2 Thessalonians 2

Shan

← Chapter 1 Jump to: Chapter 3 →

1ပီႈၼွင်ႉၶဝ်ဢိူၺ်း၊ လွင်ႈတၢင်းဢၼ်ၸဝ်ႈႁဝ်း ယေႇသူႉၶရိၸ်ႈ တၵ်းမႃးလႄႈ ႁဝ်းတၵ်းၸူႉၵၼ်တုမ်ၵၼ်တီႈမၼ်းၸဝ်ႈၼၼ်ႉၸမ်ႉ၊-

2လွင်ႈၼင်ႇႁိုဝ်သူတၵ်းဢမ်ႇမီးတၢင်းဢၼ်ၸႂ်သုတ်ႉယွမ်းၵႂႃႇ ၶၼ်ၶၼ်ၽႂ်းၽႂ်း ဢိၵ်ႇတင်းတၢင်းဢၼ်မႆႈၸႂ် ၵူဝ်ႁႄသၼ်ႇဝႆ လႄႈဝႃႈ၊ ဝၼ်းၸဝ်ႈၽြႃးတၵ်းႁွတ်ႈမႃးၵမ်းလဵဝ်ဢေႃႈ၊ ဝႃႈၼင်ႇၼႆၼၼ်ႉ ၵွပ်ႈပိူဝ်ႈၸႂ်ဝီႉၺိၺ်ႇ၊ ဢမ်ႇၼၼ်ၵွပ်ႈပိူဝ်ႈၵႂၢမ်းဢၼ် ဢွၵ်ႇသူပ်း၊ ဢမ်ႇၼၼ်ၵွပ်ႈပိူဝ်ႈလိၵ်ႈဢၼ် မိူၼ်ၼင်ႇလိၵ်ႈႁဝ်းၼႆႉၼၼ်ႉၸိုင်၊ ႁဝ်းတွင်းပၢၼ်ႇသူဢေႃႈ။-

3ယႃႇပေႁႂ်ႈၽူႈလႂ်လႆႈပႅတ်ႉလႆႈလႅၼ်သူ ၼႂ်းလွင်ႈတၢင်းသေၸိူဝ်ႉသေပိူင်။ ၸူဝ်ႈဢၼ်ဝၼ်းၼၼ်ႉဢမ်ႇပႆႇႁွတ်ႈထိုင်ၼၼ်ႉၸိုင်၊ တၢင်းဢၼ်ၽွၵ်ႈပျၢၼ်ႇ ၽႄၵိူင်းၶႂၢႆးၵိူင်းတၵ်းပဵၼ်ဢွၼ်တၢင်းလႄႈ ၵူၼ်းတူႉၸရိူၵ်ႈဢၼ်ဝႃႈလုၵ်ႈၸၢႆးတၢင်းလူႉတၢင်းလႅဝ်ၼၼ်ႉ တၵ်းပေႃႇမႃးဢေႃႈ။-

4ၵေႃႉၼၼ်ႉႁဵတ်းတၢင်းဢၼ်ၶတ်းၵၼ်တင်း ၵႃႈဢၼ်ႁွင်ႉဝႃႈၽြႃးပဵၼ်ၸဝ်ႈ ဢိၵ်ႇတင်းလွင်ႈတၢင်းဢၼ်ထုၵ်ႇလီၵူဝ်းၵႂၢႆႇၼၼ်ႉ လႄႈ ယွင်ႈယေႃးတူဝ်ၸဝ်ႈၵဝ်ႇယူႇသေယဝ်ႉ၊ ၼင်ႈယူႇၵႃႈၼႂ်းႁိူၼ်းပိၵ်ႈမၢၼ်ႇၽြႃးပဵၼ်ၸဝ်ႈသေလႄႈ ပဵၼ်ၵေႃႉဢၼ် ဢဝ်ပုင်ႇႁၢင်ႈ ၽြႃးပဵၼ်ၸဝ်ႈၼႄပျႃးတူဝ်ၸဝ်ႈၵဝ်ႇဢေႃႈ။

5သူဢမ်ႇၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၵဝ်လၢတ်ႈဝႆႉ လွင်ႈတၢင်းၸိူဝ်းၼၼ်ႉ ၼႂ်းမိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၼၼ်ႉႁိုဝ်။-

6ၼင်ႇႁိုဝ်ၵေႃႉၼၼ်ႉတၵ်းလႆႈထၢင်ႇသႃးၼႂ်းၶိင်ႇၵႃႇလႃႉတူဝ်ၸဝ်ႈၵဝ်ႇၸိုင်၊ တေႃႈလဵဝ်ၼႆႉ သူႁူႉလွင်ႈဢၼ်ႁႄႉဢၼ်ၶႅၼ် ၼၼ်ႉယူႇဢေႃႈ။-

7ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ တၢင်းဢၼ်လိုၵ်ႉဢၼ်လမ်ႇ ဢၼ်ဢမ်ႇတြႃးၼၼ်ႉၸိုင်၊ တေႃႈလဵဝ်ၼႆႉၵေႃႈ ယင်းတိုၵ်ႉ ပွင်ႁဵတ်းပွင်မႄးယူႇဢေႃႈ။ ၼႂ်းဝႃႈၼၼ်သေၵေႃႈ ၵေႃႉဢၼ်ႁႄႉၶႅၼ်ၼၼ်ႉ ၸူဝ်ႈဢၼ်မၼ်းဢမ်ႇပႆႇလႆႈႁွတ်ႈထိုင်တၢင်းဢၼ် ပႄႇၽဵဝ်ႈပႅတ်ႈၸိုင်၊ တၵ်းႁႄႉတၵ်းၶႅၼ်ယူႇဢေႃႈ။-

8မိူဝ်ႈၼၼ်ႉၸိုင် ၵူၼ်းဢၼ်ဢမ်ႇတြႃးဢၼ်ၸဝ်ႈ ယေႇသူႉ တၵ်းဢဝ်တင်းလူမ်း ဢၼ်ဢွၵ်ႇသူပ်းမၼ်းၸဝ်ႈ ယႃႉပႅတ်ႈလႄႈ ဢဝ်တင်းသၢႆဢရွင်ႇ တၢင်းဢၼ်မၼ်းၸဝ်ႈ ပေႃႇမႃးၼၼ်ႉ ပႄႇၽဵဝ်ႈပႅတ်ႈၼၼ်ႉ တၵ်းထၢင်ႇသႃးဢေႃႈ။-

9လွင်ႈတၢင်းဢၼ်ၵူၼ်းဢၼ်ဢမ်ႇတြႃးၼၼ်ႉ မႃးၼၼ်ႉၸမ်ႉ၊ မၼ်းတၵ်းပႃးဢဝ်တင်း တၼ်းၶူဝ်းၼီႉမိၵ်ႈလၢၵ်ႈၶၼႃႇ လွင်ႈတၢင်းဢၼ်လီဢၢမ်းၵူႈၸိူဝ်ႉၵူႈပိူင်ဢၼ်ၸၢပ်ႈသႅင်ႇၵၼ်တင်း မူႉသႃႇ ဢိၵ်ႇတင်းတၢင်းဢၼ်ပႅတ်ႉလႅၼ် ဢၼ်ဢမ်ႇတြႃး ၵူႈၸိူဝ်ႉၵူႈပိူင် ပုၼ်ႈၶဝ်ၸိူဝ်းဢၼ် ႁွတ်ႈထိုင်တၢင်းလူႉတၢင်းလႅဝ်ၼၼ်ႉသေလႄႈ ပေႃႇမႃးၵႃႈၼင်ႇတၢင်းဢၼ် ၸႃႇတၢၼ်ႇ ႁဵတ်းပဵၼ်ၼၼ်ႉဢေႃႈ။-

10လွင်ႈမၼ်းၸမ်ႉ ၶဝ်ၼၼ်ႉဢမ်ႇၶၢမ်ႇဢမ်ႇဢဝ် ၸႂ်ဢၼ်မူၼ်ႈပျေႃႇၼႂ်းသမ်ႇမႃႇတြႃး ႁႂ်ႈလႆႈႁွတ်ႈထိုင် တၢင်းဢၼ်ၵႄႇၶျွတ်ႈ ဢဝ်ၼၼ်ႉ။-

11ပိူဝ်ႈၼႆလႄႈ လွင်ႈၼင်ႇႁိုဝ်ၶဝ်ၸိူဝ်းဢၼ်ဢမ်ႇယုမ်ႇသမ်ႇမႃႇတြႃးလႄႈ မူၼ်ႈပျေႃႇၼႂ်းဢမူႉဢၼ်ဢမ်ႇတြႃးတင်းသဵင်ႈတင်းလူင်ၼၼ်ႉ

12တၵ်းႁွတ်ႈထိုင်တၢင်းဢၼ်သုမ်းတြႃးၸိုင်၊ ၽြႃးပဵၼ်ၸဝ်ႈ ပွႆႇပၼ်ဢၶႂၢင်ႉတၢင်းဢၼ်မိၵ်ႉသႃႇတိၵ်ႉထီႉ ပွင်ႁဵတ်းပွင်မႄးၼၼ်ႉ တီႈၶဝ်ႁႂ်ႈၶဝ်လႆႈယုမ်ႇၵႂၢမ်းမူႉသႃႇဢေႃႈ။

