2 Thessalonians 1

Shan

Jump to: Chapter 2 →

1ပေႃးလူႉ၊ သီႉလႂႃႇၼူႉ၊ တီႉမေႃးသေႇ ၸိူဝ်းၼႆႉပၼ်ငိၼ်းၵႂႃႇတီႈၸိူဝ်းၸဝ်ႈ ၵူၼ်းဝဵင်း ထိတ်ႉသႃႇလေႃးၼိၵ်ႈ ဢၼ်တႄႇယူႇၼႂ်းၽြႃးပဵၼ်ၸဝ်ႈဢၼ်ဝႃႈ ၸဝ်ႈပေႃႈႁဝ်း ဢိၵ်ႇတင်းၸဝ်ႈ ယေႇသူႉၶရိၸ်ႈ ၼၼ်ႉၶႃႈဢေႃႈ။-

2ႁႂ်ႈသူႉၵျေးၸူးဢိၵ်ႇတင်းတၢင်းၼိမ် ဢၼ်ပဵၼ်မႃးၵႃႈတီႈၽြႃးပေႃႈၸဝ်ႈတင်းၸဝ်ႈ ယေႇသူႉၶရိၸ်ႈ ၼၼ်ႉ မီးၼိူဝ်သူသေၵမ်း လူၺ်ႈ။

3ပီႈၼွင်ႉၶဝ်ဢိူၺ်း၊ ၵွပ်ႈပိူဝ်ႈဢၼ်တၢင်းယုမ်ႇမၢတ်ႈသူ ယႂ်ႇမႃးလႄႈၵူၼ်းၵူႈၵေႃႉႁင်းၽႂ်ႁင်းမၼ်း ပျေႉၸုမ်ႇတင်းမႅတ်ႈတႃႇ တၢင်းဢၼ် ၼင်ႇၵၼ်ၵၼ်ႁၵ်ႉၵၼ်ၼၼ်ႉလႄႈ ၵႃႈၼင်ႇဢၼ်ထုၵ်ႇလီႁဵတ်းၼၼ်ႉ၊ ႁဝ်းယွင်ႈယေႃးၵျေးၸူးၽြႃးပဵၼ်ၸဝ်ႈ ၵွပ်ႈပိူဝ်ႈသူယူႇတႃႇသေႇဢမ်ႇထၢတ်ႇဢေႃႈ။-

4ပိူဝ်ႈၼႆလႄႈ ႁဝ်းထွၵ်ႈလူၺ်ႈလွင်ႈဢၼ်သူမီးတၢင်းဢၼ်ယိူၼ်ႉၶၢမ်ႇဢိၵ်ႇတင်း တၢင်းဢၼ်ယုမ်ႇမၢတ်ႈၼႂ်းလွင်ႈတၢင်းဢၼ်သူလႆႈၶၢမ်ႇ တၢင်းဢၼ်ၼိၵ်ႈၸၢၵ်ႈငႅၼ်းသႄး တုၵ်ႉၶႃႉတၢင်းၽၢၼ် ၵႃႈမီးတင်းသဵင်ႈတင်းလူင်ၼၼ်ႉလႄႈ ဢုပ်ႇဝၢဝ်းၵွပ်ႈပိူဝ်ႈသူ ၼႂ်းၸိူဝ်းၸဝ်ႈၽြႃးပဵၼ်ၸဝ်ႈတင်းလၢႆဢေႃႈ။-

5လွင်ႈၼင်ႇႁိုဝ်သူတၵ်းလႆႈၶၢမ်ႇတၢင်းဢၼ် မၼ်းၸဝ်ႈမၢတ်ႈပဵၼ်ၵေႃႉဢၼ်လႆႈၶၢမ်ႇ တၢင်းၽၢၼ်ပုၼ်ႈမိူင်းၽြႃးပဵၼ်ၸဝ်ႈလႄႈ ထိူၵ်ႈၸၢမ်ႇၸႃးမိူင်းၸဝ်ႈၼၼ်ႉၸိုင်၊ လွင်ႈတၢင်းဢၼ်ၽြႃးပဵၼ်ၸဝ်ႈ ၸီႇယၢင်ႇၸွမ်းၼင်ႇတြႃးၼၼ်ႉ ထၢင်ႇသႃးယူႇၵွပ်ႈပိူဝ်ႈၸိူဝ်ႉၼင်ႇၼၼ်ဢေႃႈ။-

6ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၽြႃးပဵၼ်ၸဝ်ႈတၵ်းၸီႇယၢင်ႇၸွမ်းၼင်ႇတြႃးလႄႈ တႅၼ်းပၼ်တုၵ်ႉၶႃႉတၢင်းၽၢၼ်တီႈၶဝ်ၸိူဝ်းဢၼ် ႁႂ်ႈသူလႆႈၶၢမ်ႇ တုၵ်ႉၶႃႉတၢင်းၽၢၼ်ၼၼ်ႉ၊-

