1 Thessalonians 3

Shan

← Chapter 2 Jump to: Chapter 4 →

1ပိူဝ်ႈၼႆလႄႈ မိူဝ်ႈဢၼ်ႁဝ်းဢမ်ႇယိူၼ်ႉထႅင်ႈလႆႈၼၼ်ႉ၊ ႁဝ်းမီးဢလူဝ်ႇၶႂ်ႈၵိုတ်းယူႇၵႃႈၼႂ်းဝဵင်း ဢႃႇထိၼ်ႇ ၵေႃႉလဵဝ်ၵူၺ်းသေလႄႈ၊-

2ပွႆႇၸႂ်ႉ တီႉမေႃးသေႇ ဢၼ်ပဵၼ်ၼွင်ႉႁဝ်းဢၼ်ပဵၼ်ၵေႃႉဢၼ် သၢင်ႈႁဵတ်းဢမူႉၽြႃးပဵၼ်ၸဝ်ႈလႄႈ ႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၶရိၸ်ႈၼၼ်ႉ ၵႂႃႇၸူးတီႈသူ ႁႂ်ႈသူမၼ်ႈၶိူင်ႇလႄႈ တိုၵ်းယူင်းၸူဝ်းဢဝ်သူၼႂ်းလွင်ႈတၢင်းဢၼ်ယုမ်ႇမၢတ်ႈ ၼၼ်ႉ၊-

3ႁႂ်ႈၽူႈလႂ်ဢမ်ႇလႆႈသုတ်ႉလႆႈယွမ်းၵႂႃႇ ၵွပ်ႈပိူဝ်ႈတုၵ်ႉၶႃႉတၢင်းၽၢၼ်ဢၼ်လႆႈၶၢမ်ႇၼႆႉၼၼ်ႉဢေႃႈ။ လွင်ႈမၼ်းၸမ်ႉ တူဝ်သူႁူႉလွင်ႈဢၼ် မၼ်းၸဝ်ႈၶၢၼ်းႁဝ်းဝႆႉႁႂ်ႈလႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉယူႇဢေႃႈ။-

4ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ႁဝ်းတၵ်းလႆႈၶၢမ်ႇတုၵ်ႉၶႃႉတၢင်းၽၢၼ်ဝႃႈၼႆ ႁဝ်းလၢတ်ႈဝႆႉၼႂ်းမိူဝ်ႈဢၼ်ႁဝ်းမီးယူႇလူၺ်ႈၵၼ်တင်းသူၼၼ်ႉယဝ်ႉ။ သူႁူႉလွင်ႈဢၼ်ပဵၼ်မႃးၵႃႈၼင်ႇဢၼ်လၢတ်ႈဝႆႉၼၼ်ႉယူႇဢေႃႈ။-

5ၵဝ်ၵူဝ်ၵေႃႉဢၼ် ၸၢင်ႈၸၢမ်းတူၺ်းၸူဝ်းဢဝ်ၼၼ်ႉ တၵ်းၸၢမ်းတူၺ်းၸူဝ်းဢဝ်သူလႄႈ လွင်ႈတၢင်းဢၼ်ႁဝ်း သၢင်ႈႁဵတ်း ယၢပ်ႇၼႃႇၼၼ်ႉ တၵ်းပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၵႂႃႇလႄႈ မိူဝ်ႈဢၼ်ၵဝ်ဢမ်ႇယိူၼ်ႉထႅင်ႈလႆႈၼၼ်ႉၸိုင်၊ ၵဝ်ပွႆႇၸႂ်ႉၵႂႃႇႁႂ်ႈလႆႈႁူႉလွင်ႈတၢင်းဢၼ်သူယုမ်ႇမၢတ်ႈၼၼ်ႉဢေႃႈ။

6တေႃႈမိူဝ်ႈလဵဝ်ၼႆႉ၊ မိူဝ်ႈဢၼ် တီႉမေႃးသေႇ လုၵ်ႉသေၵႃႈတီႈသူၶိုၼ်းမႃးလႄႈမွၵ်ႇလၢတ်ႈ သတၢင်းသိူဝ်းပျေႃႇလူၺ်ႈလွင်ႈတၢင်းယုမ်ႇမၢတ်ႈတင်း တၢင်းႁၵ်ႉသူဢိၵ်ႇတင်းလူၺ်ႈလွင်ႈဢၼ်သူ ၶုၵ်းၸႂ်လႆႈၶႆႈၸႂ်ထူပ်းႁဝ်းယူႇလီလီငၢမ်းငၢမ်းတႃႇသေႇဢမ်ႇထၢတ်ႇလႄႈ ၸႂ်ထိုင်ႁဝ်းၸိူဝ်ႉၼင်ႇဢၼ် ႁဝ်းၸႂ်ထိုင်သူၼၼ်ႉ။-

