1 Thessalonians 2

Shan

← Chapter 1 Jump to: Chapter 3 →

1ပီႈၼွင်ႉၶဝ်ဢိူၺ်း၊ တူဝ်သူႁူႉလွင်ႈဢၼ်ႁဝ်းၶဝ်ႈၵႃႈၼႂ်းသူၼၼ်ႉ ဢမ်ႇပဵၼ်ဢၼ်လၢႆလၢႆလွၵ်ႇလွၵ်ႇၼၼ်ႉယူႇဢေႃႈ။-

2ႁဝ်းၶၢမ်ႇတၢင်းၽၢၼ်ဢိၵ်ႇတင်းတၢင်းဢၼ်ၼိၵ်ႈၸၢၵ်ႈငႅၼ်းသႄး ၵႃႈၼႂ်းဝဵင်း ၽီႉလိပ်ႉပီႉ ၵႃႈၼင်ႇဢၼ်သူႁူႉၼၼ်ႉယဝ်ႉၸင်ႇ ဢိင်ပိုင်ႈၽြႃးပဵၼ်ၸဝ်ႈသေလႄႈ မီးတင်းတၢင်းဢၼ်လႆႈတိုၵ်းလႆႈတေႃးၼမ်ၼႃႇလူင်လၢင် ႁေႃးလၢတ်ႈတြႃးသတၢင်းသိူဝ်းပျေႃႇၽြႃးပဵၼ်ၸဝ်ႈ တီႈသူႁတ်းႁတ်းႁၢၼ်ႁၢၼ်ဢေႃႈ။-

3ႁဝ်းဢဝ်တင်းတၢင်းဢၼ်ၽိတ်းပိူင်ႈ၊ တၢင်းဢၼ်ၵူဝ်ႈၵိူၵ်ႇ၊ တၢင်းဢၼ်ပႅတ်ႉလႅၼ်သေလႄႈ တိုၵ်းယူင်းၸူဝ်းဢဝ်သူဢမ်ႇၸႂ်ႈ။-

4မႅၼ်ႈၼင်ႇဢၼ်ၽြႃးပဵၼ်ၸဝ်ႈႁပ်ႉတုင်းဢဝ် လွင်ႈဢၼ်ႁဝ်းပဵၼ်ၵေႃႉဢၼ်ထိူၵ်ႈပႂ်ႉတြႃးသတၢင်းသိူဝ်းပျေႃႇၼၼ်ႉ၊ ႁဝ်းႁေႃးလၢတ်ႈၸွမ်းၼင်ႇ ဢၼ်ထုၵ်ႇၸႂ်ၵူၼ်းဢမ်ႇၸႂ်ႈ။ ႁဝ်းႁေႃးလၢတ်ႈၸွမ်းၼင်ႇဢၼ် ထုၵ်ႇၸႂ်ၽြႃးပဵၼ်ၸဝ်ႈ ဢၼ်ၸႅတ်ႈထၢမ် ၸၢမ်းတူၺ်း ႁူဝ်ၸႂ်ႁဝ်းၼၼ်ႉဢေႃႈ။-

5ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၵႃႈၼင်ႇဢၼ်သူႁူႉယူႇၼၼ်ႉ၊ လွင်ႈဢၼ်ႁဝ်းဢမ်ႇသုင်းဢမ်ႇသွင်ႇ ၵႂၢမ်းဢၼ်ၸၢင်ႈၶျေႃးၸၢင်ႈဝွၼ်းၼၼ်ႉသေပွၵ်ႈ၊ ဢမ်ႇမီးၸႂ်လေႃးၽႃႉဢၼ်သိူင်ႇဝႆႉမႅပ်ႉဝႆႉၼၼ်ႉသေဢိတ်းၼၼ်ႉၸိုင်၊ ၽြႃးပဵၼ်ၸဝ်ႈပဵၼ်သၢၵ်ႈသေႇႁဝ်း ယူႇဢေႃႈ။-

