၵႃႈၼႂ်းၵႃႇမၵုင်ႇၼၼ်ႉၼႃႇလူင်လၢင်လႄႈ သႄႉသွမ်းယူႇဢေႃႈ။-

5ပိူဝ်ႈၼႆလႄႈ ၶဝ်ၼၼ်ႉတၵ်းလႆႈၶၢမ်ႇ တၢင်းဢၼ်ၸႅတ်ႈဢၼ်ထၢမ် ၵႃႈတီႈၽၢႆႇၼႃႈၸဝ်ႈဢၼ်မႄးႁႅၼ်းဝႆႉ ႁႂ်ႈလႆႈၸီႇယၢင်ႇတြႃးတီႈၶဝ်ၸိူဝ်းဢၼ်ဢသၢၵ်ႈလိပ်း ဢိၵ်ႇတင်းၶဝ်ၸိူဝ်းဢၼ်တၢႆၼၼ်ႉဢေႃႈ။-

6ၵွပ်ႈပိူဝ်ႈလွင်ႈတၢင်းၼႆႉလႄႈ လႆႈႁေႃးလၢတ်ႈတြႃးသတၢင်းသိူဝ်းပျေႃႇ တီႈၶဝ်ၸိူဝ်းဢၼ်တၢႆၼၼ်ႉ ႁႂ်ႈၶဝ်လႆႈၶၢမ်ႇ တၢင်းဢၼ်ၸီႇယၢင်ႇဢပႅတ်ႈ လူၺ်ႈတူဝ်ၶၼ်ႇထႃႇ ၵႃႈတီႈၽၢႆႇၼႃႈၵူၼ်းတင်းလၢႆသေၵေႃႈ၊ ႁႂ်ႈၶဝ်ဢသၢၵ်ႈလႆႈလိပ်းလူၺ်ႈ ၸႂ်ဝီႉၺိၺ်ႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။

7လွင်ႈတၢင်းၵႃႈမီးတင်းသဵင်ႈတင်းလူင် ၸမ်တၵ်းႁွတ်ႈထိုင် တီႈသုတ်းတီႈၵွႆဢေႃႈ။ ပိူဝ်ႈၼႆလႄႈ ဢွၼ်ၵၼ်မီးသမ်ႇမႃႇသတီႉတႃႉ။ ဢွၼ်ၵၼ်ပႂ်ႉယူႇႁႂ်ႈလႆႈသူးတွင်းတႃႉ။-

8ၵေႃႉၼိုင်ႈလႄႈၵေႃႉၼိုင်ႈ မီးတၢင်းႁၵ်ႉမႅတ်ႈတႃႇ ဢၼ်ယႂ်ႇၼႃႇတီႈၵၼ် လိူဝ်တွၼ်းသေလွင်ႈတၢင်း တၢင်ႇၸိူဝ်ႉတၢင်ႇဢၼ်တႃႉ။ တၢင်းႁၵ်ႉမႅတ်ႈတႃႇၸၢင်ႈႁူမ်ႇဝႆႉဢပႅတ်ႈၼမ်ၼႃႇဢေႃႈ။-

9ယင်းဢမ်ႇမီးတၢင်းဢၼ်ပွင်ႉဢၼ်ဝႃႈလႄႈ ၼင်ႇၵၼ်ၵၼ်ႁဵတ်းၶႅၵ်ႇတီႈၵၼ်တႃႉ။-

10ၵႃႈၼင်ႇဢၼ်သူလႆႈၶၢမ်ႇဢဝ်သူႉၵျေးၸူးၸဝ်ႈႁင်းၽႂ်ႁင်းမၼ်းၼၼ်ႉ ၵေႃႉၼိုင်ႈလႄႈၵေႃႉၼိုင်ႈယိုၼ်ႈမႅင်ႇပၼ်ၵၼ် မိူၼ်ၸိူဝ်ႉၼင်ႇၽၼ်ႇတႃႇၸူဝ်းလီ ၵျေးၸူးၽြႃးပဵၼ်ၸဝ်ႈဢၼ်မီးလၢႆၸိူဝ်ႉလၢႆပိူင်ၼၼ်ႉတႃႉ။-