7ပီႈၼွင်ႉၶဝ်ဢိူၺ်း၊ ၼႂ်းလွင်ႈဢၼ်ႁဝ်းလႆႈယၢၵ်ႈလႆႈၽၢၼ်လႄႈၶၢမ်ႇတၢင်းဢၼ်ယၢပ်ႇၽိုတ်ႇၼႃႇၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉ၊ ႁဝ်းလႆႈႁွတ်ႈထိုင်တၢင်းဢၼ် သၢၵ်ႈသႃႇမႃးၵွပ်ႈပိူဝ်ႈတၢင်းယုမ်ႇမၢတ်ႈသူၼၼ်ႉဢေႃႈ။-

8တေႃႈလဵဝ်ၼႆႉ ပေႃးသူတႄႇယူႇၼႂ်းၸဝ်ႈၽြႃးၸိုင်၊ ႁဝ်းဢသၢၵ်ႈလိပ်းယူႇဢေႃႈ။-

9ႁဝ်းထွၵ်ႈလူၺ်ႈတၢင်းဢၼ်သိူဝ်းပျေႃႇတင်းသဵင်ႈတင်းလူင် ဢၼ်ႁဝ်းလႆႈၶၢမ်ႇဢဝ်ၵွပ်ႈပိူဝ်ႈ လွင်ႈသူၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉလႄႈ တၵ်းတႅၼ်းပၼ်ၵျေးၸူးၽြႃးပဵၼ်ၸဝ်ႈ ၵွပ်ႈပိူဝ်ႈလွင်ႈသူၼၼ်ႉလႆႈၸိူဝ်ႉၼင်ႇႁိုဝ်။-

10လွင်ႈၼင်ႇႁိုဝ် တၵ်းႁၼ်ၼႃႈသူလႄႈ ႁႂ်ႈၵႃႈဢၼ်တၢင်းယုမ်ႇမၢတ်ႈသူလူဝ်ႇထႅင်ႈၼၼ်ႉလႆႈၸေးၸုမ်ႇၸိုင်၊ ႁဝ်းႁဵတ်းသူးတွင်းပထၼႃႇ ၵူႈဝၼ်းၵူႈၶိုၼ်းတႃႇသေႇဢမ်ႇထၢတ်ႇလႄႈယူႇဢေႃႈ။

11ႁႂ်ႈၽြႃးပဵၼ်ၸဝ်ႈဢၼ်ဝႃႈ ပေႃႈႁဝ်းဢိၵ်ႇတင်းၸဝ်ႈႁဝ်း ယေႇသူႉၶရိၸ်ႈ မႄးသဵၼ်ႈတၢင်းဢၼ်ႁဝ်းတၵ်းၵႂႃႇၸူး ၵႃႈတီႈသူၼၼ်ႉဝႆႉသေၵမ်းလူၺ်ႈ။-

12ႁႂ်ႈၸဝ်ႈၽြႃးႁႂ်ႈသူလိူင်ႇၸႂ်ပျေႉၸုမ်ႇၼမ်ၵိုၼ်း ၵႃႈၼႂ်းတၢင်းႁၵ်ႉမႅတ်ႈတႃႇ တီႈၵေႃႉၼိုင်ႈလႄႈၵေႃႉၼိုင်ႈ ဢိၵ်ႇတင်း တီႈပိူၼ်ႈ တင်းသဵင်ႈတင်းလူင်ၸိူဝ်ႉၼင်ႇဢၼ်ႁဝ်းႁၵ်ႉသူၼၼ်ႉ၊-

13ပုၼ်ႈလွင်ႈၼင်ႇႁိုဝ်မၼ်းၸဝ်ႈတၵ်းႁႂ်ႈႁူဝ်ၸႂ်သူၸိူဝ်းဢၼ်ၵၢင်းလွတ်ႈတင်း တီႈဢၼ်တၢင်ႇဢပႅတ်ႈၼၼ်ႉလႆႈမၼ်ႈၶိူင်ႇၼႂ်းပႃႇရမီႇ တၢင်းဢၼ်မူတ်းၸၢင်ႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဢၼ်ဝႃႈပေႃႈႁဝ်း ၼႂ်းမိူဝ်ႈဢၼ်ၸဝ်ႈ ယေႇသူႉ တၵ်းမႃးလူၺ်ႈၵၼ်တင်း ၵူၼ်းမူတ်းၸၢင်ႇတူဝ်ၸဝ်ႈၵဝ်ႇ တင်းသဵင်ႈတင်းလူင်ၼၼ်ႉ သေၵမ်းလူၺ်ႈ။

← Chapter 2 Jump to: Chapter 4 →