6လိူဝ်သေၼၼ်ႉ၊ ပိၵ်ႉသမ်ႉႁဝ်းပဵၼ်တမၢၼ်ႇၸဝ်ႈၶရိၸ်ႈလႄႈ ပိူင်ႇတၢင်းဢၼ်ဢဝ် ၶူဝ်းႁၢပ်ႇဢၼ်ၼၵ်းၼႃႇၼၼ်ႉ တၢင်ႇသႂ်ႇ ပၼ်သေၵေႃႈ၊ ႁဝ်းဢမ်ႇႁႃမုၼ်သရေႇ ဢၼ်ၵူၼ်းပၼ်ၼၼ်ႉၵႃႈၼႂ်းသူ။ ၼႂ်းၵူၼ်းတၢင်ႇတီႈတၢင်ႇလႅၼ်ၵေႃႈႁဝ်းဢမ်ႇႁႃ။-

7ႁဝ်းႁဵတ်းၼိမ်ၼိမ်လွႆးလွႆးတီႈသူမိူၼ်ၸိူဝ်ႉၼင်ႇဢၼ်မႄႈၸဝ်ႈၼူမ်းလုမ်းလႃးလဵင်ႉလူလုၵ်ႈဢွၼ်ႇ တူဝ်ၸဝ်ႈၵဝ်ႇၼၼ်ႉဢေႃႈ။-

8ၼင်ႇၼႆလႄႈ၊ ၵွပ်ႈပိူဝ်ႈဢၼ်ႁဝ်းႁၵ်ႉသူၼႃႇလူင်လၢင်ၼၼ်ႉလႄႈ၊ ႁဝ်းပႃးတင်းတၢင်းဢၼ်သေလၢႆႁၵ်ႉပႅင်းသူယူႇသေလႄႈ မီးၸႂ်ၸေႇတၼႃႇ ဢၼ်ၶႂ်ႈမႅင်ႇၶႂ်ႈပၼ်တြႃးသတၢင်းသိူဝ်းပျေႃႇၽြႃးပဵၼ်ၸဝ်ႈၵူၺ်းဢမ်ႇၵႃး၊ ဢသၢၵ်ႈတူဝ်ၸဝ်ႈၵဝ်ႇၵေႃႈ ၶႂ်ႈမႅင်ႇၶႂ်ႈပၼ် ဢေႃႈ။-

9ပီႈၼွင်ႉၶဝ်ဢိူၺ်း၊ သူမၢတ်ႈတွင်းဝႆႉလွင်ႈဢၼ်ႁဝ်းသၢင်ႈႁဵတ်းယၢပ်ႇၼႃႇလူင်လၢင်လႄႈ လႆႈဢဝ်ႁႅင်းၵႆႉၵျူဝ်းၸႃးၼၼ်ႉယူႇဢေႃႈ။ လွင်ႈၼင်ႇႁိုဝ်ႁဝ်းတၵ်းဢမ်ႇလႆႈယႃႉယူၵ်ႉသေၵေႃႉသေၵူၼ်း ၵႃႈၼႂ်းသူၸိုင်၊ ႁဝ်းသၢင်ႈႁဵတ်းယူႇၵူႈဝၼ်းၵူႈၶိုၼ်းလႄႈ ႁေႃးလၢတ်ႈတြႃးသတၢင်းသိူဝ်းပျေႃႇၽြႃးပဵၼ်ၸဝ်ႈတီႈသူဢေႃႈ။

10သူပဵၼ်သၢၵ်ႈသေႇလွင်ႈဢၼ်ႁဝ်းမူတ်းၸၢင်ႇ၊ သိုဝ်ႈတေႃႇ၊ ၵၢင်းလွတ်ႈတင်းဢၶႂၢင်ႉ တီႈဢၼ်တၢင်ႇဢပႅတ်ႈၸိူဝ်ႉၼင်ႇႁိုဝ် သေလႄႈ ယူႇၵႃႈၼႂ်းသူၸိူဝ်းဢၼ်ႁွတ်ႈထိုင်တၢင်းဢၼ်ယုမ်ႇမၢတ်ႈၼၼ်ႉ၊-