11လွင်ႈၼင်ႇႁိုဝ်ၽြႃးပဵၼ်ၸဝ်ႈ တၵ်းႁႂ်ႈမုၼ်ၽုင်းၸဝ်ႈထၢင်ႇသႃး ၵႃႈၼႂ်းလွင်ႈတၢင်းၵူႈၸိူဝ်ႉၵူႈပိူင် ၵွပ်ႈပိူဝ်ႈ ယေႇသူႉၶရိၸ်ႈ ၸိုင်၊ ႁႂ်ႈၵေႃႉဢၼ်ႁေႃးလၢတ်ႈၼၼ်ႉ ႁေႃးလၢတ်ႈမႅၼ်ႈၸွမ်းၼင်ႇ ပျႃႇတိၵ်ႈၽြႃးပဵၼ်ၸဝ်ႈတႃႉ။ ႁႂ်ႈၵေႃႉဢၼ်ပွင်ႁဵတ်းဢမူႉ တၢင်ႇၸိူဝ်ႉတၢင်ႇပိူင်ၼၼ်ႉ ပွင်ႁဵတ်းၵႃႈၼင်ႇတၢင်းႁူႉတၢင်းၸၢင်ႈ ဢၼ်ၽြႃးပဵၼ်ၸဝ်ႈ ဢဵတ်းလူပၼ်ၼၼ်ႉတႃႉ။ ႁႂ်ႈၽြႃးပဵၼ်ၸဝ်ႈၼၼ်ႉမီးမုၼ်သရေႇ တၼ်းၶူဝ်းၵူႈၵမ်ႇၽႃႇသိုပ်ႇသိုပ်ႇတၢမ်းတၢမ်း သေၵမ်းလူၺ်ႈ။ ဢႃႇမိၼ်ႇ။

12ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ယႃႇပေထၢင်ႇတၢင်းဢၼ် ၽႆးၸႅတ်ႈထၢမ်ဢၼ်သူလႆႈၶၢမ်ႇ ပုၼ်ႈဢၼ်တၵ်းၸၢမ်းတူၺ်းသူၼၼ်ႉ ပဵၼ်လွင်ႈဢၼ်လီဢၢမ်းၼႃႇလႄႈ မီးတၢင်းဢၼ်ဢၢမ်းၼႃႇလူင်လၢင်။-

13ၵွပ်ႈပိူဝ်ႈဢၼ်သူသိူၵ်ႈသမ်ႇၵၼ်တင်း တၢင်းၽၢၼ်ၸဝ်ႈၶရိၸ်ႈလႄႈ တေႃႈလဵဝ်ၼႆႉဢွၼ်ၵၼ်သိူဝ်းပျေႃႇ ႁႂ်ႈလႆႈသိူဝ်းပျေႃႇၸူမ်းၼႃႇၼႂ်းမိူဝ်ႈဢၼ်မုၼ်မၼ်းၸဝ်ႈ တၵ်းပေႃႇမႃးၼၼ်ႉတႃႉ။-

14ပေႃးသူလႆႈၶၢမ်ႇတၢင်းဢၼ်သႄႉသွမ်း ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈၶရိၸ်ႈၸိုင် သူမီးမင်ႇၵလႃႇဢေႃႈ။ လွင်ႈမၼ်းၸမ်ႉ ဝီႉၺိၺ်ႇၽြႃးပဵၼ်ၸဝ်ႈ ဢၼ်မုၼ်ၽုင်းယႂ်ႇၼႃႇၼၼ်ႉ ၵိင်းဝၢပ်ႈယူႇၵႃႈၼိူဝ်သူဢေႃႈ။ တီႈၶဝ်ၸမ်ႉ၊ မၼ်းၸဝ်ႈမီးတၢင်းဢၼ်သႄႉသွမ်းဢေႃႈ။ တီႈသူၸမ်ႉ၊ မၼ်းၸဝ်ႈမီးတၢင်းဢၼ်ယွင်ႈယေႃးဢေႃႈ။