7ဢိၵ်ႇတင်းတၢင်းဢၼ်ၵတ်းယဵၼ်ၶျၢမ်းသႃႇ လူၺ်ႈၵၼ်တင်းႁဝ်း တီႈသူၸိူဝ်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၼႆႉ ၼႂ်းမိူဝ်ႈဢၼ်ၸဝ်ႈ ယေႇသူႉၶရိၸ်ႈ ပႃးတင်းတမၢၼ်ႇၵၢင်ႁၢဝ် ဢၼ်မီးတၼ်းၶူဝ်းၸိူဝ်းၼၼ်ႉ ပေႃႇမႃးၵႃႈၼိူဝ်ၽုင်ႇၵၢင်ႁၢဝ် ၼႂ်းၽႆးလုၵ်ႉလႄႈ၊-

8ပၼ်တၢမ်ႇတီႈၶဝ်ၸိူဝ်းဢၼ်ဢမ်ႇႁူႉၽြႃးပဵၼ်ၸဝ်ႈ တင်းၶဝ်ၸိူဝ်းဢၼ်ဢမ်ႇထွမ်ႇဢဝ်တြႃးသတၢင်းသိူဝ်းပျေႃႇၸဝ်ႈႁဝ်း ယေႇသူႉၶရိၸ်ႈ ၼၼ်ႉလႄႈ၊-

9ၶဝ်တၵ်းလႆႈၽၢတ်ႇယၢၼ်ၵၼ်တင်းၼႃႈၸဝ်ႈၽြႃး ဢိၵ်ႇတင်းမုၼ်ၽုင်းၸဝ်ႈဢၼ်မီးတၼ်းၶူဝ်းၼၼ်ႉသေလႄႈ ၶၢမ်ႇတၢမ်ႇဢပႅတ်ႈဢၼ်ဝႃႈ တၢင်းလူႉတၢင်းလႅဝ်ထႃႇဝရႃႉ၊-

10ၼႂ်းမိုဝ်ႉဝၼ်းဢၼ်မၼ်းၸဝ်ႈမႃးႁႂ်ႈလႆႈၶၢမ်ႇတၢင်းဢၼ် မုၼ်သရေႇၸဝ်ႈထၢင်ႇသႃး ၵႃႈၼႂ်းၵူၼ်းမူတ်းၸၢင်ႇမၼ်းၸဝ်ႈတင်းလၢႆ ဢိၵ်ႇတင်းတၢင်းဢၼ်ဢမ်ႇဢွၼ်ယွင်ႈယေႃး ၼႂ်းၶဝ်ၸိူဝ်းဢၼ်ယုမ်ႇမၢတ်ႈ ၵွပ်ႈပိူဝ်ႈဢၼ်သူယုမ်ႇမၢတ်ႈသၢၵ်ႈသေႇႁဝ်းၼႆႉ တင်းသဵင်ႈတင်းလူင်ၼၼ်ႉဢေႃႈ။

11ပိူဝ်ႈၼႆလႄႈ လွင်ႈၼင်ႇႁိုဝ်ၽြႃးပဵၼ်ၸဝ်ႈႁဝ်း တၵ်းမၢတ်ႈသူပဵၼ်ၵေႃႉဢၼ် ထိူၵ်ႈၶၢမ်ႇဢဝ်ၵျေးၸူးတၢင်းဢၼ်မၼ်းၸဝ်ႈ ႁွင်ႉဢဝ်ၼၼ်ႉလႄႈ ႁႂ်ႈၸေႇတၼႃႇတၢင်းဢၼ်မျၢတ်ႈလီ တင်းသဵင်ႈတင်းလူင် ဢိၵ်ႇတင်းဢမူႉတၢင်းဢၼ်ယုမ်ႇမၢတ်ႈသူၼၼ်ႉ ပျေႉၸုမ်ႇဝႆႉတင်းႁႅင်းတၼ်းၶူဝ်း၊-

12ဢိၵ်ႇတင်းလွင်ႈၼင်ႇႁိုဝ်တၵ်းႁႂ်ႈမုၼ်ၽုင်းၼႃႇမႃႉၸိုဝ်ႈသဵင်ၸဝ်ႈ ယေႇသူႉၶရိၸ်ႈ ထၢင်ႇသႃးၵွပ်ႈပိူဝ်ႈသူတင်းလွင်ႈၼင်ႇႁိုဝ် တၵ်းႁႂ်ႈမုၼ်ၽုင်းသူထၢင်ႇသႃးၵွပ်ႈပိူဝ်ႈမၼ်းၸဝ်ႈ ၵႃႈၼင်ႇဢၼ်ၵျေးၸူးၽြႃးပဵၼ်ၸဝ်ႈႁဝ်း တင်းၸဝ်ႈ ယေႇသူႉၶရိၸ်ႈ ၼၼ်ႉၸိုင်၊ ႁဝ်းႁဵတ်းသူးတွင်းပထၼႃႇပုၼ်ႈသူယူႇသေႇသေႇဢေႃႈ။

Jump to: Chapter 2 →