11မႅၼ်ႈၼင်ႇဢၼ်သူႁူႉလွင်ႈဢၼ်ႁဝ်းတိုၵ်းယူင်းၸူဝ်းဢဝ်လႄႈ သင်ႇလၢတ်ႈဝႆႉတီႈသူ ၵႃႈမီးတင်းသဵင်ႈတင်းလူင်ၼၼ်ႉယူႇ သေလႄႈ ႁဵတ်းမိူၼ်ၸိူဝ်ႉၼင်ႇဢၼ် ပေႃႈႁဵတ်းတီႈလုၵ်ႈလၢင်းမၼ်းၼၼ်ႉၸိူဝ်ႉၼင်ႇႁိုဝ်ၼၼ်ႉ၊-

12ႁႂ်ႈသူလႆႈၵမ်ၵျၢင်ႉဢၼ်ထိူၵ်ႈတၢၼ်ႇၵၼ်တင်းၽြႃးပဵၼ်ၸဝ်ႈ ဢၼ်ႁွင်ႉဢဝ်သူ သႂၢင်းသႂ်ႇၵႃႈၼႂ်းမိူင်းၸဝ်ႈ ဢိၵ်ႇတင်းမုၼ်ၸဝ်ႈၼၼ်ႉဢေႃႈ။ ၽြႃးပဵၼ်ၸဝ်ႈၵေႃႈပဵၼ်သၢၵ်ႈသေႇဢေႃႈ။

13ႁဝ်းထွၵ်ႈလူၺ်ႈလွင်ႈဢၼ် ၼႂ်းမိူဝ်ႈဢၼ်သူၶၢမ်ႇဢဝ်ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ ဢၼ်ႁဝ်းႁေႃးလၢတ်ႈၼၼ်ႉ၊ သူယင်းဢမ်ႇၶၢမ်ႇဢဝ် ၵႂၢမ်းဢၼ်ဢွၵ်ႇၵႃႈတီႈသူပ်းၵူၼ်းလႄႈ မိူၼ်ၸိူဝ်ႉၼင်ႇဢၼ်ပဵၼ်ၼုၵ်ႈၵပၢတ်ႈတြႃးဢၼ်မၢၼ်ႇဢၼ်မႅၼ်ႈၼၼ်ႉ၊ သူၶၢမ်ႇဢဝ်ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ ဢၼ်ပွင်ႁဵတ်းၵႃႈၼႂ်းသူၸိူဝ်းဢၼ်ႁွတ်ႈထိုင်တၢင်းဢၼ်ယုမ်ႇမၢတ်ႈၼၼ်ႉသေလႄႈ ယွင်ႈယေႃးၵျေးၸူးၸဝ်ႈယူႇတႃႇသေႇဢမ်ႇထၢတ်ႇဢေႃႈ။-

14ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ပီႈၼွင်ႉၶဝ်ဢိူၺ်း၊ သူပဵၼ်ၵေႃႉဢၼ်ပဵၼ်ၸိူဝ်ႉၼင်ႇၵူၼ်းၶဝ်ႈၸိူဝ်းၸဝ်ႈၽြႃးပဵၼ်ၸဝ်ႈတင်းလၢႆ ဢၼ်ၶၢမ်ႇဢဝ်ၽႃႇသႃႇ ယေႇသူႉၶရိၸ်ႈ ၼႂ်းမိူင်း ယူႉတႃႉ ၼၼ်ႉဢေႃႈ။ လွင်ႈမၼ်းၸမ်ႉ ၸိူဝ်ႉၼင်ႇဢၼ်ၸိူဝ်ႉၶိူဝ်းသူ လႆႈၶၢမ်ႇတၢင်းၽၢၼ် ၼႂ်းမိုဝ်းၵူၼ်း ယူႉတႃႉ တင်းလၢႆၼၼ်ႉ၊ သူလႆႈၶၢမ်ႇမိူၼ်ၸိူဝ်ႉၼင်ႇၼၼ် ၼႂ်းမိုဝ်းၸိူဝ်ႉၶိူဝ်းတူဝ်ၸဝ်ႈၵဝ်ႇဢေႃႈ။-