15ၼႂ်းသူၼၼ်ႉယႃႇႁႂ်ႈၽူႈလႂ်သေၵေႃႉသေၵူၼ်းမီးဢပႅတ်ႈ ဢၼ်ဢဝ်ဢသၢၵ်ႈၵူၼ်းတၢႆ၊ ဢပႅတ်ႈဢၼ်လၵ်ႉၶူဝ်းပိူၼ်ႈ၊ ဢပႅတ်ႈဢၼ်ႁဵတ်းတူႉၸရိူၵ်ႈ၊ ဢပႅတ်ႈဢၼ်လေႃးလႄးၼႂ်းဢမူႉပိူၼ်ႈ ၸိူဝ်းၼၼ်ႉသေလႄႈၶၢမ်ႇ။-

16ပေႃးလႆႈၶၢမ်ႇၵွပ်ႈပိူဝ်ႈဢၼ်ပဵၼ် ၶရိၸ်ႈယၢၼ်ႇ ၸိုင်၊ ယႃႇႁႂ်ႈမီးတၢင်းဢၼ် လီဢူၵ်းလီဢၢႆ။ ပေႃးလႆႈၶၢမ်ႇၵွပ်ႈပိူဝ်ႈဢမူႉၼၼ်ႉၸိုင်၊ ႁႂ်ႈယွင်ႈယေႃးမုၼ်ၽြႃးပဵၼ်ၸဝ်ႈတႃႉ။-

17ၶိင်ႇဢၼ်တၵ်းလႆႈၸႃႉၸႅတ်ႈ ထၢမ်ၸီႇယၢင်ႇၵူၼ်းႁိူၼ်းၵူၼ်းယေးၽြႃးပဵၼ်ၸဝ်ႈၼၼ်ႉမီးဝႆႉယဝ်ႉ။ ပေႃးၸႅတ်ႈထၢမ်ၸီႇယၢင်ႇႁဝ်းဢွၼ်တၢင်းၸိုင် ဢမူႉၶဝ်ၸိူဝ်းဢၼ်ဢမ်ႇထွမ်ႇဢဝ် တြႃးသတၢင်းသိူဝ်းပျေႃႇၽြႃးပဵၼ်ၸဝ်ႈၼၼ်ႉ တၵ်းယဝ်ႉတၵ်းတူဝ်ႈၸိူဝ်ႉၼင်ႇႁိုဝ်။-

18ပေႃးၵေႃႉဢၼ်သိုဝ်ႈတေႃႇၼၼ်ႉ ႁွတ်ႈထိုင်ၵႃႈတီႈတၢင်းဢၼ်ၵႄႇၶျွတ်ႈဢဝ်ၼၼ်ႉ ယၢပ်ႇၼႃႇၸိုင်၊ ၵေႃႉဢၼ်ဢမ်ႇၵူဝ်းၵႂၢႆႇၽြႃးပဵၼ်ၸဝ်ႈ၊ ၵေႃႉဢၼ်ဢပႅတ်ႈထၢင်ႇသႃးၼၼ်ႉ တၵ်းပေႃႇမႃးၵႃႈတီႈလႂ်။

19ပိူဝ်ႈၼႆလႄႈ ႁႂ်ႈၶဝ်ၸိူဝ်းဢၼ်လႆႈၶၢမ်ႇ တၢင်းၽၢၼ်ၸွမ်းၼင်ႇဢလူဝ်ႇၽြႃးပဵၼ်ၸဝ်ႈၼၼ်ႉ မၢတ်ႈၽြႃးပဵၼ်ၸဝ်ႈပဵၼ်ၸိူဝ်ႉၼင်ႇၸဝ်ႈဢသၢၵ်ႈ ဢၼ်မီးသဵတ်ႈၸႃႇၼၼ်ႉယူႇသေလႄႈ ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်လီဢၼ်ငၢမ်းလႄႈ ဢဝ်ဝီႉၺိၺ်ႇဢသၢၵ်ႈတူဝ်ၸဝ်ႈၵဝ်ႇ ဢၢပ်ႈပၼ်တီႈမၼ်းၸဝ်ႈတႃႉ။

← Chapter 3 Jump to: Chapter 5 →