13ၵူၺ်းၵႃႈပီႈၼွင်ႉဢၼ်ၸဝ်ႈၽြႃးႁၵ်ႉၶဝ်ဢိူၺ်း၊ ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈ လိူၵ်ႈၵဵပ်းဢဝ်သူၸဵမ်မိူဝ်ႈဢွၼ်ၼႆႉၼၼ်ႉ ႁႂ်ႈသူလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ် ၵွပ်ႈပိူဝ်ႈတၢင်းဢၼ်ဝီႉၺိၺ်ႇၸဝ်ႈ ႁႂ်ႈမူတ်းၸၢင်ႇ ဢိၵ်ႇတင်းတၢင်းဢၼ်ယုမ်ႇမၢတ်ႈသမ်ႇမႃႇတြႃးၼၼ်ႉလႄႈ ႁဝ်းတၵ်းလႆႈယွင်ႈယေႃးၵျေးၸူးၽြႃးပဵၼ်ၸဝ်ႈ ၵွပ်ႈပိူဝ်ႈသူယူႇတႃႇသေႇဢမ်ႇထၢတ်ႇဢေႃႈ။-

14ပုၼ်ႈလွင်ႈၼင်ႇႁိုဝ်တၵ်းပဵၼ်ၸိူဝ်ႉၼင်ႇၼၼ်ၸိုင်၊ မၼ်းၸဝ်ႈႁွင်ႉဢဝ်သူၵွပ်ႈပိူဝ်ႈတြႃးသတၢင်းသိူဝ်းပျေႃႇႁဝ်းၼၼ်ႉယဝ်ႉ။ လွင်ႈမၼ်းၸမ်ႉ ၼင်ႇႁိုဝ်သူတၵ်းလႆႈပိူင်ႇထိူၵ်ႈမုၼ်ၽုင်းၸဝ်ႈႁဝ်း ယေႇသူႉၶရိၸ်ႈ ၼၼ်ႉၸိုင်၊ၸင်ႇပဵၼ်ဢေႃႈ။-

15ၵွပ်ႈႁွႆးၼႆႉလႄႈ၊ပီႈၼွင်ႉၶဝ်ဢိူၺ်း၊ ယိပ်းၵမ်ဢဝ်ၼႄးဢူႉပတေႇ ဢၼ်ၸွမ်းလူၺ်ႈၵႂၢမ်းဢၼ်ဢွၵ်ႇသူပ်းႁဝ်းသေဢမ်ႇဝႃႈ၊ ဢၼ်ၸွမ်းလူၺ်ႈလိၵ်ႈႁဝ်းသေဢမ်ႇဝႃႈ၊ ဢၼ်သူသွၼ်ဢဝ်မႃးယဝ်ႉၸိူဝ်းၼၼ်ႉသေလႄႈ ၸွႆးၸပ်းယူႇမၼ်ႈမၼ်ႈၶိူင်ႇၶိူင်ႇတႃႉ။

16ႁႂ်ႈတူဝ်ၸဝ်ႈႁဝ်း ယေႇသူႉၶရိၸ်ႈ ဢိၵ်ႇတင်းၽြႃးပဵၼ်ၸဝ်ႈပေႃႈႁဝ်း ဢၼ်ႁၵ်ႉႁဝ်းလႄႈ ပၼ်တၢင်းဢၼ်သၢၵ်ႈသႃႇထႃႇဝရႃႉဢိၵ်ႇတင်း တၢင်းဢၼ်မုင်ႈထႃႈမွင်းထႃႈ ဢၼ်လီဢၼ်ငၢမ်း ၸွမ်းၼင်ႇၵျေးၸူးၸဝ်ႈၼၼ်ႉ၊-

17ႁႂ်ႈႁူဝ်ၸႂ်သူသၢၵ်ႈသႃႇလႄႈႁႂ်ႈသူမၼ်ႈၶိူင်ႇယူႇ ၼႂ်းတၢင်းဢၼ်လီဢၼ်ငၢမ်း ဢိၵ်ႇတင်းၼႂ်းလွင်ႈတၢင်းဢၼ်လီဢၼ်ငၢမ်း ၵူႈၸိူဝ်ႉၵူႈပိူင်သေၵမ်းလူၺ်ႈ။

← Chapter 1 Jump to: Chapter 3 →