15ၵူၼ်း ယူႉတႃႉ ၸိူဝ်းၼၼ်ႉ ဢဝ်ၸႃႉၸဵမ်ၸဝ်ႈ ယေႇသူႉ ဢိၵ်ႇတင်းပရေႃးၽႅတ်ႈတင်းလၢႆတၢႆယဝ်ႉ။ ႁဝ်းၵေႃႈၶဝ်ၼိၵ်ႈၸၢၵ်ႈငႅၼ်းသႄးႁေႃႈဢွၵ်ႇပႅတ်ႈယဝ်ႉ။ ၶဝ်ဢမ်ႇၸွမ်းၼင်ႇဢလူဝ်ႇၽြႃးပဵၼ်ၸဝ်ႈ၊ ပဵၼ်ဢၼ်ၶတ်းၵၼ်တင်းၵူၼ်းတင်းသဵင်ႈတင်းလူင်ဢေႃႈ။-

16ၶဝ်ႁႄႉၶႅၼ်လွင်ႈတၢင်းဢၼ်ႁဝ်းႁေႃးလၢတ်ႈ ႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ လႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉလႄႈ ႁႂ်ႈဢပႅတ်ႈတူဝ်ၸဝ်ႈၵဝ်ႇ ပျေႉၸုမ်ႇယူႇသေႇသေႇဢေႃႈ။ တၢင်းၸႂ်မႆႈၶႆႈၸႃႉမၼ်းၸဝ်ႈလႆႈႁွတ်ႈထိုင်ၵႃႈၼိူဝ်ၶဝ်ၼၼ်ႉ သဵင်ႈသဵင်ႈ မူတ်းမူတ်းဢေႃႈ။

17ပီႈၼွင်ႉၶဝ်ဢိူၺ်း၊ မိူဝ်ႈဢၼ်ႁူဝ်ၸႂ်ႁဝ်းလႆႈၽၢတ်ႇယၢၼ်ၵၼ်တင်းသူဢမ်ႇၸႂ်ႈ၊ တူဝ်ၵႃႇယႃႉႁဝ်းၵူၺ်းၽၢတ်ႇယၢၼ်ၵၼ်တင်းသူ ၵမ်းဢွၼ်ႇၼိုင်ႈယဝ်ႉၼၼ်ႉၸိုင်၊ ႁဝ်းမီးတင်းတၢင်းဢၼ်ၸႂ်ထိုင်ၼႃႇလူင်လၢင်လႄႈ ယဵင်ႈၶႅၼ်းၵႆႉၵျူဝ်းၸႃး ႁႂ်ႈလႆႈႁၼ်ၼႃႈသူယူႇဢေႃႈ။-

18ပိူဝ်ႈၼႆလႄႈ ပိၵ်ႉသမ်ႉၵဝ် ပေႃးလူႉ မီးဢလူဝ်ႇၶႂ်ႈမႃးၸူးတီႈသူထၼ်ႈပေႃး ထူၼ်ႈထိုင်သွင်ပွၵ်ႈသေၵေႃႈ၊ ၸႃႇတၢၼ်ႇ ႁႄႉၶႅၼ်ႁဝ်းယူႇဢေႃႈ။-

19လွင်ႈတၢင်းဢၼ်ႁဝ်းမုင်ႈထႃႈမွင်းထႃႈ၊ လွင်ႈတၢင်းဢၼ်ႁဝ်းသိူဝ်းပျေႃႇ၊ သရၽူႇပၢၼ်းၵုမ်း တၢင်းဢၼ်ႁဝ်းဢုပ်ႇဝၢဝ်းၸိူဝ်းၼၼ်ႉၸမ်ႉ၊ ပဵၼ်လွင်ႈတၢင်းၸိူဝ်ႉၼင်ႇႁိုဝ်။ သူပဵၼ်လွင်ႈတၢင်းၸိူဝ်ႉၼင်ႇၼၼ် ၵႃႈတီႈၽၢႆႇၼႃႈၸဝ်ႈႁဝ်း ယေႇသူႉၶရိၸ်ႈ ၼႂ်းမိူဝ်ႈဢၼ်မၼ်းၸဝ်ႈတၵ်းမႃးၼၼ်ႉဢမ်ႇၸႂ်ႈႁိုဝ်။-

20သူပဵၼ်မုၼ်သရေႇႁဝ်းဢိၵ်ႇတင်း လွင်ႈတၢင်းဢၼ်ႁဝ်းသိူဝ်းပျေႃႇဢေႃႈ။

← Chapter 1 Jump to: Chapter 3 →